TIRE TE PƆLU
U EFESUGIBU KUA
Pɔlu u wɑ̃ɑwɑ pirisɔm sɔɔ Romuɔ u kɑ tire te Efesugibu yoruɑ. Ye u tu yoruɑ u kpɑ, Tisikiwɑ u gɔrɑ u kɑ tu dɑ. N sɑ̃ɑre Efesun berɑ min Yesun yigbɛnu kpurowɑ u tire te yoruɑ, n ǹ mɔ teeru tɔnɑ.
Gbiikɑɑ, u bu sɔ̃ɔsimɔ nge mɛ Yesun yigbɛrugibu bɑ kuɑ wɑsi tee Yesu sɔɔ. U sɔ̃ɔsimɔ swɑɑ ye Gusunɔ u kpɑ u kɑ win tɔmbu gɔsɑ mɑ u ben torɑnu suuru kuɑ, mɑ u bu win Hunde Dɛɛro wɛ̃.
Yiruse, u bu kirɔ mɔ̀ bu kɑ ben wɑ̃ɑru di nɔɔ tiɑ sɔɔ ye yɑ koo sɔ̃ɔsi mɑ Kirisi u wɑ̃ɑ ben wɑ̃ɑru sɔɔ kɑ gem.
Pɔlu u gɑrin weenɑsii dɑbinu suɑ u kɑ Yesun yigbɛrun nɔɔ tiɑn gɑri bu yeerisiɑ. U nɛɛ, Yesun yigbɛru tɑ sɑ̃ɑwɑ nge wɑsi, mɑ Yesu wi, u sɑ̃ɑ yin wiru. Yigbɛ te, tɑ mɑɑ sɑ̃ɑ nge diru, mɑ Yesu wi, u sɑ̃ɑ ten gɑni gɔmburun dɑm. Yigbɛ te, tɑ mɑɑ sɑ̃ɑ nge kurɔ, mɑ Yesu wi, u sɑ̃ɑ ten durɔ.
Tire ten kpunɑɑ
1. Tɔbiribu, wiru 1:1-2.
2. Kirisi kɑ win yigbɛru, wiru 1:3n di sere wiru 3:21.
3. Wɑ̃ɑ kpɑɑru Kirisi sɔɔ, wiru 4:1n di sere wiru 6:20.
4. Nɔɔ kɑnɑ tɔbiribu, wiru 6:21-24.