2
Sɔ̃ɔsi geeru
1 Adɑmɑ wunɛ, ɑ n sɔ̃ɔsi geerun gɑri gerumɔ. 2 A durɔ bukurobu sɔ̃ɔwɔ bu de bɑ n gɑyɑ mɔ, kpɑ bɑ n sɑ̃ɑ bɛɛrɛgibu kɑ be bɑ tii yɛ̃, kpɑ bɑ n yɔ̃ dim dim nɑɑnɛ dokebu sɔɔ kɑ kĩru kɑ tɛmɑnɑbu. 3 Mɛyɑ mɑɑ kurɔ tɔkɔnu, ɑ nu sɔ̃ɔwɔ nu de nin sɑnu sɑnusu su n dɛɛre, kpɑ nu kun sɑ̃ɑ tɔn wĩɔbu ǹ kun mɛ tɑm yobu. N weenɛwɑ nu n bwisi gee sɔ̃ɔsimɔ 4 kpɑ nu kpĩ nu kurɔ mɔro kpɛmminu sɔ̃ɔsi nge mɛ n weenɛ bu ben durɔbu kɑ bibu kĩɑ, 5 kpɑ bɑ n tii yɛ̃ bɑ n sɑ̃ɑ tɔn dɛɛrobu kɑ tɔn geobu be bɑ ben mɔrɑru nɔni doke, mɑ bɑ ben durɔbu wiru kpĩiyɑmmɛ, kpɑ goo ku kpĩ u Gusunɔn gɑri gɑri kɑm gerusi.
6 Mɛyɑ mɑɑ, ɑ ɑluwɑɑsibɑ sɔ̃ɔwɔ bu de bɑ n gɑyɑ mɔ. 7 Wunɛn tii mɑɑ, ɑ n bu kom gem sɔ̃ɔsimɔ. A n dɑ Gusunɔn gɑrin keu sɔ̃ɔsi kɑ bɛɛrɛ, murɑfiti sɑriru sɔɔ. 8 A bu sɔ̃ɔsio kɑ gɑri gee yi bɑ ǹ kpɛ̃ bu tɑɑrɛ wɛ̃, kpɑ sekuru tu wunɛn yibɛrɛbɑ mwɑ yèn sɔ̃ bɑ gɑ̃ɑ kɔ̃sunu biɑ ni bɑ koo gere bɛsɛ sɔɔ.
9 A mɑɑ yobu sɔ̃ɔwɔ bu ben yinnibu wiru kpĩiyɑ kpuro sɔɔ, kpɑ bu ko ye yɑ koo bu wɛ̃re bu ku kɑ bu sikirinɑ. 10 Bɑ kun sɑ̃ɑ bèn nɔmɑ yɑm mɔ, ɑdɑmɑ bɑ n tii sɔ̃ɔsimɔ nɑɑnɛgibu kpuro sɔɔ, kpɑ bu kpuro ko Gusunɔ bɛsɛn Fɑɑbɑ kowon sɔ̃ɔsiru tu kɑ ko bɛɛrɛgiru.
11 Domi Gusunɔ u win durom sɔ̃ɔsi tɔmbu kpuron fɑɑbɑn sɔ̃. 12 Durom mɛ, mu sun sɔ̃ɔsimɔ mɑ n weenɛ su wɑ̃ɑ te tɑ kun Gusunɔ bɛɛrɛ wɛ̃ɛmɔ deri kɑ mɑɑ hɑnduniɑn kĩru kɑnkɑm, kpɑ sɑ n wɑ̃ɑ hɑnduniɑ mini gem sɔɔ kɑ lɑɑkɑri kɑ Gusunɔn bɛɛrɛ wɛ̃ɛbu, 13 kpɑ sɑ n tɔ̃ɔ doo nɔɔrugii te swɑɑ dɑki kɑ yĩiyɔbu, tè sɔɔ Gusunɔ bɛsɛn Yinni boko kɑ bɛsɛn Fɑɑbɑ kowo Yesu Kirisin yiiko yɑ koo sɔ̃ɔsirɑ. 14 Yesu Kirisi wi, u win tii wɛ̃ bɛsɛn sɔ̃ u kɑ sun yɑkiɑ sɑɑ kom kɔ̃sum kpuron di, kpɑ u kɑ sun ko tɔn dɛɛrobu be bɑ sɑ̃ɑ wi tɔnɑgibu be bɑ mɑɑ hɑniɑ mɔ bu kɑ sɔm geenu ko.
15 Nge mɛyɑ n weenɛ ɑ gɑri gere. A tɔmbu dɑm kɛ̃ kpɑ ɑ mɑɑ bu gerusi kɑ wunɛn yiiko kpuro. A ku de goo u nun gɛm.