16
Gobi sɔkubu
nɑɑnɛ dokeobun sɔ̃
1 Tɛ̃, gobin gɑri yi bɑ sɔkumɔ nɑɑnɛ dokeobun sɔ̃. N weenɛ i ko nge mɛ nɑ Yesun yigbɛnu sɔ̃ɔwɑ Gɑlɑtiɔ. 2 Alusumɑ bɑɑyeren tɔ̃ɔ gbiikiru i de bɑɑwure u gobi gɛɛ yi nɛnɛm, nge mɛ win wɑɑrɑ nɛ, kpɑ i ku de sɑnɑm mɛ nɑ tunumɑ i sere gobi sɔke. 3 Nɑ̀ n nɑ kon tɔn be i gɔsɑ gɔri Yerusɑlɛmuɔ kɑ bɛɛn kɛ̃ru kɑ tire ni nu koo bu tusiɑ. 4 Ǹ n mɑɑ kuɑ n kɑ dɑ nɛn tii, kon kɑ bu dɑ.
Ye Pɔlu kĩ u ko
5 Nɑ̀ n Mɑsedɔni berɑm dɑ, kon nɑ bɛɛn mi, domi nɑ ǹ kon ko nɑ kun Mɑsedɔni de. 6 Kon sɔ̃ɔ mɛɛru ko bɛɛn mi, ɑ ku tubɑ, kpurɑn sɑnɑm kpuro. Yen biru kpɑ i mɑn nɔmɑ kɛ̃ nɛn sɑnum sɔɔ mi nɑ dɔɔ kpuro. 7 Nɑ ǹ kĩ n bɛɛ wɑ bɑrɑrɑ tɛ̃ nɑ̀ n sɑrɔ, ɑdɑmɑ Yinni ù n wurɑ, nɑ yĩiyɔ kon nɑ n kɑ bɛɛ sinɑ sɔ̃ɔ mɛɛru.
8 Adɑmɑ ko nɑ n wɑ̃ɑ Efesu mini ginɑ sere Pɑntikotin tɔ̃ru. 9 Domi nɑ ɑyeru mɔ mini n kɑ sɔm bɑkɑru ko te tɑ koo ɑrufɑɑni ko. Yibɛrɛbɑ bɑ mɑɑ dɑbi.
10 Timɔte ù n nɑ bɛɛn mi i de i nùn dɑm koosiɑ kɑ bɛɛrɛ, domi u Yinnin sɔmburu mɔ̀wɑ nge mɛ nɑ mɔ̀. 11 Yen sɔ̃, i ku de goo u nùn gɛm, ɑdɑmɑ i nùn somiɔ win sɑnum sɔɔ u kɑ nɑ nɛn mi kɑ ɑlɑfiɑ, domi sɑ nùn mɑrɑ nɛ kɑ bɛsɛgibu sɑnnu.
12 Adɑmɑ ye n sɑ̃ɑ bɛsɛgii Apolon gɑri, nɔn dɑbirɑ nɑ rɑ nùn dɑm kɛ̃ u kɑ nɑ u bɛɛ berɑ kɑ bɛsɛgibu gɑbu sɑnnu, ɑdɑmɑ u ǹ kĩ u nɑ ginɑ. Ù n ɑyeru wɑ, u koo nɑ.
Yiire dɑ̃ɑkibu kɑ tɔbiribu
13 I n tii sɛ, i yɔ̃ro dim dim nɑɑnɛ dokebu sɔɔ. I n wɔrugɔru sɑ̃ɑ kpɑ i n dɑm mɔ. 14 Kpuro ye i mɔ̀, i ye koowo kɑ kĩru.
15 I Setefɑni yɛ̃ kɑ win yɛnugibu, mɑ beyɑ bɑ sɑ̃ɑ tɔn gbiikobu Gɛrɛsi sɔɔ be bɑ nɑɑnɛ doke, bɑ mɑɑ tii wɛ̃ bu kɑ nɑɑnɛ dokeobu nɔɔri. Nɛgibu nɑ bɛɛ kɑnɑmɔ, 16 i tɔn ben bweseru wiru kpĩiyɔ kɑ bɑɑwure wi u sɔmbu te mɔ̀ kɑ hɑniɑ.
17 Nɑ nuku dobu mɔ Setefɑni kɑ Fɔɔtunɑtu kɑ Akɑikun nɑɑrun sɔ̃, domi bɛɛn sɑriru bɑ mɑn kuɑ ye i ko rɑɑ ko. 18 Bɑ mɑɑ nɛn nukuru yɛmiɑsiɑ kɑ bɛɛgiru sɑnnu. N weenɛ i tɔn ben bweseru tɑkɑru ko.
19 Yesun yigbɛnu Asi sɔɔ nu bɛɛ tɔburɑ. Akilɑsi kɑ Pirisilɑ kɑ mɑɑ Yesun yigbɛru te tɑ rɑ mɛnnɛ ben yɛnuɔ, bɑ bɛɛ tɔburɑ gem gem Yinni sɔɔ. 20 Nɑɑnɛ dokeobu kpuro bɑ bɛɛ tɔburɑ.
I tɔbirinɔ kɑ kĩru.
21 Nɛ Pɔlu, nɑ bɛɛ tɔburɑ kɑ nɛn tiin yorɑ.
22 Bɑɑwure wi u kun Yinni kĩ, u bɔ̃ri wɑ.
Mɑrɑnɑtɑ. Yen tubusiɑnɑ, Yinni, ɑ nɑ.
23 Yinni Yesun durom mu n wɑ̃ɑ kɑ bɛɛ.
24 Nɛn kĩru tɑ wɑ̃ɑ kɑ bɛɛ kpuro Kirisi Yesu sɔɔ. Ami._