I sɔmunu dɛrɑnɔ
6
1 Nɛgibu, ì n goo mwɑ torɑru gɑru sɔɔ, bɛɛ be Gusunɔn Hunde u kpɑrɑmɔ, i yɛ̃ro swɑɑ geɑ sureo kpɑm kɑ tii kɑwɑbu, kpɑ i n tii yɛ̃ bu ku rɑɑ kɑ bɛɛn tii kɔkirin sɔ̃. 2 I n sɔmunu dɛrɑnɑmɔ kpɑ i kɑ Kirisin woodɑ mɛm nɔɔwɑ. 3 Goo ù n tii mɛɛrɑ goo mɑ u ǹ sɑ̃ɑ gɑ̃ɑnu, u tii nɔni wɔ̃kumɔwɑ. 4 I de bɑɑwure u win tiin kookoosu yĩiyɑ kpɑ u wɑ si sɔɔ, ye u koo kɑ woo kɑnɑ, ɑdɑmɑ u ku woo kɑnɑ mɑ u goo keren sɔ̃. 5 Domi bɑɑwurewɑ u koo win tii tiin sɔmunu sɔbe.
6 Wi bɑ Gusunɔn gɑri sɔ̃ɔsimɔ, i de yɛ̃ro u win gɑ̃ɑ gee ni u mɔ bɔnu ko kɑ wi u nùn sɔ̃ɔsimɔ.
7 I ku tii torɑsiɑ. Bɑ ku rɑ Gusunɔ yɑɑkoru ko. Domi ye tɔnu u duurumɔ, yeyɑ u koo gɛ̃. 8 Ù n duurumɔ ye win tii tiin dɑɑ yɑ kĩ, kɑm kobɑ yɑ koo nùn mɑruɑ. Ù n mɑɑ duurumɔ ye Gusunɔn Hunde u kĩ, wɑ̃ɑru te tɑ ku rɑ kpewɑ Gusunɔn Hunde koo nùn mɑruɑ. 9 Ǹ n mɛn nɑ, su ku wɑsirɑ geɑn kobu sɔɔ, domi sɑ̀ kun kpɑnɛ, sɑ ko wɑ su gɛ̃ sɑnɑm mɛ sɑɑ yɑ turɑ. 10 Nge mɛyɑ sɑɑ bɑɑyere ye sɑ ɑyeru mɔ, su bɑɑwure durom kuɑ, n mɑm nɛɛre be bɑ Yesu nɑɑnɛ doke.
Kirɔ dɑ̃ɑkɑ kɑ tɔbiribu
11 Tɛ̃, i nɛn yori bɑkɑ mɛɛrio ye nɑ bɛɛ yoruɑmmɛ kɑ nɛn tiin nɔmɑ. 12 Be bɑ kĩ bu woo kɑnɑ wɑsin sɔ̃, beyɑ bɑ kĩ bu bɛɛ tilɑsi ko i kɑ bɑngo ko. Adɑmɑ bɑ ye mɔ̀ kpɑ bu ku kɑ nɔni swɑ̃ɑru wɑ Kirisin dɑ̃ɑ bunɑnɑrun gɑrin sɔ̃. 13 Bɑɑ be bɑ bɑngo kuɑ mi, ben tii bɑ ǹ woodɑ mɛm nɔɔwɑmmɛ. Mɑ bɑ kĩ bu bɛɛ bɑngo ko bu kɑ woo kɑnɑ. 14 Adɑmɑ nɛ nɑ kun woo kɑnɑmɔ mɑ n kun mɔ bɛsɛn Yinni Yesu Kirisin dɑ̃ɑ bunɑnɑrun gɑrin sɔ̃, domi win dɑ̃ɑ bunɑnɑrun sɔ̃nɑ hɑnduniɑn gɑ̃ɑnu kpuro kun mɑɑ mɑn sɑ̃ɑwɛ gɑ̃ɑnu, mɛyɑ nu ǹ mɑɑ mɑn gɑwɑmɔ. 15 Bɑngo kɑ bɑngo sɑriru yen gɑɑ kun sɑ̃ɑ gɑ̃ɑnu. Ye n sɑ̃ɑ gɑ̃ɑnu, yeyɑ ɑ n sɑ̃ɑ tɑkɑ koorɑ kpɑɑ. 16 Be bɑ tɑkɑ koorɑ kpɑɑn woodɑ yeni swĩi, ɑlɑfiɑ kɑ durom mu n kɑ bu wɑ̃ɑ kɑ Gusunɔn tɔmbu kpuro.
17 Sɑɑ gisɔn di goo u ku mɑɑ mɑn wɑhɑlɑ ko domi nɑ boo bori mɔ nɛn wɑsi sɔɔ, yi nɑ wɑ Yesun sɔ̃.
18 Nɛgibu, bɛsɛn Yinni Yesu Kirisin durom mu n wɑ̃ɑ kɑ bɛɛ. Ami._