Gɑlɑti 1

TIRE TE PƆLU

U GALATIGIBU KUA

Tɔbiribu

^1-5 Bɛɛ Yesun yigbɛnugibu, bɛɛ be i wɑ̃ɑ Gɑlɑtin temɔ, nɛ kɑ bɛsɛgibu kpuro be sɑ wɑ̃ɑ sɑnnu, sɑ bɛɛ tɔburɑ. Gusunɔ Bɑɑbɑ kɑ Yinni Yesu Kirisi bu bɛɛ durom kuɑ kpɑ bu bɛɛ ɑlɑfiɑ kɛ̃. Yesu Kirisi wi, u tii wɛ̃ bɛsɛn torɑnun sɔ̃ u kɑ sun wɔrɑ sɑɑ hɑnduniɑ kɔ̃sɑ yen nɔmɑn di, Gusunɔ bɛsɛn Bɑɑbɑn kĩru sɔɔ. Wiyɑ u yiiko mɔ sere kɑ bɑɑdommɑɔ. Ami.

Nɛnɑ Pɔlu. Yesu Kirisiwɑ u mɑn sokɑ n kɑ ko win gɔro, wi kɑ Gusunɔ Bɑɑbɑ, wi u nùn seeyɑ gɔrin di. N ǹ mɔ tɔmbɑ bɑ mɑn sokɑ, nɛn sokurɑ kun nɛ sɑɑ tɔnu goon min di.

Lɑbɑɑri geɑ gɑɑ mɑɑ sɑri

⁶ N mɑn biti kuɑ, wee, i yɛ̃ro derimɔ fuuku fuuku wi u bɛɛ sokɑ kɑ Kirisin durom, mɑ i kĩ i Lɑbɑɑri geɑ gɑɑ swĩi. ⁷ Sɑ̀ n gem gerumɔ, Lɑbɑɑri geɑ gɑɑ mɑɑ sɑri. Gɑbɑ gesi bɛɛn lɑɑkɑri burisinɑmɔwɑ, mɑ bɑ kĩ bu Kirisin Lɑbɑɑri geɑ gɔsiɑ. ⁸ Adɑmɑ bɑɑ bɛsɛn tii, ǹ kun mɛ gɔrɑdo wi u nɑ wɔllun di, ù n bɛɛ Lɑbɑɑri geɑ tukɑ wɑɑsu kuɑ, ye yɑ ǹ sɑ̃ɑ ye sɑ bɛɛ sɔ̃ɔwɑ bu nùn bɔ̃rusio. ⁹ Sɑ rɑɑ geruɑ, nɑ mɑɑ wure nɑ gerumɔ, goo ù n bɛɛ gɑri tuki wɑɑsu kuɑ yi yi ǹ sɑ̃ɑ yi i mwɑ kɔ, bu nùn bɔ̃rusio.

¹⁰ Nɑ tɔnun siɑrɑbu kɑsu kɑ gɑri yini? Aɑwo, Gusunɔn siɑrɑbɑ nɑ kĩ. Nɑ kookɑri mɔ̀ n kɑ ko ye n koo tɔmbu dore ro? Aɑwo. Nɑ̀ n kĩ n ko sere kɑ tɛ̃ ye n tɔmbu doremɔ, nɑ ǹ ko nɑ n sɑ̃ɑ Kirisin yoo.

Nge mɛ Pɔlu u kɑ kuɑ gɔro

¹¹ Nɛgibu, nɑ bɛɛ sɔ̃ɔmɔ mɑ Lɑbɑɑri geɑ ye nɑ kpɑrɑmɔ yɑ ǹ sɑ̃ɑ tɔnugiɑ. ¹² Nɑ ǹ ye mwɛ tɔnun min di, goo kun mɑɑ mɑn ye keu kue, Yesu Kirisiwɑ u mɑn ye sɔ̃ɔsi.

¹³ I nuɑ nge mɛ nɛn wɑ̃ɑrɑ rɑɑ sɑ̃ɑ sɑnɑm mɛ nɑ Gusunɔ sɑ̃ɑmɔ nge mɛ Yuubɑ bɑ rɑ ko. Nɑ rɑ n Gusunɔn yigbɛru nɔni sɔ̃ɔmɔ n bɑndɑ n kɑ tu kɑm koosiɑ. ¹⁴ Nɛn sikɑdobɑn komɑrun kĩrun sɔ̃nɑ nɑ nɛn Yuusi dɑbiru gbiiri Yuubɑn sɑ̃ɑru sɔɔ be bɑ sɑ̃ɑ nɛn sɑɑrɑbɑ.

¹⁵ Adɑmɑ Gusunɔ u mɑn gɔsɑ bɑ sere mɑn mɑrɑ mɑ u mɑn sokɑ win durom sɔɔ. ¹⁶ Mɑ sɑnɑm mɛ u gɔ̃ru doke u mɑn win Bii sɔ̃ɔsi kpɑ n kɑ tɔn tukobu win Lɑbɑɑri geɑ wɑɑsu kuɑ, nɑ ǹ de tɔmbu gɑbun mi bu kɑ mɑn bwisi kɛ̃. ¹⁷ Nɑ ǹ mɑɑ de Yerusɑlɛmuɔ n kɑ bu wɑ be bɑ gbiɑ bɑ kuɑ Yesun gɔrobu nɑ sere kuɑ gɔro. Adɑmɑ nɑ yɑnde dɑwɑ Dɑɑrububɑn tem sɔɔ. Min diyɑ nɑ mɑɑ wurɑ Dɑmɑsiɔ. ¹⁸ N tɛ n kuɑ wɔ̃ɔ itɑ nɑ sere Yerusɑlɛmu dɑ n kɑ Piɛɛ giɑ, mɑ nɑ sinɑ win mi sɔ̃ɔ wɔkurɑ nɔɔbu. ¹⁹ Nɑ ǹ mɑɑ gɔro goo wɑ mi, mɑ n kun mɔ Yɑkɔbu, Yinnin wɔnɔ.

²⁰ Ye nɑ yorumɔ, gemɑ. Gusunɔwɑ sɑ̃ɑ nɛn seedɑgii nɑ̀ n weesu mɔ̀.

²¹ Yen biru nɑ Sirin tem dɑ kɑ Silisin tem. ²² Sɑnɑm mɛ, Kirisin yigbɛ ni nu wɑ̃ɑ Yudeɑɔ nu ǹ ginɑ mɑn wɑɑre. ²³ Bɑ gesi nuɑ mɑ wi u rɑɑ bu nɔni sɔ̃ɔmɔ, u tɛ̃ Yesun fɑɑbɑn gɑri wɑɑsu mɔ̀, yi u rɑɑ kĩ u kɑm koosiɑ. ²⁴ Mɑ bɑ Gusunɔ siɑrɑ nɛn sɔ̃.