3
Nge mɛ bɑ rɑ gem wɑ
Gusunɔn wuswɑɑɔ
1 Tɛ̃, nɛgibu, i de i n nukuru do ye i kɑ sɑ̃ɑ Yinnigibu. Nɛn mi, nɑ ǹ wɑsirɑmɔ n kɑ bɛɛ yɑɑyɑsiɑ ye nɑ rɑɑ yoruɑ kɔ, bɛɛn mi mɑɑ, somirɑ. 2 I n tii sɛ kɑ kɔ̃sɑn kowobu be bɑ sɑ̃ɑ nge bɔ̃nu, mɑ bɑ wɑsin bɑngo nɑɑnɛ sɑ̃ɑ. 3 Bɛsɛrɑ sɑ sɑ̃ɑ bɑngogii geebu, n ǹ mɔ be, domi sɑ Gusunɔ sɑ̃ɑmɔ kɑ win Hunde, sɑ woo kɑnɑmɔ Yesu Kirisin sɔ̃, sɑ ǹ mɑɑ bɛsɛn nɑɑnɛ doke wɑsin komɑnu sɔɔ. 4 Kɑ mɛ, nɛn tii kon kpĩ n nɛn nɑɑnɛ doke wɑsin komɑnu sɔɔ. Gɑbu bɑ̀ n tɑmɑɑ bɑ koo kpĩ bu ko mɛ, kɑɑ rɑ gere nɛ? 5 Bɑ mɑn mɑrɑwɑ Isirelin bii, Bɛnyɑmɛɛn bweseru sɔɔ. Nɑ sɑ̃ɑwɑ Yuu wi Yuubɑ bɑ mɑrɑ. Mɑ bɑ mɑn bɑngo kuɑ sɔ̃ɔ nɔɔbɑ itɑse. Ǹ n mɑɑ woodɑn sɔ̃n nɑ, nɑ kuɑ Fɑlisi. 6 Nɑ rɑɑ mɑm hɑniɑ mɔ sere nɑ Yesun yigbɛru nɔni sɔ̃ɔmɔ. Ǹ n gem kɑson nɑ, woodɑn mɛm nɔɔbu sɔɔ, goo kun kpɛ̃ u mɑn tɑɑrɛ wɛ̃. 7 Adɑmɑ ye nɑ rɑɑ mɛɛrɑ ɑre, tɛ̃ nɑ ye kpuro gɑrisi wom dirum Kirisin sɔ̃. 8 Nɑ mɑm kpuro gɑrisi wom dirum domi gɑ̃ɑ bɑkɑnɑ nɑ̀ n nɛn Yinni Yesu Kirisi giɑ. Win sɔ̃nɑ nɑ kpuro deri, nɑ mɑɑ ye mɛɛrɑ kubɑnu nɑ n kɑ Kirisi mɔn sɔ̃, 9 kpɑ nɑ n kɑ nùn gbinnɛ. Nɑ ǹ mɑɑ yĩiyɔ mɑ kon gem wɑ woodɑn mɛm nɔɔbun sɔ̃, ɑdɑmɑ kon gem wɑ yèn sɔ̃ nɑ Kirisi nɑɑnɛ doke. Gem mɛ, mu weewɑ sɑɑ Gusunɔn min di nɑɑnɛ doke bin sɑɑbu. 10 Ye nɑ kĩ, yeyɑ n Kirisi giɑ, kɑ mɑɑ dɑm mɛ u kɑ seewɑ gɔrin di kpɑ nɑ n bɔnu mɔ win wɑhɑlɑ sɔɔ, kpɑ n kɑ nùn weenɑ win gɔɔ sɔɔ, 11 kpɑ nɑ n yĩiyɔ nɛn tii mɑ kon se gɔrin di.
Aren nɑɑ girɑbu
12 N ǹ mɔ nɑ ɑre nɔmɑ turɑ ginɑ, n ǹ mɑɑ mɔ nɑ yibɑ. Adɑmɑ nɑ yi nɑɑ gire yi kɑ ko nɛgii yèn sɔ̃ Yesu Kirisi u mɑn kuɑ wigii. 13 Nɛgibu, nɑ ǹ tɑmɑɑ nɑ ginɑ yi nɔmɑ turɑ, ɑdɑmɑ gɑ̃ɑ teenɑ nɑ mɔ̀, nɑ gɑ̃ɑ birukinu duɑri, mɑ nɑ wuswɑɑginu nɑɑ gire. 14 Nge mɛyɑ nɑ ye nɑ nɑɑ gire dukɑ swĩi n kɑ ɑre yi wɑ yi Gusunɔ u sun sokue wɔllɔ sɑɑ Yesu Kirisin min di.
15 Bɛsɛ kpuro, bɛsɛ be sɑ sɑ̃ɑ tɔn girobu, su bwisiku nge mɛ. Adɑmɑ bɛɛ ì n bwisiku tukunu gɑnu mɔ, Gusunɔ u koo bɛɛ gem sɔ̃ɔsi. 16 Kɑ mɛ, bɑɑ ǹ n mɑn nɑ sɑ turɑ, su gesi dɑ wuswɑɑɔ swɑɑ tiɑ sɔɔ.
17 Nɛgibu, i mɑn sɑɑrio bɛɛ kpuro. Sɑ bɛɛ kom gem sɔ̃ɔsi. Ǹ n mɛn nɑ, i bu nɔni girɑrio be bɑ kom gem mɛ swĩi. 18 Nɑ bɛɛ sɔ̃ɔwɑ kɔ nɔn dɑbiru, nɑ kpɑm wure nɑ bɛɛ sɔ̃ɔmɔ tɛ̃ kɑ yĩresu, tɔn dɑbirɑ wɑ̃ɑ be bɑ sĩimɔ nge Kirisin dɑ̃ɑ bunɑnɑrun gɑrin yibɛrɛbɑ. 19 Kɑm kobɑ bɑ koo kɑ wiru go, domi ben nukurɑ tɑ sɑ̃ɑ ben yinni. Ye n weenɛ n bu sekuru ko yerɑ bɑ kɑ woo kɑnɑmɔ. Hɑnduniɑ yen gɑ̃ɑnu tɔnɑwɑ bɑ bwisikumɔ. 20 Adɑmɑ bɛsɛ, Gusunɔn wɔllɑ tɑ sɑ̃ɑ bɛsɛn wuu. Min diyɑ sɑ bɛsɛn Fɑɑbɑgii Yinni Yesu Kirisi mɑrɑ u nɑ. 21 Wiyɑ koo bɛsɛn wɑsi yiiko sɑrirugii kɔsi kɑ win dɑm mɛ mu koo de kpuro nùn wiru kpĩiyɑ, kpɑ yi kɑ win wɑsi yiikogii weenɑ.