3
Yesugibun sɑnu sɑnusu
1 A wunɛn tɔmbu yɑɑyɑsio bɑ n tem yɛ̃robu kɑ wuun tɔnwerobu wiru kpĩiyɑmmɛ bɑ n bu mɛm nɔɔwɑmmɛ, kpɑ bɑ n sɔɔru sɑ̃ɑ sɔm geenu kpuron sɔ̃. 2 A bu sɔ̃ɔwɔ bu ku rɑɑ goon kɔ̃sɑ gere bu ku mɑɑ goo nɔɔ kɑsu, ɑdɑmɑ bu bɑɑwure ben dɑɑ duudwiɑ sɔ̃ɔsi. 3 Domi bɛsɛn tii sɑ rɑɑ sɑ̃ɑ gɑri bɑkɑsu kɑ mɛm nɔɔ sɑrirugibu kɑ be bɑ tore. Sɑ rɑɑ sɑ̃ɑ gɔ̃ru kĩru kɑnkɑm kɑ hɑnduniɑn kĩru bɑɑteren yobu. Sɑ rɑɑ wɑ̃ɑ nuku kɔ̃suru kɑ binɛ sɔɔ. Sɑ sɑ̃ɑ be tɔmbɑ tusɑ, sɑ mɑɑ tusinɛ. 4 Adɑmɑ sɑnɑm mɛ Gusunɔ bɛsɛn Fɑɑbɑ kowo u win tɔn geeru sɔ̃ɔsi kɑ win kĩru tɔmbu sɔɔ, 5 u sun fɑɑbɑ kuɑ kɑ sɑ̃rɑsiɑ bi bu derɑ sɑ mɑrurɑ nɔn mɛɛruse, mɑ Hunde Dɛɛro sun wɑ̃ɑ kpɑɑru wɛ̃. U ǹ sun fɑɑbɑ kue sɔm gee ni bɛsɛn tii sɑ kuɑn sɔ̃ mɑ n kun mɔ win wɔnwɔndun sɔ̃. 6 Domi Gusunɔ u sun Hunde Dɛɛro wi wɛ̃ n bɑndɑ Yesu Kirisi bɛsɛn Fɑɑbɑ kowon sɑɑbu, 7 kpɑ win durom sɔ̃ su kɑ ko geegibu Gusunɔn mi, kpɑ su kɑ wɑ̃ɑru te tɑ ku rɑ kpe tubi di te sɑ yĩiyɔ. 8 Gɑri yi, gɑri nɑɑnɛgiiyɑ.
Nɑ kĩ ɑ yi gere ɑ sire kpɑ be bɑ Gusunɔ nɑɑnɛ doke bu ben sɑɑ di sɔm geenun kobu sɔɔ. Gɑri yi, yi wɑ̃ yi mɑɑ sɑ̃ɑ tɔmbun ɑrufɑɑni. 9 Adɑmɑ ɑ wiirɑ gɑri suurio kɑ mɑɑ sikɑdobɑn yĩsɑn mɛɛribu kɑ sikirinɔsu kɑ mɑɑ woodɑn sɑnnɔsu. Yeni kpuro yɑ sɑ̃ɑwɑ kɑm, yɑ ǹ ɑrufɑɑni gɑɑ mɔ. 10 Wi u kɑrɑnɑɑ dokemɔ, ɑ nùn gerusio nge nɔn yiru ɑ sere nùn fɛ̃rɑ bee tiɑ. 11 Domi ɑ yɛ̃ mɑ tɔnu win bweserɑ sɑnkire, u torɑmɔ mɑ u tii tɑɑrɛ wɛ̃ɛmɔ.
Yiire dɑ̃ɑkibu
12 Sɑnɑm mɛ kon nun Aɑtemɑsi ǹ kun mɛ Tisiki gɔriɑmɑ, ɑ hɑniɑ koowo ɑ kɑ mɑn nɑɑmwɛmɑ Nikopolisiɔ, domi miyɑ nɑ gɔ̃ru doke nɑ n wɑ̃ɑ woorun sɑɑ. 13 A Senɑsi woodɑ yɛ̃ro wi kɑ Apolo kusenu kuo nu n wɑ̃ ben sɑnum sɔɔ, kpɑ gɑ̃ɑnu ku rɑɑ bu kɔmiɑ. 14 N weenɛ bɛsɛgibun tii bu hɑniɑ ko sɔm geenun kobu sɔɔ, kpɑ bɑ n nɔmu mɔ bukɑtɑ tilɑsigiɑ ye sɔɔ, kpɑ bɑ kun wɑ̃ɑru dimɔ kɑm sɔɔ.
15 Be bɑ wɑ̃ɑ nɛn mini bɑ nun tɔburɑ be kpuro. A bu tɔbirio be bɑ bɛsɛn kĩru mɔ nɑɑnɛ dokebu sɔɔ.
Kpɑ Gusunɔn durom mu n kɑ bɛɛ kpuro wɑ̃ɑ._