15
Kirisin seebu gɔrin di
1 Nɛgibu nɑ bɛɛ Lɑbɑɑri geɑ ye yɑɑyɑsiɑmɔ ye nɑ rɑɑ bɛɛ nɔɔsiɑ mɑ i ye mwɑ, i mɑɑ yɔ̃ ye sɔɔ. 2 Yen min diyɑ i fɑɑbɑ wɑɑmɔ i n gɑri yi nɛni dim dim yi nɑ bɛɛ wɑɑsu kuɑ. Mɑ n kun mɛ, kɑmɑ i nɑɑnɛ doke.
3 Domi gɑri yi yi kpuro kere yiyɑ nɑ bɛɛ nɔmu sɔndiɑ yi nɛn tii nɑ mwɑ. Yiyɑ mini. Kirisi u gu bɛsɛn torɑnun sɔ̃ nge mɛ Gusunɔn gɑri gerumɔ. 4 Bɑ nùn sikɑ mɑ u seewɑ gɔrin di sɔ̃ɔ itɑse nge mɛ Gusunɔn gɑri gerumɔ. 5 U win tii Sefɑ sɔ̃ɔsi, yen biru wɔkurɑ yiru ye. 6 Yen biru u kurɑ mi win bwɑ̃ɑbɑ mɛnnɛ bèn geerɑ nɛɛrɑ wunɔbu (100) kere. Ben dɑbirɑ wɑsi kɑ tɛ̃, ɑdɑmɑ gɑbɑ gu. 7 Mɑ u mɑɑ win tii Yɑkɔbu sɔ̃ɔsi, yen biru gɔrobu kpuro.
8 Dɑ̃kuru u mɑɑ mɑn kure, nɛ wi nɑ sɑ̃ɑ nge wi bɑ mɑrɑ suru kun yibɑ. 9 Domi nɛnɑ nɑ piiburu bo gɔrobu sɔɔ. Nɑ ǹ weenɛ bu mɑn soku gɔro, domi nɑ Gusunɔn yigbɛru nɔni sɔ̃ɔwɑ. 10 Adɑmɑ kɑ Gusunɔn duromɑ nɑ kɑ sɑ̃ɑ mɛ nɑ sɑ̃ɑ tɛ̃, mɑ durom mɛ u mɑn kuɑ mu ǹ kue kɑm. Nɑ kookɑri kuɑ n gɔro be kpuro kere, ɑdɑmɑ n ǹ mɔ nɛn tiiwɑ nɑ kuɑ mɑ n kun mɔ Gusunɔn durom mɛ mu kɑ mɑn wɑ̃ɑ. 11 Ǹ n mɛn nɑ, gɑri tee yiyɑ sɑ wɑɑsu mɔ̀ nɛ kɑ be, tee yiyɑ i mɑɑ nɑɑnɛ doke.
Bɛsɛn seebu gɔrin di
12 Tɛ̃, bɑ̀ n Kirisin gɑri wɑɑsu kuɑ mɑ u seewɑ gɔrin di, ɑmɔnɑ bɛɛn gɑbɑ kɑ mɔ̀ gɔribɑ kun seemɔ. 13 Gɔribu bɑ̀ kun seemɔ, Kirisi kun mɑɑ seewe. 14 Kirisi ù kun seewen nɑ, bɛsɛn wɑɑsu kɑmɑ, bɛɛn nɑɑnɛ dokebu mɑɑ kɑmɑ. 15 Sɑ mɑɑ Gusunɔ seedɑ weesugiɑ diiyɑ sɑnɑm mɛ sɑ geruɑ mɑ u Kirisi seeyɑ gɔrin di, domi ǹ n sɑ̃ɑ gem mɑ gɔribɑ kun seemɔ, ǹ n mɛn nɑ, Gusunɔ kun mɑɑ Kirisi seeye. 16 Domi gɔribu bɑ̀ kun seemɔ Kirisi kun mɑɑ seewe. 17 Bɑ̀ kun mɑɑ Kirisi seeye bɛɛn nɑɑnɛ dokebu kɑmɑ, i mɑɑ wɑ̃ɑ bɛɛn torɑnu sɔɔ ginɑ. 18 Be bɑ mɑɑ Kirisi nɑɑnɛ doke bɑ kɑ gu bɑ kɑm kuɑwɑ. 19 Ǹ n wɑ̃ɑ teni tɔnɑn sɔ̃n nɑ sɑ Kirisi yĩiyɔ, sɑ sɑ̃ɑwɑ wɔnwɔndobu n tɔmbu kpuro kere.
20 Adɑmɑ tɛ̃, Kirisi u seewɑ gɔrin di u kuɑ gbiikoo be bɑ koo sen suunu sɔɔ. 21 Domi nge mɛ gɔɔ nɑ sɑɑ tɔnun min di, nge mɛyɑ gɔribun seebu mɑɑ nɑɑmɔ sɑɑ tɔnun min di. 22 Nge mɛ tɔmbu kpuro bɑ gbimɔ yèn sɔ̃ bɑ gbinnɛ kɑ Adɑmu, nge mɛyɑ bɑ koo kpuro seeyɑ yèn sɔ̃ bɑ gbinnɑ kɑ Kirisi. 23 Adɑmɑ bɑɑwure kɑ win wuurɑ. Gbiikɑɑ Kirisi, yen biru be bɑ sɑ̃ɑ wigibu win nɑɑrun sɑnɑm. 24 Yen biruwɑ hɑnduniɑn kpeerɑ koo nɑ. Sɑnɑm mɛyɑ Kirisi u koo wirugiru kɑ yiiko kɑ dɑm kpuro kɑm koosiɑ kpɑ u Gusunɔ Bɑɑbɑ bɑndu nɔmu sɔndiɑ. 25 Domi Kirisi u ǹ koo ko u kun bɑndu di sere Gusunɔ u kɑ nùn win yibɛrɛbɑ kpuro tɑɑreɑ. 26 Gɔɔwɑ sɑ̃ɑ wɛrɔ dɑ̃ɑko wi bɑ koo kɑm koosiɑ. 27 Domi bɑ yoruɑ bɑ nɛɛ, <<Bɑ derɑ u kuɑ gɑ̃ɑnu kpuron wirugii.>> Adɑmɑ sɑnɑm mɛ u geruɑ bɑ derɑ u kuɑ gɑ̃ɑnu kpuron wirugii, n sun yeeri mɑ wi u derɑ u kuɑ yen wirugii, u ǹ wɑ̃ɑsi sɔɔ. 28 Adɑmɑ bɑ̀ n gɑ̃ɑnu kpuro Kirisi nɔmu sɔndiɑ, yerɑ wi, Bii, u koo mɑɑ tii Gusunɔ nɔmu sɔndiɑ, kpɑ Gusunɔ wi u nùn gɑ̃ɑnu kpuro nɔmu sɔndiɑ, u bɑndu di kpuron wɔllɔ mɑm mɑm.
29 Be bɑ bɑtɛmu mɔ̀ gɔribun sɔ̃ mɑɑ ni. Arufɑɑni yerɑ̀ yɑ wɑ̃ɑ mi. Ǹ n sɑ̃ɑ gem mɑ gɔribɑ kun seemɔ, mbɑn sɔ̃nɑ bɑ bu bɑtɛmu mɔ̀ gɔribun sɔ̃. 30 Bɛsɛn tii mɑɑ, mbɑn sɔ̃nɑ sɑ rɑ n yɔ̃ kɑri sɔɔ sɑɑ bɑɑyere. 31 Nɛgibu, bɑɑdommɑwɑ nɑ rɑ n wɑ̃ɑ gɔɔn yirɑ sɔɔ. Nɑ yeni gerumɔ yèn sɔ̃ nɑ woo kɑnɑmɔ bɛɛn sɑɑbu bɛsɛn Yinni Yesu Kirisi sɔɔ. 32 Nɑ̀ n sɑnnɑ kɑ gberun yɛɛ Efesu mini nɛn tɔndun yiikon sɔ̃, ɑrufɑɑni yerɑ̀ nɑ mɔ. Gɔribu bɑ̀ kun seemɔ, ǹ n mɛn nɑ, su di kpɑ su nɔ domi siɑ sɑ ko gbi.
33 I ku de bu bɛɛ nɔni wɔ̃ke. Kpɑɑsi kɔ̃sobɑ bɑ rɑ dɑɑ geɑ sɑnku. 34 I de bɛɛn lɑɑkɑri geɑ yu wurɑmɑ nge mɛ n weenɛ, kpɑ i kookoo kɔ̃susu deri. Bɛɛn gɑbu bɑ ǹ Gusunɔ yɛ̃. Nɑ yeni gerumɔ mɑ bɛɛn sekurɑ.
Seebun wɑsi kpɛɛ
35 Goo koo bikiɑ u nɛɛ, ɑmɔnɑ bɑ koo kɑ gɔribu seeyɑ. Wɑsi yiren bweserɑ bɑ ko n mɔ. 36 Bwisi sɑrirugii! À n gɑ̃ɑnun biɑ duurɑ temɔ yɑ ǹ kpiimɔ mɑ n kun mɔ yɑ gu. 37 Ye ɑ duurumɔ temɔ, biɑ tɔnɑwɑ, nge ɑlikɑmɑ bimɑ, ǹ kun mɛ gɑ̃ɑnu gɑnun bimɑ, n ǹ mɔ kpii pɔturɑ. 38 Gusunɔ u biɑ ye kpii pɔturɑ wɛ̃ɛmɔ nge mɛ u kĩ. Biɑ bɑɑyere yɑ yen kpii pɔturɑ mɔ. 39 Gɑ̃ɑ wɑsinu kpuron yɑɑ kun mɑɑ tiɑ. Tɔmbugiɑ nɛnɛm, yɛɛgiɑ nɛnɛm, gunɔsugiɑ nɛnɛm, swɛ̃ɛgiɑ mɑɑ nɛnɛm.
40 Wɔllun wɑsi yi wɑ̃ɑ, hɑnduniɑgii mɑɑ wɑ̃ɑ. Wɔllun wɑsi yi yin burɑm mɔ, hɑnduniɑgii mɑɑ yin burɑm mɔ. 41 Sɔ̃ɔ u win burɑm bɑɑ mɔ, suru mɑɑ wigim mɔ kɑ mɑɑ kperi. Kperin tiin burɑm wunɑnɛ.
42 Mɛyɑ n ko n sɑ̃ɑ sɑnɑm mɛ bɑ koo gɔribu seeyɑ. Bɑ̀ n wɑsi sikɑ gɔɔgiiyɑ mi, ɑdɑmɑ bɑ̀ n yi seeyɑ yi ǹ mɑɑ gbimɔ. 43 Bɑ̀ n yi sikɑ yi ku rɑ n bɛɛrɛ mɔ, ɑdɑmɑ bɑ̀ n yi seeyɑ girimɑ bɑkɑgiiyɑ. Bɑ̀ n yi sikɑ, dɑm sɑrirugiiyɑ, ɑdɑmɑ bɑ̀ n yi seeyɑ yi dɑm mɔ. 44 Bɑ̀ n yi sikɑ wɑsi bentekerɑ, ɑdɑmɑ bɑ̀ n yi seeyɑ yi sɑ̃ɑwɑ hundegii. Domi wɑsi bentekeru tɑ̀ n wɑ̃ɑ, wɑsi hundegii mɑɑ wɑ̃ɑ. 45 Nge mɛyɑ mɑɑ bɑ yoruɑ bɑ nɛɛ, tɔn gbiikoo Adɑmu, u kuɑ wɑso, ɑdɑmɑ Adɑmu dɑ̃ɑko u sɑ̃ɑwɑ hunde wi u wɑ̃ɑru wɛ̃ɛmɔ. 46 N ǹ mɔ hundegiiyɑ yi gbiɑ yi nɑ. Wɑsi bentekerɑ tɑ gbiɑ tɑ nɑ, yen biru hundegii. 47 Bɑ tɔn gbiikoo mɔmɑ kɑ tem, mɑ u kuɑ temgii. Tɔnu yiruse u nɑwɑ wɔllun di. 48 Nge mɛ temgii gbiikoo u sɑ̃ɑ, mɛyɑ mɑɑ temgibu kpuro bɑ sɑ̃ɑ. Nge mɛ wɔllugii u mɑɑ sɑ̃ɑ mɛyɑ mɑɑ wɔllugibu kpuro bɑ sɑ̃ɑ. 49 Nge mɛ sɑ kɑ temgii weenɛ, nge mɛyɑ sɑ ko mɑɑ kɑ wɔllugii weenɑ.
50 Nɛgibu yeniwɑ nɑ gerumɔ, mɑ ye yɑ yɑɑ kɑ yɛm mɔ, yɑ ǹ kpɛ̃ yu bɔnu wɑ mi Gusunɔ u bɑndu swĩi. Ye yɑ mɑɑ sɑ̃ɑ gɔɔgiɑ yɑ ǹ kpɛ̃ yɑ n wɑ̃ɑru te tɑ ku rɑ kpe mɔ.
51 Asirin gɑri wee, nɑ bɛɛ sɔ̃ɔmɔ. N ǹ mɔ bɛsɛ kpurowɑ sɑ ko gbi, ɑdɑmɑ bɑ koo bɛsɛ kpuro kɔsi 52 yɑnde, nɔni kpɑki teeru sɔɔ sɑnɑm mɛ kɔbi dɑ̃ɑkɑ yɑ koo swĩ. Domi yɑ koo swĩ kpɑ bu gɔribu seeyɑ bu ku mɑɑ kɑ gbi, kpɑ bɛsɛ su mɑɑ kɔsi. 53 Domi wɑsi yi yi rɑ sɑnkire, yi ǹ koo ko yi kun kɔsɑ yi yi ku rɑ sɑnkire. Yi yi mɑɑ sɑ̃ɑ gɔɔgii, yi ǹ koo ko yi kun kɔsɑ yi yi ku rɑ gbi. 54 Tɛ̃ yi yi rɑ sɑnkire yì n kɔsɑ yi yi ku rɑ sɑnkire, gɔɔgii yì n mɑɑ kɔsɑ yi yi ku rɑ gbi, yerɑ ye bɑ yoruɑ yɑ koo koorɑ ye bɑ nɛɛ, <<U derɑ gɔɔ kpɑ, mɑ nɑsɑrɑ sinɑ.>>
55 <<Gɔɔ, mɑnɑ wunɛn nɑsɑrɑ wɑ̃ɑ.
Gɔɔ, mɑnɑ wunɛn sɔsɔ dɛ̃ɛgirɑ wɑ̃ɑ.>>
56 Gɔɔn sɔsɔ dɛ̃ɛgirɑ torɑru, torɑrun dɑm mɑɑ sɑ̃ɑwɑ woodɑ. 57 Yen sɔ̃, su Gusunɔ siɑrɑ wi u sun nɑsɑrɑ wɛ̃ɛmɔ sɑɑ Yesu Kirisi bɛsɛn Yinnin min di.
58 Ǹ n mɛn nɑ kĩnɑsibu, i yɔ̃ro dim dim kɑ tɛmɑnɑbu, i n hɑniɑ mɔ̀ Yinnin sɔmburu sɔɔ bɑɑdommɑ kpɑ i n yɛ̃ mɑ sɔmbu te i Yinni kuɑmmɛ tɑ ǹ kɑm mɔ̀.