14
Hunde Dɛɛron kɛ̃nun gɑri
1 Ǹ n mɛn nɑ, kĩrɑ n weenɛ i n kɑsu. I mɑɑ Hunden kɛ̃nu kɑsuo, n mɑm nɛɛre Gusunɔn gɑrin gerubun kɛ̃ru. 2 Wi u kɑ Hunden bɑrum gɑri gerumɔ, n ǹ tɔnu u kɑ gɑri mɔ̀, Gusunɔwɑ u kɑ gɑri mɔ̀, domi goo kun yɛ̃ron gɑri nɔɔmɔ. Gem ɑsirigimɑ u gerumɔ kɑ Hunde Dɛɛron dɑm. 3 Adɑmɑ tɔmbɑ, Gusunɔn sɔmɔ u rɑ kɑ gɑri ko. U rɑ bu tɑ̃sisie, kpɑ u bu dɑm kɛ̃, kpɑ u bu nukuru yɛmiɑsiɑ. 4 Wi u kɑ Hunden bɑrum gɑri mɔ̀, u win tii tɑ̃sisiɑmɔwɑ. Adɑmɑ Gusunɔn sɔmɔ, Yesun yigbɛrɑ u tɑ̃sisiɑmɔ.
5 N ko n mɑn dore bɛɛ kpuro ì n kɑ Hunden bɑrum gɑri mɔ̀, ɑdɑmɑ ye nɑ kĩ n kere, yerɑ i n Gusunɔn gɑri gerumɔ. Domi wi u Gusunɔn gɑri gerumɔ u kere wi u Hunden bɑrum bwese bwesekɑ gerumɔ, mɑ n kun mɔ ù n win gɑri tusiɑ, kpɑ u kɑ Yesun yigbɛru tɑ̃sisiɑ. 6 Tɛ̃, nɛgibu ɑrufɑɑni yerɑ̀ i ko wɑ nɑ̀ n nɑ bɛɛn mi kɑ Hunden bɑrum bwese bwesekɑn gerubu, mɑ nɑ kun kɑ sɔ̃ɔsiru nɛ, ǹ kun mɛ yɛ̃ru, ǹ kun mɛ Gusunɔn gɑrin gerubu ǹ kun mɛ keu gɑɑ.
7 Bɑɑ gɑ̃ɑ ni nu kun wɑ̃ɑru mɔ nge guuru kɑ mɔrɔku bɑ̀ n nu soomɔ, bɑ̀ kun nu gɔsikiɑmɔ, ɑmɔnɑ gɑbɑ koo kɑ giɑ ye nu gerumɔ. 8 Wi u mɑɑ kɔbɑ soomɔ, ù kun soomɔ dee dee, wɑrɑ u koo tɑbun sɔɔru ko. 9 Nge mɛyɑ bɛɛn gɑri yì kun dɛɛre, yi koo kowɑ kɑm. 10 Bɑrum bwese bwesekɑ dɑbinɑ nu wɑ̃ɑ hɑnduniɑ sɔɔ, sɑri mɑɑ mɛ goo kun nɔɔmɔ. 11 Ǹ n mɛn nɑ, nɑ̀ kun bɑrum nɔɔmɔ mɛ bɑ kɑ gɑri mɔ̀, wi u mu gerumɔ u ko n sɑ̃ɑwɑ tɔn tuko nɛn mi, kpɑ nɛ n mɑɑ ko tɔn tuko yɛ̃ron mi. 12 Nge mɛyɑ bɛɛ, yèn sɔ̃ i Hunden kɛ̃nu kɑsu, i kookɑri koowo i kɑ nu wɑ nu n kpɑ̃ ni nu koo Yesun yigbɛru tɑ̃sisiɑ.
13 Yen sɔ̃, n weenɛ wi u kɑ Hunden bɑrum gɑri gerumɔ u Gusunɔ kɛ̃ru kɑnɑ te u koo kɑ gɑri yi tusiɑ. 14 Domi nɑ̀ n kɑnɑru mɔ̀ kɑ Hunden bɑrum nɛn hundewɑ yɑ kɑnɑru mɔ̀, ɑdɑmɑ nɛn bwisikunu kun wɑ̃ɑ te sɔɔ. 15 Tɛ̃, ɑmɔnɑ kon ko. Kon kɑnɑru ko kɑ nɛn hunde, kon mɑɑ ko kɑ nɛn bwisikunu. Kon womu ko kɑ nɛn hunde, kon mɑɑ ko kɑ nɛn bwisikunu. 16 À n Gusunɔ siɑrɑ kɑ hunde tɔnɑ, ɑmɔnɑ nɑɑnɛ dokeo diro u koo kɑ kpĩ u nɛɛ, ɑmi, wunɛn siɑrɑbun sɔ̃. U ǹ yɛ̃ ye ɑ gerumɔ. 17 Bɑɑ wunɛn siɑrɑbu bù n wɑ̃, bu ǹ yɛ̃ro tɑ̃sisiɑmɔ.
18 Nɑ Gusunɔ siɑrɑ yèn sɔ̃ nɑ rɑ kɑ Hunden bɑrum bwese bwesekɑ gɑri ko n bɛɛ kpuro kere. 19 Adɑmɑ Yesun yigbɛru sɔɔ nɑ kĩru bo n gɑri nɔɔbu gere kɑ nɛn bwisikunu n kɑ gɑbu keu sɔ̃ɔsi, n kere gɑri nɔrɔbun subɑ wɔkuru (10.000) kɑ Hunden bɑrum.
20 Nɛgibu i ku mɑɑ bwisiku nge bibu. Dɑɑ kɔ̃sɑ sɔɔrɑ n weenɛ i n sɑ̃ɑ nge bii wɛ̃ɛnu, ɑdɑmɑ bwisikunu sɔɔ i n sɑ̃ɑ tɔn girobu. 21 Gusunɔn woodɑn tireru sɔɔ bɑ yoruɑ,
<<Yinni u nɛɛ, kon de bu nɛn gɑri nɔ
be bɑ bɑrum tukum gerumɔn nɔɔn di,
kɑ mɑɑ sɔbun nɔɔ sɔɔn di.
Adɑmɑ kɑ mɛ, bɑ ǹ nɛn gɑri swɑɑ dɑkimɔ.>>
22 Ǹ n mɛn nɑ, Hunden bɑrum bwese bwesekɑn kɛ̃ru tɑ sɑ̃ɑwɑ yĩreru be bɑ kun nɑɑnɛ doken mi, n ǹ mɔ be bɑ nɑɑnɛ doken mi. Adɑmɑ Gusunɔn gɑri gerubun kɛ̃rɑ tɑ sɑ̃ɑ yĩreru be bɑ nɑɑnɛ doken mi, n ǹ mɔ be bɑ kun nɑɑnɛ doken mi.
23 Ǹ n mɛn nɑ, Yesun yigbɛru kpuro tɑ̀ n mɛnnɑ, kpɑ bɑɑwure u n Hunden bɑrum gerubu wɔri, nɑɑnɛ dokeo dirobu ǹ kun mɛ nɑɑnɛ doke sɑrirugibu bɑ̀ n duumɑ, bɑ ǹ koo gere bu nɛɛ i wiirɑwɑ? 24 Adɑmɑ bɑɑwure ù n Gusunɔn gɑri gerumɔ, sɑnɑm mɛ nɑɑnɛ doke sɑrirugii ǹ kun mɛ nɑɑnɛ dokeo diro goo u duumɑ, win gɔ̃ru gɑ koo nùn so, kpɑ gɑri yi, yi nùn siri yi tɔmbu kpuro bɑ gerumɔ. 25 Win bwisiku ɑsiriginu nu koo mɑɑ sɔ̃ɔsirɑ bɑtumɑ sɔɔ, kpɑ u yiirɑ u Gusunɔ sɑ̃ u nɛɛ, geemɑ, Gusunɔ u wɑ̃ɑwɑ bɛɛn suunu sɔɔ.
Yesun yigbɛrun sɑ̃ɑrun woodɑ
26 Nɛgibu, bɛɛn bɑɑwurewɑ u kɛ̃ru mɔ, googiru womu, googiru tubusiɑnu, googiru sɔ̃ɔsiru Gusunɔn min di, googiru Hunden bɑrum bwese bwesekɑn gerubu, googiru mɑɑ mɛn tusiɑbu. Ì n mɛnnɑ, i de i n ye kpuro mɔ̀ i kɑ tɑ̃sisiɑnɑ. 27 Gɑbu bɑ̀ n koo kɑ Hunden bɑrum bwese bwesekɑ gɑri ko, n weenɛ bɑ n sɑ̃ɑ tɔmbu yiru ǹ kun mɛ itɑ tɔnɑ kpɑ bu ko tiɑ tiɑ, kpɑ goo u mɑɑ ben gɑri yi tusiɑ. 28 Adɑmɑ goo ù kun wɑ̃ɑ mi wi u koo kpĩ u gɑri yi tusiɑ, i de bu mɑri mɛnnɔ sɔɔ, kpɑ bu yi ko kɑ Gusunɔ tɔnɑ. 29 Ye yɑ mɑɑ sɑ̃ɑ Gusunɔn sɔmɔbun gɑri wee. I de ben yiru ǹ kun mɛ itɑ bu gɑri ko, kpɑ be bɑ tie bu ben gɑri yi yĩiyɑ. 30 Gusunɔ ù n goo wi u sɔ̃ mɛnnɔ sɔɔ gɑ̃ɑnu sɔ̃ɔsi u kɑ gere, i de wi u gɑri mɔ̀ u mɑri. 31 Domi bɛɛ kpuro i ko kpĩ i Gusunɔn gɑri gere tiɑ tiɑ, kpɑ bɛɛ kpuro i kɑ gɑ̃ɑnu giɑ kpɑ i kɑ dɑm kɛ̃ru wɑ. 32 Gusunɔn sɔmɔbu bu de bɑ n tii kpĩɑ ben kɛ̃ru sɔɔ. 33 Domi Gusunɔ kun bɛrɛtɛkɛ kĩ mɑ n kun mɔ ɑlɑfiɑ.
Nge mɛ n sɑ̃ɑ nɑɑnɛ dokeobun yigbɛnu kpuro sɔɔ, 34 n weenɛ tɔn kurɔbu bu mɑri mɛnnɔ sɔɔ. N ǹ weenɛ bu gɑri gere, ɑdɑmɑ bu wiru kpĩiyɔ nge mɛ Gusunɔn woodɑ yɑ gerumɔ. 35 Bɑ̀ n kĩ bu gɑ̃ɑnu giɑ i de bu ben durɔbu bikiɑ yɛnuɔ, domi bɛɛn sekurɑ tɔn kurɔ ù n gɑri mɔ̀ mɛnnɔ sɔɔ.
36 Amɔnɑ. Bɛɛn min diyɑ Gusunɔn gɑri yi gbiɑ yi toruɑ? Nge bɛɛ tɔnɑn miyɑ yi turɑ? 37 Goo ù n tɑmɑɑ u sɑ̃ɑ Gusunɔn sɔmɔ, ǹ kun mɛ u yĩiyɔ u Hunden kɛ̃nu mɔ, n weenɛ u wurɑ mɑ ye nɑ yorumɔ, Yinnin yiirebɑ. 38 Goo wi u kun yeni wure, i ku rɑ yɛ̃ro wurɑ.