Pɔlu kɑ gɔro be bɑ tie
2
1 Wɔ̃ɔ wɔkurɑ nnɛn biru mɑ sɑ kpɑm wurɑ Yerusɑlɛmuɔ, nɛ kɑ Bɑɑnɑbɑsi. Sɑ mɑɑ Titu suɑ u kɑ sun dɑ. 2 Nɑ dɑ yèn sɔ̃ Gusunɔ u mɑn sɔ̃ɔsi mɑ n weenɛ n dɑ. Nɛ kɑ wirugibu tɔnɑwɑ sɑ mɛnnɑ, mɑ nɑ bu Lɑbɑɑri geɑn gɑri tubusiɑ yi nɑ rɑ tɔn tukobu wɑɑsu kue, domi nɑ ǹ kĩ nɛn sɔmburu te nɑ rɑɑ kuɑ, ǹ kun mɛ te nɑ mɔ̀ tɛ̃, tu kɑm ko. 3 Bɑɑ mɛ Titu nɛn kpɑɑsi u sɑ̃ɑ Gɛrɛki, bɑ ǹ nùn tilɑsi kue u kɑ bɑngo ko. 4 Adɑmɑ tɔmbu gɑbu be bɑ ǹ sɑ̃ɑ begibu kɑ gem, bɑ duɑ bɛsɛn wuurɔ mɑ bɑ kĩ bu nùn bɑngo ko. Bɑ nɑ gbɛnum nge kɔrumɔtɔ kowobu bu kɑ bɛsɛn tii mɔru mɛɛri te Kirisi Yesu u sun wɛ̃. Bɑ kĩwɑ su wure su ko yobu. 5 Adɑmɑ sɑ ǹ ben gɑri wure bɑɑ fiiko yèn sɔ̃ sɑ kĩ Lɑbɑɑri geɑn gem mu n wɑ̃ɑ bɛɛn suunu sɔɔ.
6 Mɑ be bɑ sɑ̃ɑre wirugibu, n ǹ mɑn gɑ̃ɑnu sɑ̃ɑ ye bɑ sɑ̃ɑ domi Gusunɔ kun tɔnun wuswɑɑ mɛɛrɑ. Wirugii be, bɑ ǹ mɑn gɑri gɛɛ sosie. 7 Adɑmɑ bɑ wɑ mɑ Gusunɔ u mɑn Lɑbɑɑri geɑ nɔmu sɔndiɑ tɔn tukobun sɔ̃ nge mɛ u Piɛɛ ye nɔmu sɔndiɑ Yuubɑn sɔ̃. 8 Domi wi u Piɛɛ dɑm wɛ̃ u kɑ ko gɔro Yuubɑn sɔ̃, wiyɑ mɑɑ mɑn dɑm wɛ̃ n kɑ ko gɔro tɔn tukobun sɔ̃. 9 Mɑ sɑnɑm mɛ Yɑkɔbu kɑ Piɛɛ kɑ Yohɑnu, be bɑ sɑ̃ɑ nge yigbɛrun gberebɑ, bɑ nɛn kɛ̃ru tubɑ te bɑ mɑn wɛ̃, bɑ wurɑ mɑ nɛ kɑ Bɑɑnɑbɑsi, sɑ kuɑ begibu. Bɑ mɑɑ wurɑ su dɑ tɔn tukobun mi, kpɑ be, bu mɑɑ dɑ Yuubɑn mi. 10 Adɑmɑ bɑ sun kɑnɑ su ben sɑ̃ɑrobu yɑɑyɑ. Nɑ mɑɑ kookɑri kuɑ nɑ kɑ kuɑ mɛ.
Pɔlu u Piɛɛ gerusi Antiɔsiɔ
11 Sɑnɑm mɛ Piɛɛ u nɑ Antiɔsiɔ nɑ nùn gerusi nɔni kɑ nɔni yèn sɔ̃ u tɑɑrɛ mɔ. 12 Gɑbu be Yɑkɔbu u gɔrɑ mi, bu sere tunumɑ, Piɛɛ u rɑ rɑɑ di kɑ tɔn tuko nɑɑnɛ dokeobu sɑnnu. Adɑmɑ ye tɔn be, bɑ tunumɑ bɑ kpɑ, u tii gɑwɑ mɑ u ǹ mɑɑ dimɔ kɑ be bɑngon woodɑn sɔ̃. 13 Mɑ Yuu gɑbɑ mɑɑ murɑfitiru kuɑ kɑ wi sɑnnu sere bɑ Bɑɑnɑbɑsin tii gɑwe ben murɑfiti te sɔɔ. 14 Ye nɑ wɑ mɑ bɑ ǹ sĩimɔ kɑ gɔ̃ru tiɑ Lɑbɑɑri geɑn gem sɔɔ, nɑ Piɛɛ sɔ̃ɔwɑ be kpuron wuswɑɑɔ nɑ nɛɛ, wunɛ Yuuwɑ mɑ ɑ mɔ̀ nge tɔn tuko, n ǹ mɔ nge Yuu. Ǹ n mɛn nɑ, ɑmɔnɑ ɑ kɑ tɔn tukobu gɑwɑmɔ bu ko nge Yuubɑ.
Yuubɑ kɑ tɔn tukobu
bɑ fɑɑbɑ mɔ nɑɑnɛ dokebun sɔ̃
15 Kɑ geemɑ, bɛsɛ Yuubɑrɑ, n ǹ mɔ tɔn tuko be bɑ sɑ̃ɑ durumgibu, domi Yuubɑrɑ bɑ sun mɑrɑ. 16 Kɑ mɛ, sɑ yɛ̃ mɑ tɔnu u koo gem wɑ Gusunɔn wuswɑɑɔ ù n Yesu Kirisi nɑɑnɛ doke, n ǹ mɔ kɑ woodɑ nɛnubu. Bɛsɛ mɑɑ, sɑ Yesu Kirisi nɑɑnɛ doke su kɑ gem wɑ Gusunɔn wuswɑɑɔ, n ǹ mɔ kɑ woodɑ nɛnubu. Domi goo sɑri wi Gusunɔ koo gem wɛ̃ yèn sɔ̃ u woodɑ mɛm nɔɔwɑ. 17 Tɛ̃ bɛsɛn tii sɑ̀ n sɔ̃ɔsirɑ torobu nge mɛ tɔn tukobu bɑ sɑ̃ɑ yèn sɔ̃ sɑ gem kɑsu sɑɑ Kirisin min di, ǹ n mɛn nɑ, Kirisin sɔmburɑ tɑ torɑru sosimɔ? Su ku wɑ mɛ. 18 Domi nɑ̀ n ye nɑ rɑɑ surɑ bɑnɑ, nɑ tii sɔ̃ɔsimɔ toro. 19 Adɑmɑ ǹ n woodɑn sɔ̃n nɑ, yɑ ǹ mɑɑ dɑm mɔ nɛn wɔllɔ, yen tiiwɑ yɑ mɑn go kpɑ nɑ n kɑ wɑ̃ɑru mɔ Gusunɔn wuswɑɑɔ. Bɑ mɑn kpɑre dɑ̃ru sɔɔ kɑ Kirisi sɑnnu. 20 Yen sɔ̃nɑ n ǹ mɑɑ mɔ nɛnɑ nɑ wɑsi, Kirisiwɑ u wɑ̃ɑru dimɔ nɛ sɔɔ. Mɑ wɑ̃ɑ te nɑ dimɔ tɛ̃, nɑ tu dimɔwɑ kɑ nɑɑnɛ dokebu Gusunɔn Bii sɔɔ wi u mɑn kĩɑ mɑ u win wɑ̃ɑru wɛ̃ nɛn sɔ̃. 21 Nɑ ǹ Gusunɔn durom kɑm koosiɑmɔ. Domi tɔnu ù n gem wɑɑmɔ Gusunɔn mi sɑɑ woodɑn di, Kirisin gɔɔ kuɑ kɑm.