5
Wɑ̃ɑru yɑm bururɑm sɔɔ
1 Tɛ̃, yèn sɔ̃ i sɑ̃ɑ bii be Gusunɔ u kĩ, i hɑniɑ koowo i n kɑ mɔ̀ nge wi. 2 I de bɛɛn wɑ̃ɑrun kookoosu su n kĩru mɔ nge mɛ Kirisi u sun kĩɑ mɑ u win wɑ̃ɑru wɛ̃ bɛsɛn sɔ̃ nge yɑ̃ku nubu durorugiru te tɑ Gusunɔ dore.
3 Yèn sɔ̃ i sɑ̃ɑ nɑɑnɛ dokeobu i ku de kɔ̃ɔ mɛnnɑbu tɑntɑnɑru sɔɔ ǹ kun mɛ dɑɑ disinugiɑ ǹ kun mɛ binɛ, yen gɑɑ yu nɔɔrɑ bɛɛn suunu sɔɔ. 4 I ku mɑɑ de sekurun gɑri ǹ kun mɛ wiirɑ gɑri ǹ kun mɛ gɑri kɑnkɑm yu yɑri bɛɛn nɔɔ sɔɔn di domi n ǹ kɑ bɛɛ weenɛ, ɑdɑmɑ i de i n Gusunɔ tɑkɑru mɔ̀. 5 I de i n yɛ̃ kɑm kɑm mɑ be bɑ kɔ̃ɔ mɛnnɑmɔ tɑntɑnɑru sɔɔ, ǹ kun mɛ dɑɑ disinugiɑgibu, ben goo kun bɔnu wɑsi Gusunɔ kɑ Kirisin bɑndu sɔɔ. Mɛyɑ mɑɑ binɛgii, domi binɛgii sɑ̃ɑwɑ nge bũu sɑ̃ɔ.
6 I ku rɑ de goo u kɑ bɛɛ gɑri diri swɑɑ nim wiɑ, domi yenin sɔ̃nɑ Gusunɔn mɔru wee ben wirɔ be bɑ ǹ nùn mɛm nɔɔwɑmmɛ. 7 Yen sɔ̃, i ku de i n gɑ̃ɑnu mɔɔsinɛ bɛɛ kɑ tɔn ben bweseru. 8 Yellu bɛɛn tii i rɑɑ wɑ̃ɑwɑ yɑm wɔ̃kuru sɔɔ. Adɑmɑ tɛ̃, bɛɛ kɑ Yinnin gbinnɑɑn sɔ̃, i wɑ̃ɑ yɑm bururɑm sɔɔ. Ǹ n mɛn nɑ, i de i n sĩimɔ nge yɑm bururɑmgibu. 9 Domi wi u sĩimɔ yɑm bururɑm sɔɔ wiyɑ rɑ n tɔn geerun kom bwese bwesekɑ mɔ̀ kɑ geɑn kobu kɑ mɑɑ gem gerubu. 10 I kookɑri koowo i kɑ giɑ ye yɑ koo Yinni wɛ̃re. 11 I ku tii kpɛ̃ɛ kookoo kɑmgisu sɔɔ si tɔmbɑ mɔ̀ yɑm wɔ̃kuru sɔɔ. Adɑmɑ i su terɑsio yɑm bururɑm sɔɔ. 12 Seku bɑkɑrɑ ì n nuɑ ye tɔn be, bɑ mɔ̀ ɑsiri sɔɔ. 13 Adɑmɑ kookoo si, sù n terɑ yɑm bururɑm sɔɔ, su koo sɔ̃ɔsirɑ kpɑsɑsɑ. 14 Geemɑ gɑ̃ɑnu bɑɑnire ni nu sɔ̃ɔsirɑ kpɑsɑsɑ, nu rɑ kowɑ yɑm bururɑm. Yen sɔ̃nɑ Gusunɔn gɑri nɛɛ,
<<A yɑndo wunɛ wi ɑ do.
A seewo gɔrin di.
Kpɑ Kirisi u nun yɑm bururɑsiɑ.>>
15 Ǹ n mɛn nɑ, i bɛɛn sɑnu sɑnusu lɑɑkɑri koowo. I ku de i n sĩimɔ nge be bɑ ku rɑ bwisiku, ɑdɑmɑ i n sĩimɔ kɑ lɑɑkɑri. 16 Sɑɑ ye i mɔ kpuro, i ye dendio kɑ lɑɑkɑri domi sɑɑ yeni, sɑɑ kɔ̃sɑ. 17 Yen sɔ̃ tɛ̃, i ku de i n sɑ̃ɑ be bɑ ku rɑ bwisiku, ɑdɑmɑ i hɑniɑ koowo i kɑ giɑ ye Yinni u kĩ i ko.
18 I ku de tɑm mu bɛɛ go, domi mi sɔɔrɑ dɑɑ bɛrɛtɛkɛ wɑ̃ɑ, ɑdɑmɑ i de Hunde Dɛɛro u n bɛɛ yibɑ. 19 I de womu si i kɑ Gusunɔ siɑrɑmɔ su n wɑ̃ɑ bɛɛn fɑɑgi sɔɔ, i n Yinni tɔmɑmɔ kɑ siɑrɑbun womusu bɛɛn gɔ̃ruɔ. 20 I n Gusunɔ Bɑɑbɑ tɑkɑru mɔ̀ sɑɑ bɑɑyere gɑ̃ɑnu kpuron sɔ̃ kɑ bɛsɛn Yinni Yesu Kirisin yĩsiru.
Durɔbu kɑ ben kurɔbun
wɑ̃ɑsinɑɑ
21 I wiru kpĩiyɑnɔ yèn sɔ̃ i Kirisi bɛɛrɛ wɛ̃ɛmɔ.
22 Bɛɛ kurɔbu, i bɛɛn durɔbu wiru kpĩiyɔ nge mɛ i ko Yinni kuɑ. 23 Domi durɔwɑ sɑ̃ɑ win kurɔn wirugii nge mɛ Kirisi u sɑ̃ɑ win yigbɛrun wirugii. Yigbɛ te, tɑ sɑ̃ɑ win wɑsi, wiyɑ mɑɑ sɑ̃ɑ ten Fɑɑbɑ kowo. 24 Nge mɛ yigbɛ te, tɑ Kirisi wiru kpĩiyɛ, nge mɛyɑ n weenɛ kurɔbu bɑ n ben durɔbu wiru kpĩiyɛ gɑ̃ɑnu bɑɑnire sɔɔ.
25 Bɛɛ mɑɑ durɔbu i bɛɛn kurɔbu kĩɔ, nge mɛ Kirisi u win yigbɛru kĩɑ mɑ u win wɑ̃ɑru wɛ̃ ten sɔ̃. 26 U kuɑ mɛ, u kɑ tu dɛɛrɑsiɑ kɑ win gɑri yi yi sɑ̃ɑ nge nim, kpɑ u kɑ tu tii yiiyɑ. 27 Domi u kĩ tu nɑ win wuswɑɑɔ kɑ ten bɛɛrɛ kpuro, tɑ kun disinu gɑnu mɔ, ǹ kun mɛ suriki surikinu, ǹ kun mɛ serere gɑɑ. U kĩwɑ tɑ n dɛɛre kpɑ tɑ kun tɑɑrɛ gɑɑ mɔ. 28 Mɛyɑ n weenɛ durɔbu bu ben kurɔbu kĩɑ nge mɛ bɑ ben tiin wɑsi kĩ. Wi u win kurɔ kĩ, u win tii kĩwɑ. 29 Goo sɑri wi u win tiin wɑsi tusɑ, u rɑ yi diisiewɑ kpɑ u yi nɔɔri nge mɛ Kirisi u mɔ̀ win yigbɛrun sɔ̃. 30 Domi sɑ sɑ̃ɑwɑ win wɑsin doo dookɑ. 31 Nge mɛ Gusunɔn gɑri yi gerumɔ yi nɛɛ, <<Yen sɔ̃nɑ durɔ u koo win tundo kɑ win mɛro deri, kpɑ wi kɑ win kurɔ bɑ n mɑninɛ kpɑ be yiru kpuro bu ko wɑsi tee.>> 32 Gɑri yi, yi sɑ̃ɑwɑ gɑri giri yi yi rɑɑ beruɑ, ɑdɑmɑ Kirisi kɑ win yigbɛrun wɑ̃ɑsinɑɑwɑ nɑ kɑ yɑ̃. 33 Kɑ mɛ, i de durɔ bɑɑwure u n win kurɔ kĩ nge win tii, kpɑ kurɔ bɑɑwure u n win durɔn bɛɛrɛ yɛ̃.