13
Kĩru
1 Bɑɑ nɑ̀ n kɑ bɑrum bwese bwesekɑ gɑri mɔ̀ kɑ mɑm wɔllun gɔrɑdobɑn bɑrum mɑ nɑ kun tɔnu kĩ, nɑ sɑ̃ɑwɑ nge yɑnkokoru ǹ kun mɛ yɑngireru te bɑ soomɔ. 2 Bɑɑ nɑ̀ n Gusunɔn gɑri gerubun dɑm mɔ, mɑ nɑ ɑsiri kpuro tubɑ kɑ yɛ̃ru kpuro, mɑ nɑ Gusunɔ nɑɑnɛ doke sere kon kpĩ n guunu sɔ̃ nu swɛnyɔ, nɑ̀ kun tɔnun kĩru mɔ nɑ ǹ sɑ̃ɑ gɑ̃ɑnu. 3 Bɑɑ nɑ̀ n nɛn dukiɑ kpuro sɑ̃ɑrobu wɛ̃, bɑɑ nɑ̀ n derɑ bɑ nɛn wɑsi wɔ̃ɔwɑ, nɑ̀ kun tɔnun kĩru mɔ nɑ ǹ ɑre wɑsi.
4 Wi u tɔnu kĩ u rɑ tɛmɑnɛ, u rɑ n mɑɑ tɔn geeru mɔ̀, u ku rɑ n nisinu mɔ, u ku rɑ woo kɑnɛ, u ku rɑ mɑɑ tii sue. 5 Wi u tɔnu kĩ u rɑ n tɔmbun bɛɛrɛ yɛ̃, u ku rɑ win tii tɔnɑn ɑrufɑɑni kɑsu, u ku rɑ mɔru ko fuuku, u ku rɑ mɑɑ torɑrun gɑri yi win nukurɔ. 6 Wi u tɔnu kĩ u ku rɑ yɛ̃ɛri kɔ̃sɑn sɔ̃ mɑ n kun mɔ gem sɔ̃. 7 Wi u tɔnu kĩ u rɑ kɑ kpuro tɛmɑnɛ. Win nɑɑnɛ dokebu kɑ win yĩiyɔbu kɑ win tɛmɑnɑbu bu ku rɑ kpe.
8 Wi u tɔnu kĩ win kĩrɑ ku rɑ n nɔru mɔ. Gusunɔn gɑri gerubu bu nɔru mɔ, Hunden bɑrum bwese bwesekɑn gerubu koo kpe, yɛ̃ru tɑ koo mɑɑ kpe. 9 Domi bɛsɛn yɛ̃ru kɑ bɛsɛn Gusunɔn gɑri gerubu, yen gɑɑ kun yibɑ. 10 Adɑmɑ sɑnɑm mɛ ye yɑ yibɑ yɑ koo nɑ, sɑnɑm mɛyɑ ye yɑ kun yibɑ, yɑ koo doonɑ.
11 Sɑnɑm mɛ nɑ sɑ̃ɑ bii, nɑ rɑ gɑri gere nge bii, nɑ rɑ lɑɑkɑri ko nge bii, nɑ rɑ mɑɑ bwisiku nge bii, ɑdɑmɑ tɛ̃ ye nɑ guro guro kuɑ, nɑ biin dɑɑ deri. 12 Ye sɑ wɑɑmɔ tɛ̃ yɑ sɑ̃ɑre ye sɑ wɑɑmɔ bɑri bɑri tɑsɑ sɔɔ, ɑdɑmɑ sɔ̃ɔ teeru sɑ ko rɑ wɑ nɔni kɑ nɔni. Ye nɑ yɛ̃ tɛ̃ yɑ ǹ yibɑ, ɑdɑmɑ sɔ̃ɔ teeru kon dɑ tubu sɑ̃ɑ sɑ̃ɑ nge mɛ Gusunɔ u mɑn tubɑ.
13 Tɛ̃ gɑ̃ɑnu itɑ yeniwɑ yɑ wɑ̃ɑ, yeyɑ nɑɑnɛ dokebu, kɑ yĩiyɔbu, kɑ kĩru. Adɑmɑ kĩrɑ tɑ kere.