TIRE TE PƆLU
U FILIPIGIBU KUA
1
Tɔbiribu
1 Bɛɛ Yesu Kirisigibu bɛɛ be i wɑ̃ɑ Filipiɔ, kɑ sere bɛɛn yigbɛ tɔnwerobu kɑ bɛɛn yigbɛ sɔm kowobu, nɛ Pɔlu kɑ Timɔte, bɛsɛ Yesu Kirisin yobu, sɑ bɛɛ tɔburɑ. 2 Gusunɔ bɛsɛn Bɑɑbɑ kɑ Yinni Yesu Kirisi bu bɛɛ durom kuɑ kpɑ bu bɛɛ ɑlɑfiɑ kɛ̃.
Pɔlu u Filipigibu
kɑnɑru kuɑmmɛ
3 Nɛ Pɔlu, nɑ rɑ Gusunɔ nɛn Yinni siɑre mɛ̀n nɔɔ nɑ bɛɛ yɑɑyɑ. 4 Sɑɑ bɑɑyere nɑ̀ n kɑnɑru mɔ̀ bɛɛ kpuron sɔ̃, nɑ rɑ tu kowɑ kɑ nuku dobu, 5 yèn sɔ̃ i mɑn somi nɑ kɑ Lɑbɑɑri geɑ nɔɔsiɑ sɑɑ tɔ̃ɔ gbiikirun di sere kɑ gisɔ. 6 Nɑ yeni yɛ̃ kɑm kɑm, Gusunɔ wi u sɔm gee te toruɑ bɛɛ sɔɔ u ko n tu mɔ̀ sere u kɑ tu dɑkurɑ Yesu Kirisin tɔ̃ru sɔɔ. 7 N kɑ mɑn dɛnde nɑ n bɛɛn lɑɑkɑri mɔ mɛsum bɛɛ be i bɔnu mɔ durom mɛ sɔɔ mɛ Gusunɔ u mɑn kuɑ. Domi bɛɛ kpuron kĩrɑ mɑn nɛni, bɑɑ nɑ̀ n wɑ̃ɑ pirisɔm sɔɔ ǹ kun mɛ nɑ̀ n tii mɔ nɑ kɑ Lɑbɑɑri geɑ yinɑmɔ nɑ ye tɑ̃sisiɑmɔ. 8 Gusunɔwɑ sɑ̃ɑ nɛn seedɑgii mɑ nɑ bɛɛ kpuro kĩwɑ nge mɛ Yesu Kirisin kĩrɑ sɑ̃ɑ.
9 Ye nɑ bikiɑmɔ nɛn kɑnɑru sɔɔ, yerɑ bɛɛn kĩru tɑ n sosimɔ tɑ n dɔɔ, kpɑ i n Gusunɔ giɑmɔ kpɑ i n sɑ̃ɑ bwisi geegibu, 10 i kɑ kpĩ i gɑ̃ɑ geenu tubu. Nge mɛyɑ i ko n dɛɛre, kpɑ i kun tɑɑrɛ gɑɑ mɔ dɔmɑ te Kirisi koo wurɑmɑ. 11 Kookoo gee si su wee sɑɑ Yesu Kirisin min di, siyɑ su ko n mɑɑ yibɑ bɛɛn wɑ̃ɑru sɔɔ, kpɑ su Gusunɔ bɛɛrɛ wɛ̃ kpɑ su de bu nùn siɑrɑ.
Kirisiwɑ wɑ̃ɑru
12 Nɛgibu, nɑ kĩ i n yɛ̃ mɑ ye n mɑn deemɑ n gɔsiɑwɑ Lɑbɑɑri geɑn wuswɑɑ dɑɑbu. 13 Nge mɛyɑ sinɑ kpɑɑ kɔ̃sobu kɑ be bɑ tie kpuro bɑ yɛ̃ mɑ Kirisin sɔ̃nɑ nɑ wɑ̃ɑ pirisɔm sɔɔ. 14 Bɛsɛgibu dɑbiru, ye bɑ mɑn wɑ pirisɔm sɔɔ bɑ Yinni nɑɑnɛ kuɑ mɑ bɑ wɔrugɔru sosi bɑ Gusunɔn gɑri nɔɔsiɑmɔ kɑ toro sindu.
15 Geemɑ, gɑbɑ Kirisin gɑri wɑɑsu mɔ̀ nisinu kɑ kinɛnun sɔ̃, ɑdɑmɑ gɑbɑ mɔ̀ kĩrun sɔ̃. 16 Beni bɑ mɔ̀ kɑ kĩru domi bɑ yɛ̃ mɑ nɛn sɔmburɑ n kɑ Lɑbɑɑri geɑ sunɑ. 17 Beɔnɔ bɑ Kirisin gɑri wɑɑsu mɔ̀, n ǹ mɔ kɑ nuku tiɑ, ɑdɑmɑ kɑ kinɛnɑ. Bɑ tɑmɑɑ bɑ koo mɑn nuku sɑnkirɑnu sosiɑwɑ pirisɔm sɔɔ.
18 Yɑ ǹ tɑɑrɛ ben bwisikunu nù n sɑ̃ɑ kɔ̃sunu ǹ kun mɛ geenu. Bɑɑ ǹ n mɛren nɑ, Kirisin gɑri yi gesi kpɑrɑrɑ. Nɛn nukurɑ yen dobu do, tɑ ko n mɑɑ dorɑmɔwɑ tɑ n dɔɔ. 19 Domi nɑ yɛ̃ mɑ yenin wii goberɑ sɑ̃ɑwɑ nɛn fɑɑbɑ bɛɛn kɑnɑrun sɑɑbu, kɑ mɑɑ Yesu Kirisin Hunden somiru. 20 Domi nɑ mɑrɑ nɑ mɑɑ yĩiyɔ kɑm kɑm mɑ nɑ ǹ gɑ̃ɑnun sekuru wɑsi. Nɑ̀ n wɑ̃ɑ hunde sɔɔ, ǹ kun mɛ nɑ̀ n gu nɑ toro sindu mɔ mɑ nɛn kookoosu su koo Kirisi bɛɛrɛ wɛ̃ nge bɑɑdommɑ. 21 Domi nɛn mi, nɑ̀ n wɑ̃ɑ, Kirisin wɑ̃ɑrɑ nɑ wɑ̃ɑ, nɑ̀ n mɑɑ gu, gɔɔ mɑn sɑ̃ɑwɛ ɑre. 22 Nɑ̀ n wɑ̃ɑ wɑ̃ɑru sɔɔ kon kpĩ n sɔm geeru ko. Yen sɔ̃, nɑ ǹ yɛ̃ ye kon gɔsi. 23 Bɑ mɑn gɑwe berɑ yiru kpuro. Nɑ kĩ n doonɑ kpɑ nɑ n wɑ̃ɑ Kirisin mi, domi mi n burɑm bo. 24 Adɑmɑ bɛɛn ɑrufɑɑnin sɔ̃ n weenɛ nɑ n wɑ̃ɑ wɑ̃ɑru sɔɔ. 25 Yerɑ nɑ giɑ, yen sɔ̃nɑ nɑ yɛ̃ mɑ kon sinɑ kpɑ nɑ n wɑ̃ɑ kɑ bɛɛ kpuro kpɑ i wuswɑɑ dɑ kɑ nuku dobu nɑɑnɛ dokebu sɔɔ. 26 Nge mɛyɑ sɑnɑm mɛ ko nɑ n kpɑm wɑ̃ɑ bɛɛn suunu sɔɔ i ko i kpĩ i woo kɑnɑ sɑɑ nɛn min di bɛɛ kɑ Yesu Kirisin wɑ̃ɑsinɑɑn sɔ̃.
27 I gesi de bɛɛn sɑnu sɑnusu su n kɑ Kirisin Lɑbɑɑri geɑ weenɛ. Nge mɛyɑ, nɑ̀ n nɑ bɛɛn mi, ǹ kun mɛ nɑ̀ kun nɛ, kon bɛɛn bɑɑru nɔ mɑ i yɔ̃ dim dim i nɔɔ nɛ, mɑ i sunɑmɔ sɑnnu kɑ gɔ̃ru teu nɑɑnɛ dokebun sɔ̃ bi bu wee Lɑbɑɑri geɑn di. 28 I ku de bɛɛn yibɛrɛbɑ bu kɑ bɛɛ gɑ̃ɑnu nɑre. Yeyɑ yɑ koo bu sɔ̃ɔsi mɑ bɑ kɑm kobu dɔɔwɑ, yɑ koo mɑɑ bɛɛ sɔ̃ɔsi mɑ i wɑ̃ɑ fɑɑbɑn swɑɑ sɔɔ. Ye kpurowɑ yɑ wee sɑɑ Gusunɔn min di. 29 Domi Gusunɔ u bɛɛ durom kuɑ i n kɑ Kirisi nɑɑnɛ sɑ̃ɑ. N ǹ mɛ tɔnɑ, u mɑɑ bɛɛ durom kuɑwɑ i n kɑ nɔni swɑ̃ɑru wɑɑmɔ win sɔ̃, 30 kpɑ i n kɑ mɑn tɑɑ tee bi mɔ̀ bi i gɑsɔ wɑ nɑ mɔ̀. Sere kɑ tɛ̃, biyɑ nɑ mɔ̀, nge mɛ i yɛ̃.