Titu 1

TIRE TE PƆLU

U TITU KUA

Tɔbiribu

^1-4 Titu, nɑ nun tire teni kuɑmmɛ wunɛ wi ɑ sɑ̃ɑ nɛn bii mɑruro nɑɑnɛ dokebun sɑɑbu bì sɑ mɔ Yesu Kirisi sɔɔ bɛsɛ kpuro. Kpɑ Gusunɔ Bɑɑbɑ kɑ Yesu Kirisi bɛsɛn Fɑɑbɑ kowo bu nun durom kuɑ kpɑ bu nun ɑlɑfiɑ kɛ̃. Nɛnɑ Pɔlu, Gusunɔn yoo kɑ Yesu Kirisin gɔro. Bɑ mɑn gɔrɑ n kɑ be Gusunɔ u gɔsɑ somi bu kɑ nɑɑnɛ doke, kpɑ n kɑ bu gem giɑsiɑ mɛ mu Gusunɔ bɛɛrɛ wɛ̃ɛmɔ, bɑ n kɑ wɑ̃ɑru te tɑ ku rɑ kpe yĩiyɔ. Gusunɔ u ku rɑ weesu ko. Wiyɑ u sun wɑ̃ɑ te nɔɔ mwɛɛru kuɑ toren di. Mɑ tɛ̃, win sɑɑ ye u gɔsɑ sɔɔ, u win gɑri terɑsiɑ wɑɑsu sɔɔ yi bɑ mɑn nɔmɑ bɛriɑ nge mɛ Gusunɔ bɛsɛn Fɑɑbɑ kowo u yiire.

Sɔmbu te bɑ Titu

nɔmu sɔndiɑ Kɛrɛtiɔ

⁵ Nɑ nun deriwɑ Kɛrɛtiɔ ɑ kɑ ye yɑ tien wunɑnɔ ko, kpɑ ɑ Yesun yigbɛ tɔnwerobu gɔsi wuu bɑɑgere sɔɔ nge mɛ nɑ nun yiire. ⁶ Wi n weenɛ ɑ gɔsi wee, wi u sɑ̃ɑ tɑɑrɛ sɑrirugii kpɑ u n kurɔ turo dege dege mɔ kpɑ win bibɑ n sɑ̃ɑ nɑɑnɛ dokeobu, n ǹ mɔ be bɑ kɑ dɑɑ bɛrɛtɛkɛ wĩimɔ ǹ kun mɛ mɛm nɔɔ sɑriru. ⁷ N weenɛwɑ yigbɛ kpɑro u n sɑ̃ɑ tɑɑrɛ sɑrirugii yèn sɔ̃ u Gusunɔn sɔmburu nɛni. N ǹ weenɛ u n sɑ̃ɑ tii suo, ǹ kun mɛ mɔrugii, ǹ kun mɛ tɑm nɔro, ǹ kun mɛ nɔɔ gɔmunugii, ǹ kun mɛ wi u dukiɑ kɑsu kɑ keetɑ. ⁸ Adɑmɑ u n sɑ̃ɑ sɔbun yɑɑrɛ kowo kpɑ u n dɑ geɑn kobu kɑ̃. U n sɑ̃ɑ wi u tii yɛ̃. U n sɑ̃ɑ dee dee kɑ tɔn dɛɛro kpɑ u n gɑyɑ mɔ. ⁹ N weenɛ u n Gusunɔn gɑri nɑɑnɛgii nɛni dim dim nge mɛ bɑ nùn yi giɑsiɑ, kpɑ u kɑ kpĩ u mɑɑ gɑbu dɑm kɛ̃ kɑ sɔ̃ɔsi geeru kpɑ u mɑɑ sikirinɔsugibu kɑmiɑ.

¹⁰ Domi tɔn bɛrɛtɛkɛ dɑbinu wɑ̃ɑ kɑ wiirɑ gɑri gerobu kɑ be bɑ tɔmbu nɔni wɔ̃kumɔ, n kun mɑm ko Yuubɑ. ¹¹ Ben bweserɑ n weenɛ bu nɔsu mɑrisiɑ, domi bɑ yɛnu dɑbinun tɔmbu bitɑni dokemɔ yèn sɔ̃ bɑ bu sɔ̃ɔsimɔ ye n kun weenɛ bu kɑ gobi wɑn sɔ̃. ¹² Kɛrɛtigii ben tiin sɔmɔ turo u nɛɛ, bɑɑdommɑwɑ bɑ sɑ̃ɑ wee kowobu kɑ gbeeku yɛɛ kɔ̃si kɑ mɑɑ dim kĩro yikurobu. ¹³ Geemɑ u geruɑ. Yen sɔ̃, ɑ bu gerusio gem gem kpɑ bɑ n tɑ̃sɑ nɑɑnɛ dokebu sɔɔ dim dim, ¹⁴ kpɑ bu ku rɑɑ mɑɑ Yuubɑn gɑri sekurɛ nɛnɛ, bu ku mɑɑ tɔn ben yiirebu swĩi be bɑ gem yinɑ. ¹⁵ Gɑ̃ɑnu bɑɑnire nu dɛɛre be bɑ dɛɛren mi, ɑdɑmɑ gɑ̃ɑnu sɑri ni nu dɛɛre disinugibu kɑ nɑɑnɛ doke sɑrirugibun mi, yèn sɔ̃ ben bwisikunu kɑ ben gɔ̃rusu kun dɛɛre. ¹⁶ Bɑ gerumɔ kɑ nɔɔ bɑ Gusunɔ yɛ̃, ɑdɑmɑ ben kookoosu ben gɑri siki. Bɑ sɑ̃ɑ tɔn kɔ̃sobu kɑ mɛm nɔɔ sɑrirugibu, bɑ ǹ kpɛ̃ bu gɑ̃ɑ geenu gɑnu ko.