7
Suɑnɑbun gɑri
1 Tɛ̃ gɑri yìn tireru i mɑn yoruɑ, yiyɑ nɑ bɛɛ wisimɔ. N wɑ̃ tɔn durɔ u ku kurɔ bɑbɑ. 2 Adɑmɑ kurɔ dɑmɑrun sɔ̃ n weenɛ bɑɑwure u n win tiin kurɔ mɔ, kpɑ kurɔ bɑɑwure u n win tiin durɔ mɔ. 3 Kpɑ durɔ kɑ win kurɔ bɑ n wɑ̃ɑsinɛ nge mɛ n weenɛ. 4 Domi kurɔn wɑsi yi ǹ sɑ̃ɑ win tiigii mɑ n kun mɔ win durɔgii. Nge mɛyɑ mɑɑ durɔn wɑsi yi ǹ sɑ̃ɑ win tiigii mɑ n kun mɔ win kurɔgii. 5 I ku n dɑ mɛnɑnɛ mɑ n kun mɔ sɑɑ fiiko sɔɔ ye i ko wunɑ bɛɛn lɑɑkɑri yu kɑ wurɑ kɑnɑru sɔɔ mɑm mɑm. Adɑmɑ yen biru i mɑɑ wureo i mɛnnɑ, kpɑ Setɑm u ku rɑɑ bɛɛ kɔkiri bɛɛn tii nɛnubu sɑrirun sɔ̃.
6 Nɑ ǹ yeni gerumɔ nge tilɑsin bɑɑ, nɑ gesi kɑnɑmɔwɑ. 7 N ko n mɑn wɛ̃re tɔmbu kpuro bɑ̀ n sɑ̃ɑ nge nɛn tii, ɑdɑmɑ bɑɑwurewɑ u win kɛ̃run bɑɑ mɔ sɑɑ Gusunɔn min di, winigirun bɑɑ, wiɔnɔgirun bɑɑ.
8 Adɑmɑ nɑ tɑntɑnɔbu kɑ gɔminibu sɔ̃ɔmɔ n ko n wɛ̃rɑ bɑ̀ n wɑ̃ɑ nge mɛ nɑ kɑ wɑ̃ɑ. 9 Adɑmɑ bɑ̀ kun kpɛ̃ bu tii nɛnɛ, bu de bu kɑsunɑ bu kɑ suɑnɑ, domi n burɑm bo bu suɑnɑ n kere bɑ n kĩi kɑmgiru wɑ̃ɑsi.
10-11 Tɛ̃, be bɑ suɑnɑ kɔ, beyɑ nɑ woodɑ yeni sɔ̃ɔmɔ. Kurɔ u ku rɑɑ win durɔ yinɑ. Adɑmɑ ù n yinɑ, u sinɔ, u ku mɑɑ durɔ kpɑo suɑ, ǹ kun mɛ u wuro win durɔ yinɑro win mi. N ǹ mɑɑ weenɛ durɔ u win kurɔ yinɑ. Adɑmɑ n ǹ nɛ nɑ bu woodɑ dokeɑmmɛ, mɑ n kun mɔ Yinni.
12 Be bɑ tie, beyɑ nɑ mɑɑ yeni sɔ̃ɔmɔ, n ǹ mɔ Yinniwɑ u geruɑ. Nɑɑnɛ dokeo goo ù n kurɔ mɔ mɑ kurɔ wi, u ǹ sɑ̃ɑ nɑɑnɛ dokeo mɑ n kurɔ wi wɛ̃re bɑ n kɑ wɑ̃ɑsinɛ, u ku rɑɑ nùn yinɑ. 13 Kurɔ goo ù n mɑɑ durɔ mɔ mɑ durɔ wi, u ǹ sɑ̃ɑ nɑɑnɛ dokeo mɑ n durɔ wi wɛ̃re bɑ n kɑ wɑ̃ɑsinɛ, u ku rɑɑ nùn yinɑ. 14 Domi durɔ nɑɑnɛ doke sɑrirugii wi, bɑ nùn yii nɛnɛm win kurɔn sɔ̃. Mɛyɑ bɑ mɑɑ kurɔ nɑɑnɛ doke sɑrirugii wi yii nɛnɛm win durɔn sɔ̃, ben bibu bɑ n kɑ yii nɛnɛm. Mɑ n kun mɛ, bɑ ko n sɑ̃ɑ nge nɑɑnɛ doke sɑribɑ. 15 Adɑmɑ nɑɑnɛ doke sɑrirugii wi, ù n doonɑ, i nùn derio. Ǹ n sɑ̃ɑ mɛ, n ǹ tilɑsi bɑ n kɑ wɑ̃ɑsinɛ domi Gusunɔ u sun sokɑwɑ sɑ n kɑ wɑ̃ɑ ɑlɑfiɑ sɔɔ. 16 Domi wunɛ kurɔ n ǹ wunɛ kɑɑ n yɛ̃ wunɛn durɔ ù n koo fɑɑbɑ wɑ. Wunɛ durɔ, n ǹ wunɛ kɑɑ n mɑɑ yɛ̃ wunɛn kurɔ ù n koo fɑɑbɑ wɑ.
Wɑ̃ɑ tèn sɔ̃ Yinni u bɛɛ sokɑ
17 Ǹ n mɛn nɑ, i de bɑɑwure u win wɑ̃ɑru di nge mɛ Gusunɔ u kɑ nùn sokɑ kɑ durom mɛ Yinni u nùn kuɑ. Yeniwɑ nɑ Yesun yigbɛnu kpuro yiiremɔ. 18 Bɑ goo bɑngo kuɑwɑ Yinni u sere yɛ̃ro sokɑ? I ku yɛ̃ron bɑngo ye go. Bɑ ǹ ginɑ nùn bɑngo kue Yinni kɑ nùn sokɑ? I ku rɑ mɑɑ nùn bɑngo kuɑ. 19 Bɑngo nge bɑngo sɑriru, yen gɑɑ kun sɑ̃ɑ gɑ̃ɑnu gɑnu, ɑdɑmɑ Gusunɔn gɑrin mɛm nɔɔbɑ bu sɑ̃ɑ gɑ̃ɑnu. 20 Kpɑ tɔnu bɑɑwure u wɑ u yɔ̃rɑ nge mɛ u sɑ̃ɑ bɑ kɑ nùn sokɑ. 21 À n sɑ̃ɑn nɑ yoo bɑ kɑ nun sokɑ, ɑ ku yeni gɑrisi. Adɑmɑ bɑ̀ n nun tii mɔru wɛ̃ ɑ mɔɔ. 22 Domi yoo wi bɑ sokɑ, u kuɑ tii mɔwɔ Yinni sɔɔ. Nge mɛyɑ mɑɑ tii mɔwɔ wi bɑ sokɑ, yɛ̃ro kuɑ Kirisin yoo. 23 Bɑ bɛɛ dwɑ geeru nɔru sɑri. Yen sɔ̃, i ku de i n mɑɑ sɑ̃ɑ tɔmbun yobu. 24 Ǹ n mɛn nɑ nɛgibu, i de bɑɑwure u yɔ̃rɑ Gusunɔ sɔɔ nge mɛ u sɑ̃ɑ bɑ kɑ sere nùn sokɑ.
Wɔndiɑbɑ kɑ gɔminibun gɑri
25 Tɛ̃ ye n sɑ̃ɑ wɔndiɑbɑgiɑ, nɑ ǹ gɑri gɛɛ mɔ ye n sɑ̃ɑ Yinnin woodɑ. Adɑmɑ nge mɛ Yinni u mɑn wɔnwɔndu kuɑ nɑ kɑ kuɑ nɑɑnɛgii, nɑ bɛɛ nɛn lɑɑkɑri sɔ̃ɔmɔ.
26 Nɑ tɑmɑɑ, sɑɑ yenin wɑhɑlɑn sɔ̃ mɑ n ko n wɛ̃rɑ tɔn durɔ bɑɑwure u n wɑ̃ɑ nge mɛ u sɑ̃ɑ. 27 À n kurɔ mɔ, ɑ ku rɑ swɑɑ kɑsu i kɑ kɑrɑnɑ. À n mɑɑ wɑ̃ɑ tɑntɑnɑru sɔɔ, ɑ ku kurɔ kɑsu. 28 Adɑmɑ ɑ̀ n kurɔ suɑ, ɑ ǹ tore. Wɔndiɑ ù n mɑɑ durɔ suɑ, u ǹ tore. Adɑmɑ be bɑ suɑnɑ, bɑ ko n nɔni swɑ̃ɑru mɔ ben wɑ̃ɑru sɔɔ. Nɑ ǹ mɑɑ kĩ n sɑ̃ɑ mɛ bɛɛn mi.
29 Nɛgibu, ye nɑ gerumɔ wee, sɑɑ kun mɑɑ dɛ̃u. Yen sɔ̃, sɑɑ tɛ̃n di wi u kurɔ mɔ, n weenɛ u n sɑ̃ɑ nge u ǹ kurɔ mɔ. 30 Kpɑ wi u nuku sɑnkirɑnu mɔ u ko nge u ǹ mɔ. Wi u mɑɑ nuku dobu mɔ u koowo nge u ǹ nuku dobu mɔ. Wi u mɑɑ dwemɔ, u koowo nge u ǹ gɑ̃ɑnu mɔ. 31 Wi u mɑɑ kɑ hɑnduniɑn dukiɑ bukɑtɑ mɔ̀ u ku win lɑɑkɑri kpuro doke ye sɔɔ. Domi hɑnduniɑ yeni yɑ doonɔwɑ mi.
32 Nɑ ǹ kĩ i n wurure. Wi u kun kurɔ mɔ, wiyɑ rɑ n Yinnin gɑ̃ɑnu kɑsu, ye n koo Yinni dore. 33 Adɑmɑ wi u kurɔ mɔ wiyɑ rɑ n hɑniɑ mɔ̀ hɑnduniɑn gɑ̃ɑnu sɔɔ u n kɑsu ye n koo win kurɔ dore. 34 Win lɑɑkɑri rɑ n bɔnu sɑ̃ɑwɑ. Kurɔ be bɑ ǹ durɔbu mɔ kɑ wɔndiɑbɑ bɑ rɑ n Yinnin gɑ̃ɑnu kɑsu bɑ n kɑ sɑ̃ɑ dɛɛrobu wɑsi sɔɔ kɑ hunde sɔɔ. Adɑmɑ wi u durɔ mɔ wiyɑ rɑ n hɑnduniɑn gɑ̃ɑnu kɑsu ye n koo win durɔ dore.
35 Nɑ yeni gerumɔwɑ bɛɛn ɑlɑfiɑn sɔ̃, n ǹ mɔ n kɑ bɛɛn wɑ̃ɑru sɛ̃siɑsiɑ, ɑdɑmɑ n kɑ bɛɛ sɔ̃ɔsiwɑ ye n weenɛ i ko, kpɑ i kɑ tii Yinni wɛ̃ mɑm mɑm.
36 Goo ù n bwisikɑ u wɑ mɑ ye u win bii wɔndiɑ kuɑmmɛ yɑ ǹ bɛɛrɛ mɔ, mɑ wɔndiɑ wi, u ye, u de u ko nge mɛ u kĩ, u de bu nùn kurɔ kpɑɑru suɑ. N ǹ torɑru. 37 Adɑmɑ wi u yɔ̃rɑ sim sim mɑ u ǹ wɑ̃ɑ tilɑsi sɔɔ mɑ u dɑm mɔ win gɔ̃ru kĩru wɔllɔ ù n nɛɛ, win bii wɔndiɑ u ku durɔ suɑ, geɑ u bwisikɑ. 38 Nge mɛyɑ wi u derɑ bɑ win bii wɔndiɑ kurɔ kpɑɑru suɑ u geɑ kuɑ, ɑdɑmɑ wi u ǹ dere bɑ nùn sue, wiyɑ kuɑ n kere.
39 Tɔn kurɔ u ko n kɑ win durɔ gbinnɛwɑ win durɔn wɑ̃ɑrun tɔ̃ru kpuro sɔɔ, ɑdɑmɑ durɔ wi, ù n gu, kurɔ wi, u tii mɔ u kɑ durɔ kpɑo suɑ wi u kĩ, yɛ̃ro u n gesi sɑ̃ɑ Yinnigii. 40 Adɑmɑ nɛn lɑɑkɑri sɔɔ kurɔ wi, ù n tii deri gɔmini te sɔɔ win nuku dobu koo kpɛ̃ɑ n kere. Nɑ mɑɑ tɑmɑɑ Gusunɔn Hundewɑ mɑn yeni sɔ̃ɔwɑ.