TIRE TE PƆLU
U EFESUGIBU KUA
1
Tɔbiribu
1 Bɛɛ nɑɑnɛ dokeobu, bɛɛ be i wɑ̃ɑ Efesuɔ mɑ i kɑ Yesu Kirisi yɔ̃rɑ dim dim, nɛ Pɔlu, nɛ wi nɑ sɑ̃ɑ Yesu Kirisin gɔro Gusunɔn kĩru sɔɔ, nɑ bɛɛ tɔburɑ. 2 Gusunɔ bɛsɛn Bɑɑbɑ kɑ Yinni Yesu Kirisi bu bɛɛ durom kuɑ kpɑ bu bɛɛ ɑlɑfiɑ kɛ̃.
Durom mɛ Gusunɔ sun kuɑ
bɛsɛ kɑ Kirisin
gbinnɑɑn sɑɑbu
3 I de su Gusunɔ siɑrɑ bɛsɛn Yinni Yesu Kirisin Bɑɑbɑ. Bɛsɛ kɑ Kirisin gbinnɑɑn sɑɑbu u sun wɔllun domɑ bwese bwesekɑ kuɑ sɑɑ win Hunden min di. 4 Bu sere hɑnduniɑ tɑkɑ ko, Gusunɔ u sun gɔsɑ kɔ sɑ n kɑ sɑ̃ɑ wigibu Kirisi sɔɔ, kpɑ sɑ n sɑ̃ɑ dɛɛrobu kɑ tɑɑrɛ sɑrirugibu win mi. Win kĩru sɔɔ 5 u himbɑ kuɑ yellun di u sun ko win tiin bibu sɑɑ Yesu Kirisin min di. Win tɔn geerun sɔ̃nɑ u kuɑ mɛ, 6 kpɑ su kɑ win durom yiikogim siɑrɑ mɛ u sun kuɑ bɛsɛ kɑ win Bii kĩnɑsin gbinnɑɑ sɔɔ.
7 Domi Kirisin yɛm sɑɑbuwɑ sɑ yɑkiɑrɑ mɑ bɑ sun bɛsɛn durum suuru kuɑ. Nge mɛyɑ Gusunɔ u sun win durom bɑkɑm sɔ̃ɔsi, 8 mɛ u sun kuɑ n bɑndɑ ye u sun bwisi bɛkɛ kɑ lɑɑkɑri yɑbuɑ. 9 Mɑ u sun win ɑsiri giɑsiɑ ye win tii u gɔ̃ru doke u ko yellun di sɑɑ Yesu Kirisin min di. 10 Gusunɔn himbɑ ye, ye u koo yibiɑ dɔmɑ te sɑɑ yɑ turɑ, yerɑ u tɑkɑ koorɑ kpuro mɛnnɑ sɑnnu, ye kpuro ye yɑ wɑ̃ɑ wɔllɔ kɑ ye yɑ wɑ̃ɑ temɔ, kpɑ Kirisi u n sɑ̃ɑ yen wirugii.
11 Domi gɑ̃ɑnu kpuro nu koorɑmɔwɑ nge mɛ Gusunɔn himbɑ kɑ win kĩru. Mɑ bɛsɛ kɑ Kirisin gbinnɑɑn sɔ̃ sɑ kuɑ tubi diobu Gusunɔn mi kɑ win tiin himbɑ ye u gɔ̃ru doke yellun di. 12 Ǹ n mɛn nɑ, i de su Gusunɔ bɛɛrɛ wɛ̃, bɛsɛ be sɑ gbiɑ sɑ yĩiyɔbu mɔ Kirisin mi.
13 Mɛyɑ mɑɑ sɑnɑm mɛ i gem gɑri nuɑ yi yi sɑ̃ɑ Lɑbɑɑri Geɑ ye yɑ kɑ bɛɛ fɑɑbɑ nɑɑwɑ, sɑnɑm mɛyɑ i Kirisi nɑɑnɛ doke. Mɑ Gusunɔ u win tiin yĩreru doke bɛɛ sɔɔ ye u bɛɛ Hunde Dɛɛro kɑ̃ wìn nɔɔ mwɛɛru u rɑɑ kuɑ. 14 Hunde Dɛɛro wiyɑ u sɑ̃ɑ nge bɛsɛn tubin sunɑ ye Gusunɔ u win tɔmbu nɔɔ mwɛɛru kuɑ. Mɑ u sun sɔ̃ɔmɔ kɑm kɑm mɑ sɑ ko tubi ye di sɑnɑm mɛ Gusunɔ u koo wigibu yɑkiɑ mɑm mɑm. Kpɑ bu win yiiko siɑrɑ.
Pɔlun kɑnɑru
15 Yenin sɑɑbuwɑ sɑɑ dɔmɑ tèn di nɑ bɛɛn nɑɑnɛ dokebu Yinni Yesu sɔɔn bɑɑru nuɑ kɑ nge mɛ i nɑɑnɛ dokeobu kpuro kĩ, 16 nɑ ǹ wɑsirɑre nɑ kun kɑ Gusunɔ siɑre bɛɛn sɔ̃. Nɑ bɛɛ yɑɑyɑmɔ nɛn kɑnɑru sɔɔ, 17 mɑ nɑ bɛsɛn Yinni Yesu Kirisin Yinni, wi u sɑ̃ɑ Bɑɑbɑ yiikogii kɑnɑ u bɛɛ ko lɑɑkɑrigibu kpɑ u bɛɛ yɑm bururɑsiɑ i kɑ nùn giɑ. 18 Nɑ mɑɑ nùn bikiɑmɔ u bɛɛn gɔ̃run nɔni wukiɑ kpɑ i kɑ win yɑm bururɑm wɑ, kpɑ i n kɑ yɛ̃ ye i yĩiyɔ yèn sɔ̃ u bɛɛ sokɑ, kɑ nge mɛ win tubi geɑn kpɑ̃ɑrɑ nɛ ye u nɑɑnɛ dokeobu yiiye, 19-20 kɑ nge mɛ win dɑm bɑkɑm mu sɔmburu mɔ̀ bɛsɛ be sɑ nùn nɑɑnɛ doke sɔɔ. Dɑm mɛ, mu sɑ̃ɑ tem kɑ dɑm bɑkɑm mɛ u dendɑ u kɑ Kirisi seeyɑ gɔrin di mɑ u nùn sinɑsiɑ win nɔm geuɔ wɔllɔ. 21 Miyɑ Kirisi u wɑ̃ɑ u wɔllun wirugibu kpuro kere kɑ min yiikogibu kɑ dɑmgibu kɑ yinnibu kpuro kɑ yĩsiru bɑɑtere te bɑ koo kpĩ bu soku sɑɑ yeni sɔɔ kɑ mɑɑ sɑɑ ye yɑ sisi sɔɔ. 22 Mɑ Gusunɔ u derɑ u kuɑ gɑ̃ɑnu kpuron wirugii, mɑ u nùn wunɑ u kɑ ko wigibun yigbɛrun Yinni boko. 23 Yigbɛ te, tɑ sɑ̃ɑ win wɑsi. Te sɔɔrɑ win tii u wɑ̃ɑ u yibɑ mɑ u yɑbu bɑɑyere yibiɑmɔ bɑɑmɑ.