10
Bũu sɑ̃ɑrun kirɔ
1 Nɛgibu nɑ kĩ i n yɛ̃ mɑ bɛsɛn sikɑdobɑ kpuro bɑ wɑ̃ɑ guru wii ten\f |b10:1 guru wii te|d - Tɑ sɑ̃ɑwɑ te tɑ Isirelibɑ gbiiye sɑnɑm mɛ bɑ wɑ̃ɑ gbɑburɔ.\F tɔbuɔ mɑ be kpuro bɑ sĩɑ nim wɔ̃ku gen\f |b10:1 nim wɔ̃ku ge|d - Gɑ sɑ̃ɑwɑ nim wɔ̃ku ge bɑ mɔ̀ Nɑɑ yɑri ge gɑ burɑnɑ bɑ tɔburɑ ye bɑ yɑrɑ Egibitin di.\F suunu sɔɔ kɑ nɑɑsu. 2 Mɑ be kpuro bɑ kuɑ Mɔwisin bwɑ̃ɑbu kɑ bɑtɛmu gɑɑ guru wii te sɔɔ kɑ nim wɔ̃ku ge sɔɔ. 3 Mɑ be kpuro bɑ dĩɑ teenu di ni nu nɑ sɑɑ wɔllun di, 4 mɑ bɑ nim nɔrurɑm tem nɔrɑ mɛ Gusunɔ u bu wɛ̃, domi bɑ nim nɔrumɔwɑ sɑɑ kpee Hundegirun min di te tɑ bu swĩi biruɔ. Kirisiwɑ sɑ̃ɑ kpee te. 5 Adɑmɑ Gusunɔ u ben dɑbiru go gbɑburu sɔɔ yèn sɔ̃ ben dɑɑ yɑ ǹ nùn wɛ̃re.
6 Tɛ̃, yeyɑ yɑ sɑ̃ɑ yĩreru bɛsɛn sɔ̃ kpɑ sɑ kun mɑɑ sɑ̃ɑ kɔ̃sɑn kĩrobu nge be. 7 Kpɑ i ku rɑ mɑɑ bũu sɑ̃ nge mɛ beɔnɔn gɑbu bɑ kuɑ. Domi bɑ yoruɑ, <<Tɔn be, bɑ sinɑ bɑ di, bɑ nɔrɑ, mɑ bɑ seewɑ bɑ kom bɛrɛtɛkɛ mɔ̀.>> 8 Su ku rɑ mɑɑ kurɔ dɑmɑru ko nge mɛ ben gɑbu bɑ kuɑ, mɑ ben nɔrɔbun subɑ yɛndɑ itɑ (23.000) bɑ kɑm kuɑ sɔ̃ɔ teerun sɔ̃ɔ. 9 Su ku rɑ mɑɑ Yinni mɛɛri nge mɛ u nɛ, nge mɛ ben gɑbu bɑ kuɑ, mɑ wɛɛ bu go go. 10 Su ku mɑɑ wɔki nge mɛ ben gɑbu bɑ kuɑ, mɑ gɔɔn gɔrɑdo u bu go.
11 Yeyɑ yɑ bu deemɑ nge yĩreru, mɑ bɑ ye yoruɑ bu kɑ sun kirɔ ko, bɛsɛ be sɑ wɑ̃ɑ hɑnduniɑn tɔ̃ɔ dɑ̃ɑki teni sɔɔ. 12 Yen sɔ̃, wi u tɑmɑɑ u yɔ̃ sim sim, u de u n tii sɛ kpɑ u ku rɑɑ wɔrumɛ. 13 I ǹ lɑɑkɑri mɛɛribu gɑbu wɑɑre mɑ n kun mɔ bi tɔmbu kpuro bɑ rɑ wɑ. Gusunɔ wi u sɑ̃ɑ nɑɑnɛgii, u ǹ derimɔ bu bɛɛn lɑɑkɑri mɛɛri n kere ye i ko kpĩ i kɑ tɛmɑnɑ. Adɑmɑ lɑɑkɑri mɛɛribu bɑɑbire sɔɔ u rɑ mɑɑ yɑri yeru ko kpɑ i kɑ kpĩ i tɛmɑnɑ bi sɔɔ.
14 Yen sɔ̃, kĩnɑsibu, i bũu sɑ̃ɑru suurio. 15 Nɑ kɑ bɛɛ gɑri mɔ̀wɑ nge lɑɑkɑrigibu. I de i lɑsɑbu ko ye nɑ gerumɔ. 16 Sɑ̀ n bɔnu mɔ nɔri domɑrugiɑ ye sɔɔ, ye sɑ kɑ Gusunɔ siɑrɑmɔ, sɑ ǹ bɔnu mɔ Kirisin yɛm sɔɔ? Sɑ̀ n pɛ̃ɛ ye yɑbuɑ, sɑ ǹ bɔnu mɔ Kirisin wɑsi sɔɔ? 17 Pɛ̃ɛ tiɑ yɑ wɑ̃ɑ. Bɑɑ sɑ̀ n dɑbi, sɑ sɑ̃ɑ wɑsi tee, domi bɛsɛ kpuro sɑ bɔnu mɔ pɛ̃ɛ tiɑ ye sɔɔ.
18 I bu mɛɛrio be bɑ mɑrɑ Isirelibɑ. Be bɑ yɑ̃kunu dimɔ, bɑ ǹ bɔnu mɔ yɑ̃ku yee te sɔɔ? 19 Ǹ n mɛn nɑ, mbɑ nɑ gerumɔ. Nɑ gerumɔ mɑ yɑɑ ye bɑ kɑ bũu yɑ̃kuru kuɑ yɑ sɑ̃ɑ gɑ̃ɑnu? Bũuwɑ sɑ̃ɑ gɑ̃ɑnu? 20 Aɑwo. Adɑmɑ nɑ gerumɔ mɑ ye bɑ kɑ yɑ̃kuru kuɑ, bũnɑ bɑ kɑ yɑ̃kuru kuɑ, n ǹ mɔ Gusunɔ. Nɑ ǹ mɑɑ kĩ i n bɔnu mɔ kɑ bũnu. 21 I ǹ kpɛ̃ i nɔ Yinnin nɔrɑ sɔɔ kpɑ i mɑɑ nɔ bũnun nɔrɑ sɔɔ. I ǹ kpɛ̃ i di ye yɑ wɑ̃ɑ Yinnin tɑbulu wɔllɔ, kpɑ i mɑɑ di ye yɑ wɑ̃ɑ bũnun tɑbulu wɔllɔ. 22 Sɑ kĩ su Yinnin nisinu seeyɑwɑ? Sɑ nùn dɑm kere?
I kpuro koowo
i kɑ Gusunɔ bɛɛrɛ wɛ̃
23 Bɑ ǹ tɔnu yinɑrimɔ u gɑ̃ɑnu kpuro ko, ɑdɑmɑ n ǹ mɔ ni kpuro nu ɑrufɑɑni mɔ. Bɑ ǹ tɔnu yinɑrimɔ u gɑ̃ɑnu kpuro ko ɑdɑmɑ n ǹ mɔ ni kpuro nu tɔnu tɑ̃sisiɑmɔ. 24 N ǹ weenɛ goo u win tiin ɑrufɑɑni kɑsu, mɑ n kun mɔ win winsimgiɑ.
25 Ye bɑ gesi dɔrɑmɔ yɑburɔ i dio, i ku gɑ̃ɑnu bikiɑ tii tɑɑrɛ wɛ̃ɛbun sɔ̃. 26 Domi tem sɑ̃ɑwɑ Yinni Gusunɔgim, kɑ gɑ̃ɑnu kpuro ni nu wɑ̃ɑ mɛ sɔɔ.
27 Nɑɑnɛ doke sɑrirugii ù n bɛɛ dim sokɑ, mɑ i gɔ̃ru doke i kɑ dɑ, gɑ̃ɑnu kpuro ye bɑ bɛɛ wɛ̃, i dio, i ku rɑ gɑ̃ɑnu bikie tii tɑɑrɛ wɛ̃ɛbun sɔ̃. 28-29 Adɑmɑ goo ù n bɛɛ sɔ̃ɔwɑ u nɛɛ, yeniwɑ bɑ kɑ yɑ̃kuru kuɑ i ku di yɛ̃ron gɔ̃run sɔ̃ wi u bɛɛ sɔ̃ɔwɑ, n ǹ mɔ bɛɛn tiin gɔ̃run sɔ̃.
Domi mbɑn sɔ̃nɑ kon de bu nɛn tii mɔru siri goon gɔ̃run sɔ̃. 30 Nɑ̀ n Gusunɔ siɑrɑ ye nɑ dimɔn sɔ̃, mbɑn sɔ̃nɑ nɑ kon de bu mɑɑ nɛn kɔ̃sɑ gere ye sɔɔ.
31 Ǹ n mɛn nɑ, ì n dimɔ ì n nɔrumɔ, ǹ kun mɛ ì n gɑ̃ɑnu gɑnu mɔ̀, i ye kpuro koowo i n kɑ Gusunɔ bɛɛrɛ wɛ̃ɛmɔ. 32 I ku rɑ Yuubɑ torɑsie ǹ kun mɛ Gɛrɛkibɑ ǹ kun mɛ Yesun yigbɛru te tɑ mɑɑ sɑ̃ɑ Gusunɔgiru. 33 Nɛn tii nɑ kookɑri mɔ̀ n kɑ kpuro ko ye yɑ koo tɔmbu kpuro dore, nɑ kun nɛn tiin ɑrufɑɑni kɑsu mɑ n kun mɔ tɔn dɑbirugiɑ, kpɑ bu kɑ fɑɑbɑ wɑɑrɑ.