8
Dĩɑ ni bɑ kɑ bũu yɑ̃kuru kuɑ
1 Tɛ̃, gɑ̃ɑ ni bɑ kɑ bũu yɑ̃kuru kuɑ, nin gɑri sɔɔrɑ nɑ wurɑ.
Geemɑ, bɛsɛ kpuro sɑ yɛ̃ru mɔ. Yɛ̃rɑ tii suɑbu mɔ, ɑdɑmɑ kĩrɑ tɑ rɑ tɔnu tɑ̃sisie. 2 Goo ù n tɑmɑɑ u gɑ̃ɑnu yɛ̃, u ǹ yɛ̃ ginɑ nge mɛ n weenɛ u n yɛ̃. 3 Adɑmɑ wi u Gusunɔ kĩ, Gusunɔ u yɛ̃ro yɛ̃.
4 Tɛ̃ dĩɑ ni bɑ kɑ bũu yɑ̃kuru kuɑ, ɑmɛniwɑ nin dibun gɑri sɑ̃ɑ. Sɑ yɛ̃ mɑ bũu kun gɑ̃ɑnu hɑnduniɑ sɔɔ. Sɑ mɑɑ yɛ̃ mɑ Gusunɔ turowɑ wɑ̃ɑ. 5 Domi bɑɑ bɑ̀ n gerumɔ bũnu wɑ̃ɑ wɔllɔ kɑ temɔ, nge mɛ sɑ yɛ̃ mɑ bũu dɑbinu kɑ yinni dɑbinu nu wɑ̃ɑ, 6 kɑ mɛ, bɛsɛn mi, Gusunɔ turowɑ wɑ̃ɑ. Wiyɑ sɑ̃ɑ Bɑɑbɑ wìn min di gɑ̃ɑnu kpuro nu nɑɑmɔ. Win sɔ̃nɑ sɑ mɑɑ wɑ̃ɑ. Yinni turowɑ mɑɑ wɑ̃ɑ. Wiyɑ Yesu Kirisi wìn min di gɑ̃ɑnu kpuro nu koorɑ. Win sɑɑbuwɑ sɑ mɑɑ wɑ̃ɑru mɔ.
7 Adɑmɑ n ǹ tɔmbu kpuro bɑ yeni yɛ̃. Gɑbu be bɑ ginɑ bũu sɑ̃ɑrun dɔɔnɛ mɔ, bɑ yɑɑ ye temmɔ nge bũu sɑ̃ɑ dĩɑnu, mɑ ben gɔ̃ru dɑm sɑriruguu gɑ bu tɑɑrɛ wɛ̃ɛmɔ. 8 N ǹ mɔ dĩɑnɑ nu koo kɑ sun susi Gusunɔn mi. Sɑ̀ kun di, n ǹ kɔmiɑru, sɑ̀ n mɑɑ di, n ǹ turiru.
9 Adɑmɑ i tii lɑɑkɑri koowo bɛɛn tii mɔɔ te, tu ku rɑɑ de be bɑ ǹ dɑm mɔ bu torɑ. 10 Domi wunɛ wi ɑ yɛ̃ru mɔ, mɑ ɑ sɔ̃ ɑ dimɔ bũu dirɔ, gɔ̃ru dɑm sɑrirugii ù n nun wɑ mi, u ǹ koo wɔrugɔru ko u kɑ bũu sɑ̃ɑ dĩɑnu di? 11 Kpɑ kĩnɑsi wi, wìn sɔ̃ Kirisi u gu, u kɑm ko wunɛn yɛ̃run sɑɑbu. 12 Nge mɛyɑ ì n bɛɛn berusebu torɑri mɑ i ben gɔ̃ru dɑm sɑriruguu ge mɛɛrɑ mɔ̀, Kirisiwɑ i torɑri. 13 Yen sɔ̃, dĩɑnu nù n koo nɛn beruse torɑsiɑ, nɑ ǹ mɑɑ yɑɑ temmɔ sere kɑ bɑɑdommɑɔ, n ku kɑ nɛn beruse torɑsiɑn sɔ̃.