6
Bibu kɑ ben mɔwɔbu
1 Bɛɛ bibu i bɛɛn mɔwɔbu mɛm nɔɔwɔ nge mɛ Yinni u kĩ domi yeyɑ yɑ wɑ̃. 2 Woodɑ gbiikɑɑ ye yɑ nɔɔ mwɛɛru mɔ wee. <<A wunɛn tundo kɑ wunɛn mɛro bɛɛrɛ wɛ̃ɛyɔ, 3 kpɑ ɑ n kɑ nuku dobu mɔ, kpɑ wunɛn hunde yu dɑkɑɑ dɑ hɑnduniɑ mi.>>
4 Bɛɛ tundobu i ku bɛɛn bibu mɔru bɑrɑsiɑ, ɑdɑmɑ i bu nɛnuɔ kɑ nɔni dokebu kpɑ i bu Yinnin gɑri keu ko.
Yobu kɑ ben yinnibu
5 Bɛɛ yobu i bɛɛn yinnibu mɛm nɔɔwɔ hɑnduniɑ mi, kɑ nɑsiɑru kɑ diiribu n kun kɑ murɑfitiru, kpɑ n sɑ̃ɑ nge Kirisiwɑ i sɑ̃ɑmɔ. 6 N ǹ mɔ sɑnɑm mɛ bɑ bɛɛ yɔ̃re tɔnɑ, i kɑ bu tɔn geeru sɔ̃ɔsi. I Gusunɔn kĩru koowo kɑ bɛɛn gɔ̃ru kpuro nge Kirisin yobu. 7 I bu sɑ̃ɑwɔ kɑ hɑniɑ kpɑ n sɑ̃ɑ nge Yinniwɑ i kuɑmmɛ, n ǹ mɔ tɔnu tɔnɑ. 8 I n yɛ̃ mɑ Yinni u koo bɑɑwure win sɔm gee ni u kuɑn ɑre kɔsiɑ, bɑɑ ǹ n yoon nɑ, ǹ kun mɛ tii mɔwɔ.
9 Yen sɔ̃, bɛɛ yinnibu i mɑɑ bɛɛn yobu kuo nge mɛ, i ku bu dɑm dɔre. I n yɛ̃ mɑ bɛɛ kɑ be, Yinni turowɑ i mɔ wɔllɔ wìn mi goo kun goo.
Nɑɑnɛ dokeon tɑbu yɑ̃nu
10 Ye yɑ tie nɑ kĩ n bɛɛ sɔ̃ wee. Bɛɛ kɑ Yinnin gbinnɑɑ sɔɔ i de win dɑm bɑkɑm mu bɛɛ dɑm kɛ̃. 11 I tɑbu yɑ̃nu kpuro sebuo ni Gusunɔ u bɛɛ wɛ̃ɛmɔ, kpɑ i kɑ kpĩ i yɔ̃rɑ dim dim i Setɑm bwisi yinɑ. 12 Domi n ǹ mɔ tɔmbɑ sɑ kɑ gɑbirinɑmɔ, mɑ n kun mɔ kɑ wɔllun wirugibu kɑ yiikogibu, kɑ yɑm wɔ̃kurun sinɑ bibu, kɑ mɑɑ wom dirum siini kɔ̃si. 13 Yen sɔ̃, i Gusunɔn tɑbu yɑ̃nu kpuro suo i sebe kpɑ i kɑ kpĩ i kɑ tii yinɑ wɑhɑlɑn tɔ̃ru sɔɔ, kpɑ i yɔ̃rɑ dim dim ye kpuron biru.
14 Ǹ n mɛn nɑ, i seewo i yɔ̃rɑ dim dim kpɑ i n gem sɛ̃ke bɛɛn pɔrɑɔ nge kpɑkɑ, kpɑ i n kookoo geesu sebuɑ nge tɑrɑkpe. 15 I de ɑlɑfiɑn Lɑbɑɑri Geɑ yɑ n sɑ̃ɑ nge bɛɛn bɑrɑnu ni i ko kɑ tɑ̃si. 16 Yeni kpuron biru i nɑɑnɛ dokebu nɛnuɔ nge tɛrɛru kpɑ i kɑ kpĩ i tɔn kɔ̃son sɛ̃ɛ dɔ̃ɔginu gbɑrɑ. 17 I fɑɑbɑ mɔɔ nge sii furɔ kɔkɔru, kɑ mɑɑ Gusunɔn gɑri nge tɑkobi ye Hunde u bɛɛ wɛ̃ɛmɔ. 18 I n kɑnɑru mɔ̀ sɑɑ bɑɑyere kpɑ i n Gusunɔn somiru bikiɑmɔ nge mɛ Hunde Dɛɛro u bɛɛ sɔ̃ɔsimɔ. I seewo i yɔ̃rɑ kpɑ i n tɛmɑnɛ, kpɑ i n kɑnɑru mɔ̀ nɑɑnɛ dokeobu kpuron sɔ̃. 19 I mɑɑ kɑnɑru koowo nɛn sɔ̃, nɑ̀ n nɔɔ wukiɑ, n gɑri wɑ n gere n kɑ Lɑbɑɑri Geɑn gɑri yi yi rɑɑ beruɑ nɔɔsiɑ kɑ toro sindu. 20 Nɑ sɑ̃ɑwɑ gɑri yin gɔro bɑɑ mɛ nɑ tɛ̃ wɑ̃ɑ pirisɔm sɔɔ. Yen sɔ̃, i kɑnɑru koowo kpɑ n kpĩ n gɑri yi kpɑrɑ kɑ toro sindu nge mɛ n weenɛ.
Nɔɔ kɑnɑ tɔbiribu
21 Bɛsɛn kĩnɑsi Tisiki wi u sɑ̃ɑ sɔm kowo nɑɑnɛgii Yinnin sɔmburu sɔɔ, u koo bɛɛ nɛn lɑbɑɑri kpuro sɔ̃ kpɑ i n kɑ yɛ̃ nge mɛ nɑ kɑ wɑ̃ɑ. 22 Yen sɔ̃nɑ nɑ bɛɛ nùn gɔriɑmmɛ u kɑ bɛɛ sɔ̃ nge mɛ sɑ kɑ wɑ̃ɑ u kɑ bɛɛn gɔ̃rusu yɛmiɑsiɑ.