4
Kirisin wɑsin nɔɔ tiɑ
1 Ǹ n mɛn nɑ, i n sĩimɔ nge mɛ n weenɛ be Gusunɔ u sokɑ bɑ n sĩimɔ. Nɛ Pɔlu, nɛ wi nɑ wɑ̃ɑ pirisɔm sɔɔ yèn sɔ̃ nɑ Yinnin wɑ̃ɑru wɑ̃ɑ, nɛnɑ nɑ bɛɛ yeni kɑnɑmɔ. 2 I de i n sĩimɔ kɑ tii kɑwɑbu, kɑ dɑɑ duudwiɑ, kɑ suuru, kpɑ i n kĩru sɔ̃ɔsinɑmɔ kɑ tɛmɑnɑbu. 3 I hɑniɑ koowo i n kɑ nɔɔ tiɑ sɑ̃ɑ ye yɑ wee Hunde Dɛɛron min di kpɑ i n gbinnɛ bɔri yɛndu sɔɔ. 4 Sɑ Hunde turo mwɑ mɑ sɑ kuɑ wɑsi tee. Nge mɛyɑ mɑɑ yĩiyɔ teebɑ sɑ mɔ yèn sɔ̃ Gusunɔ u sun sokɑ. 5 Yinni turowɑ sɑ mɔ kɑ nɑɑnɛ doke teebu kɑ mɑɑ bɑtɛmu tiɑ. 6 Gusunɔ turowɑ wɑ̃ɑ wi u sɑ̃ɑ bɑɑwure kpuron Bɑɑbɑ. Wiyɑ kpuron sunɔ, wiyɑ sɔmburu mɔ̀ tɔmbu kpuron min di, u mɑɑ wɑ̃ɑ bɑɑwure kpuro sɔɔ.
<<Sɑnɑm mɛ u yɔɔwɑ wɔllɔ, u kɑ yobu dɑ.
Mɑ u tɔmbu kɛ̃nu bɔnu kuɑ.>>
9 Tɛ̃, mbɑ <<u yɔɔwɑ wɔllɔn>> tubusiɑnu. Yen tubusiɑnɑ, u rɑɑ sɑrɑmɑ wɔllun di u duɑ sere tem sɔɔwɔ. 10 Ǹ n mɛn nɑ, wi u sɑrɑmɑ wiyɑ mɑɑ yɔɔwɑ sere Gusunɔ wɔllɔ kpɑ u n wɑ̃ɑ bɑɑmɑ. 11 Wiyɑ u gɑbu gɔsɑ bu kɑ ko gɔrobu, gɑbu sɔmɔbu, gɑbu wɑɑsu kowobu, gɑbu Yesun yigbɛrun wirugibu, gɑbu keu koosiobu. 12 U bu gɔsɑ bu kɑ nɑɑnɛ dokeobu sɔɔru ko win sɔmburun sɔ̃, kpɑ bu kɑ Yesun yigbɛru te tɑ sɑ̃ɑ win wɑsi tɑ̃sisiɑ. 13 Nge mɛyɑ bɛsɛ kpuro sɑ ko kɑ giɑ mɑ gɑ̃ɑ teenɑ sɑ nɑɑnɛ doke, sɑ mɑɑ gɑ̃ɑ teenu giɑ Gusunɔn Bii sɔɔ, kpɑ su ko tɔn girobu nge mɛ Kirisin tɔn girorɑ nɛ. 14 Sɑ ǹ ko sɑ n mɑɑ sɑ̃ɑ nge bibu be bɑ koo kɑ sɔ̃ɔsi kpɑɑru bɑɑtere bɔrikiɑ nge woo gunɑ, ǹ kun mɛ be bɑ nɔni wɔ̃kumɔ mɑ bɑ bu swɑɑ nim wiɑmɔ kɑ bwisi. 15 Adɑmɑ sɑ n gem kpɑrɑmɔ kɑ kĩru kpɑ su kpɛ̃ɑ gɑ̃ɑnu kpuro sɔɔ su kɑ Kirisi kpɑ̃ɑru turi wi u sɑ̃ɑ wiru. 16 Win miyɑ bɛsɛ be sɑ sɑ̃ɑ win wɑsin doo dookɑ kpuro sɑ sɔrisinɛ, mɑ wɑsi kpuro yi swɛɛnɛ kɑ yin gbin gbinkɑ. Tɛ̃, gbindu bɑɑtere tɑ̀ n sɔmburu mɔ̀ nge mɛ n weenɛ, wɑsi kpuro rɑ n kpɛ̃ɑmɔwɑ yi n sosimɔ kɑ kĩru.
Wɑ̃ɑ kpɑɑru Kirisi sɔɔ
17 Wee ye nɑ bɛɛ sɔ̃ɔmɔ kɑ Yinnin yĩsiru. I ku mɑɑ de i n sĩimɔ nge tɔn tukobu be bɑ ben bwisiku kɑmginu swĩi. 18 Bɑ yɑm biɑ ben lɑɑkɑri sɔɔ. Bɑ ǹ wɑ̃ɑ te Gusunɔ u wɛ̃ɛmɔ yɛ̃, ben yɛ̃ru sɑriru kɑ ben gɔ̃ru bɔbunun sɔ̃. 19 Bɑ ǹ mɑɑ sekuru gɑru mɔ, bɑ ben tii yɔ̃susiwɑ torɑru sɔɔ mɑm mɑm bu kɑ dɑɑ disinugiɑ kpuro ko kɑ binɛ.
20 Adɑmɑ bɛɛ, n ǹ mɛ, i giɑ Kirisin min di. 21 Geemɑ, i win gɑri nɔɔre kɑm kɑm, mɑ bɑ bɛɛ gem giɑsiɑ mɛ mu wɑ̃ɑ Yesu sɔɔ. 22 Ye i giɑ, yerɑ i bɛɛn dɑɑ gurɑ pweto ye yɑ sɑ̃ɑ bɛɛn gɑsɔn wɑ̃ɑru, ye binɛ kɑnkɑm yɑ nɔni wɔ̃kuɑ yɑ kɑ kɑm kobu dɔɔ. 23 Kpɑ i n gɔ̃ru kpɑɑsu kɑ bwisiku kpɑɑnu mɔ mɑm mɑm, 24 kpɑ i dɑɑ kpɑɑ sebe ye yɑ kɑ Gusunɔgiɑ weenɛ mɑ yɑ sɔ̃ɔsirɑmɔ wɑ̃ɑ geeru sɔɔ te tɑ dɛɛre mɑ tɑ wee sɑɑ gem gɑrin min di.
25 Yen sɔ̃, i ku mɑɑ weesu ko. I de bɑɑwure u n dɑ win winsim gem sɔ̃ domi sɑ sɑ̃ɑwɑ wɑsi teen doo dookɑ. 26 Bɑɑ ì n mɔru bɑrɑ, i ku de yu bɛɛ torɑsiɑ, i ku mɑɑ de yɑ n bɛɛ wɑ̃ɑsi sere sɔ̃ɔ u kɑ du. 27 I ku rɑ de Setɑm u nɑɑ swee yeru wɑ. 28 Wi u rɑ rɑɑ gbɛni u ku mɑɑ gbɛni ɑdɑmɑ u doo u kɑ win nɔmɑ sɔm geeru ko kpɑ u n gɑ̃ɑnu mɔ u kɑ sɑ̃ɑrobu somi. 29 I ku de gɑri kɔ̃si yi yɑri bɛɛn nɔɔ sɔɔn di, mɑ n kun mɔ gɑri gee yi yi somiru mɔ kpɑ yi n sɑ̃ɑ ɑrufɑɑnigii be bɑ swɑɑ dɑkin mi. 30 I ku Gusunɔn Hunde Dɛɛro nuki sɑnku, domi Hunde wi, u sɑ̃ɑwɑ Gusunɔn yĩreru bɛɛ sɔɔ te tɑ sɔ̃ɔsimɔ mɑ Gusunɔ u koo sun yɑkiɑ mɑm mɑm. 31 I ku yibɛrɛ tɛɛru yi gɔ̃ruɔ, kɑ mɑɑ mɔru kɑ nuku gbisibu. I ku mɑɑ wɔkisinɑ ǹ kun mɛ i wɔnnɑ, i nuku kɔ̃su kom bɑɑmɛre derio. 32 I durom kuɑnɔ kpɑ i n wɔnwɔndu mɔɔsinɛ. I suuru kuɑnɔ nge mɛ Gusunɔ u bɛɛ suuru kuɑ Kirisin sɔ̃.