Korinti I 9

Gɔron yiiko kɑ win sɔmburu

¹ Nɑ ǹ tii mɔ rò? Nɑ ǹ sɑ̃ɑ gɔro? Nɑ ǹ Yesu bɛsɛn Yinni wɑ ro? Bɛɛ i ǹ sɑ̃ɑ nɛn nɔmɑn sɔmburu Yinni sɔɔ? ² Bɑɑ nɑ̀ kun sɑ̃ɑ gɔro gɑbun mi, nɑ sɑ̃ɑ mɛ bɛɛn mi, domi bɛɛyɑ i sɔ̃ɔsimɔ mɑ nɛ Yinnin gɔrowɑ.

³ Be bɑ kĩ bu mɑn gɑri wɛ̃ɛrisiɑ, ye kon bu wisi wee. ⁴ Sɑ ǹ yiiko mɔ su kɑ di su mɑɑ kɑ nɔ? ⁵ Sɑ ǹ yiiko mɔ sɑ n kɑ kurɔ nɑɑnɛ dokeo mɔ wi u koo sun yɔ̃siri nge mɛ gɔrobu gɑbu bɑ mɔ kɑ Yinnin wɔnɔbu, kɑ Sefɑ? ⁶ Nge nɛ kɑ Bɑɑnɑbɑsi tɔnɑwɑ sɑ ǹ yiiko mɔ su kɑ nɔmɑn sɔmburu deri? ⁷ Wɑrɑ dɔɔ tɑbu gberɔ kɑ win tiin gobi. Wɑrɑ dɑ̃ɑ duurumɔ gberɔ kpɑ yɛ̃ro kun sere nin binu dimɔ. Nge wɑrɑ u nɑɑ gɔ̃ɔ kpɑrɑmɔ mɑ u ǹ gen bom nɔrumɔ.

⁸ Nɑ ǹ yeni gerumɔ kɑ tɔnun yiiko tɔnɑ. N ǹ gɑri tee yi woodɑ yɑ gerumɔ? ⁹ Domi Mɔwisin woodɑ sɔɔ bɑ yoruɑ, <<I ku bɛɛn nɑɑ kinɛrun nɔɔ bɔke sɑɑ ye tɑ sɔmburu mɔ̀ dĩɑnu sɔɔ.>> Nɑɑn sɔ̃nɑ Gusunɔ u yeni geruɑ? ¹⁰ Nge bɛsɛn tiin sɔ̃nɑ u gɑri yi mɔ̀. Mɛyɑ bɛsɛn sɔ̃nɑ bɑ yoruɑ domi n weenɛ wuko u wuku kɑ yĩiyɔbu, kpɑ gɛ̃ɔ u gɛ̃ u n bɔnu yĩiyɔ. ¹¹ Sɑ̀ n hunden gɑ̃ɑnu duurɑ bɛɛn suunu sɔɔ, ǹ n mɛn nɑ gɑ̃ɑ bɑkɑnɑ sɑ̀ n wɑsin gɑ̃ɑnu gɑ̃ bɛɛn mi? ¹² Gɑbu bɑ̀ n yen yiiko mɔ bɛɛn mi, bɛsɛ mɑɑ ni. Sɑ ǹ bu kere?

Adɑmɑ sɑ ǹ yiiko ye dendɑ bɛɛ sɔɔ. Ye kpuro sɔɔrɑ sɑ tɛmɑnɛ, kpɑ su ku rɑ kɑ Kirisin Lɑbɑɑri geɑ swɑɑ gɑnɛ. ¹³ I ǹ yɛ̃ mɑ be bɑ sɔmburu mɔ̀ sɑ̃ɑ yerɔ bɑ ben dĩɑnu wɑɑmɔ min di? Be bɑ mɑɑ yɑ̃ku yeru kɔ̃su, bɑ ben bɔnu mɔ te sɔɔ. ¹⁴ Nge mɛyɑ mɑɑ Yinni u yiire be bɑ Lɑbɑɑri geɑn wɑɑsu mɔ̀ bu ben dĩɑnu wɑ ye sɔɔ.

¹⁵ Adɑmɑ nɑ ǹ yen gɑɑ dendɑ gɑ̃ɑ ni sɔɔ. Mɛyɑ nɑ ǹ mɑɑ yeni yorumɔ bu kɑ mɑn ye kuɑn sɔ̃. Nɑ kĩru bo n gbi. Goo sɑri wi u koo mɑn yinɑri n woo kɑnɑ gɑri yinin sɔ̃. ¹⁶ Domi n ǹ weenɛ n woo kɑnɑ Lɑbɑɑri geɑn kpɑrɑbun sɔ̃. Tilɑsiwɑ ye, yɑ mɑn sɑ̃ɑwɛ. Nɑ̀ kun yen wɑɑsu kue, wɑhɑlɑ bɑkɑ. ¹⁷ Nɑ̀ n ye kuɑ kɑ kĩru kon ɑre mwɑ. Nɑ̀ kun mɑɑ kĩ nɑ kɑ mɔ̀, kɑ mɛ, kon ye kowɑ domi bɑ mɑn yè nɔmu sɔndiɑwɑ. ¹⁸ Ǹ n mɛn nɑ, mbɑ nɛn ɑre. Nɛn ɑreyɑ n kɑ Kirisin Lɑbɑɑri geɑ wɑɑsu ko n kun kɑ gobin bɑɑ kpɑ n ku nɛn yiiko kpuro dendi ye nɑ mɔ Lɑbɑɑri geɑn kpɑrɑbun sɔ̃.

¹⁹ Bɑɑ nɑ̀ n tii mɔ tɔmbu kpuron wuswɑɑɔ nɑ tii kuɑ bɑɑwuren yoo kpɑ n kɑ tɔn dɑbiru gɑwɑmɑ. ²⁰ Yuubɑn mi nɑ kuɑ nge Yuu n kɑ Yuubɑ gɑwɑmɑ. Be bɑ mɑɑ woodɑ nɑsie, nɑ kuɑ ben turo, kpɑ n kɑ bu gɑwɑmɑ bɑɑ mɛ nɛn tii nɑ ǹ wɑ̃ɑ woodɑn nɔmɑɔ. ²¹ Be bɑ kun woodɑ mɔn mi, nɑ mɑɑ kuɑ ben turo kpɑ n kɑ bu gɑwɑmɑ. N ǹ mɔ mɑ nɑ ǹ Gusunɔn woodɑ nɑsie, nɑ Kirisin woodɑ nɑsie. ²² Dɑm sɑrirugibun mi nɑ kuɑ wi u kun dɑm mɔ kpɑ n kɑ dɑm sɑrirugii be gɑwɑmɑ. Nɑ kuɑ nge mɛ bɑɑwure u sɑ̃ɑ ben gɑbu bu kɑ fɑɑbɑ wɑɑrɑ, bɑɑ ǹ n mɛren nɑ. ²³ Ye kpurowɑ nɑ mɔ̀ Lɑbɑɑri geɑn sɔ̃ kpɑ nɑ n kɑ bɔnu mɔ ye sɔɔ.

²⁴ I yɛ̃ mɑ dukɑn gɑrɑsɑ sɔɔ tɔmbu kpuro bɑ duki mɔ̀wɑ ɑdɑmɑ tɔn turowɑ u koo yen ɑre wɑ. Yen sɔ̃, i dukio nge mɛ i ko kɑ ɑre wɑ. ²⁵ Wɑsi kɑsɑnugii bɑɑwure u rɑ n tii nɛniwɑ kpuro sɔɔ. Bɑ mɔ̀ mɛ bu kɑ ɑre wɑ yi yi sɑ̃ɑ wurusun furɔ\f |b9:25 wurusun furɔ|d - Gerɑ bɑ rɑ rɑɑ doke goon wirɔ yellu wi u gɑrɑsɑ gɑɑ sɔɔ wiru gbiɑ.\F ge gɑ koo gberɑ gu dɛrurɑ. Adɑmɑ bɛsɛ sɑ mɔ̀ su kɑ mwɑ ge gɑ kun kpeemɔ. ²⁶ Yen sɔ̃nɑ nɑ dukɑ mɔ̀ dee dee nɑ ǹ gɛririmɔ. Nɑ sɑnnɑmɔ, ɑdɑmɑ n ǹ mɔ nge wi u wom soomɔ. ²⁷ Nɑ nɛn wɑsi nɔwiɑ mɔ̀ gem gem n kɑ yi kɑmiɑ, kpɑ n ku rɑ ko wi bɑ koo girɑ nɔm dirɑ nɛn tii sɑnɑm mɛ nɑ sibu gɑbu wɑɑsu kuɑ.