3
Gusunɔn sɔm kowobu
1 Nɛgibu nɑ ǹ kpĩɑ nɑ kɑ bɛɛ gɑri kue nge mɛ nɑ rɑ ko kɑ be bɑ wɑ̃ɑ kɑ Hunden bɑɑ. Adɑmɑ nɑ kɑ bɛɛ kuɑwɑ nge be bɑ wɑ̃ɑ kɑ wɑsin bɑɑ, be bɑ sɑ̃ɑ bii wɛ̃ɛnu Kirisi sɔɔ. 2 Bomɑ nɑ bɛɛ wɛ̃, n ǹ mɔ dĩɑ dɔkɑ, domi i ǹ turɑ be bɑ koo dĩɑ dɔkɑ mwɛ, i ǹ mɑm turɑ kɑ tɛ̃ 3 yèn sɔ̃ i wɑ̃ɑ kɑ wɑsin bɑɑ ginɑ. Domi sɑnɑm mɛ nisinu kɑ sikirinɔsu wɑ̃ɑ bɛɛn suunu sɔɔ, i ǹ sɔ̃ɔsimɔ mɑ i wɑ̃ɑ kɑ wɑsin bɑɑ? Bɛɛn sɑnu sɑnusu kun sɑ̃ɑ nge hɑnduniɑgisu? 4 Domi bɛɛn goo ù n gerumɔ wiyɑ Pɔlugii, kpɑ goo u nɛɛ wiyɑ Apologii, i ǹ sɑ̃ɑ nge tɔn be bɑ tie?
5 Wɑrɑ rɑ n Apolo. Nge wɑrɑ rɑ n Pɔlu. Bɑ sɑ̃ɑwɑ sɔm kowobu bèn min di i nɑɑnɛ doke nge mɛ Yinni u ben bɑɑwure win sɔmburu wɛ̃. 6 Nɛnɑ nɑ duurɑ, mɑ Apolo u nim yɛ̃kɑ, ɑdɑmɑ Gusunɔwɑ u kpɛ̃ɑsiɑmɔ. 7 Ǹ n mɛn nɑ, wi u duurumɔ kɑ wi u nim yɛ̃kɑmɔ bɑ ǹ sɑ̃ɑ gɑ̃ɑnu, mɑ n kun mɔ Gusunɔ wi u kpɛ̃ɑsiɑmɔ. 8 Duuro kɑ wi u nim yɛ̃kɑmɔ bɑ sɑ̃ɑwɑ tiɑ, ben bɑɑwure koo win ɑre mwɑ nge mɛ win sɔmburɑ nɛ. 9 Domi bɛsɛ Gusunɔwɑ sɑ sɔmburu kuɑmmɛ sɑnnu. Bɛɛ mɑɑ i sɑ̃ɑwɑ win gberu.
I mɑɑ sɑ̃ɑ win gɑni beki. 10 Durom mɛ Gusunɔ u mɑn wɛ̃n sɑɑbu, nɛnɑ nɑ kpɛɛkpɛɛku surɑ nge bɑni yɛ̃ro, mɑ gɑbɑ bɑnimɔ gen wɔllɔ. Adɑmɑ i de bɑɑwure u lɑɑkɑri ko nge mɛ u bɑnisinɑmɔ. 11 Domi goo kun kpɛ̃ u mɑɑ kpɛɛkpɛɛku gɑgu surɑ mɑ n kun mɔ ge bɑ sure, geyɑ gɑ sɑ̃ɑ Yesu Kirisi. 12 Wi u bɑnɑ kpɛɛkpɛɛku gen wɔllɔ kɑ wurɑ kɑ sii geesu, kɑ kpee kpikinu, wi u mɑɑ bɑnɑ kɑ dɑ̃ɑ kɑ tɑkɑ nɔɔ kɑ wĩi, 13 bɑɑwuren sɔmburɑ koo sɔ̃ɔsirɑ domi siribun tɔ̃ru tɑ koo tu terɑsiɑ, yèn sɔ̃ dɔ̃ɔwɑ tɑ koo kɑ nɑ kpɑ dɔ̃ɔ wi, u bɑɑwuren sɔmburun dɑm mɛɛri. 14 Wi u bɑnɑ kpɛɛkpɛɛku gen wɔllɔ mɑ win bɑnɑ kun dɔ̃ɔ mwɑɑre, u koo ɑre wɑ. 15 Wìn sɔmburɑ mɑɑ dɔ̃ɔ mwɑɑrɑ, wiyɑ u gbisirɑ. Win tii u koo fɑɑbɑ wɑ, ɑdɑmɑ u ko n sɑ̃ɑwɑ nge wi u dɔ̃ɔ soorɑ u yɑrɑ.
16 I ǹ yɛ̃ mɑ i sɑ̃ɑwɑ Gusunɔn wɑ̃ɑ yeru? I ǹ yɛ̃ mɑ win Hunde wɑ̃ɑ bɛɛ sɔɔ? 17 Yen sɔ̃, goo ù n Gusunɔn wɑ̃ɑ yeru sɑnkɑ, Gusunɔ u koo yɛ̃ro sɑnku. Domi Gusunɔn wɑ̃ɑ yerɑ dɛɛre tɑ kɑ yii win sɔ̃, bɛɛyɑ mɑɑ wɑ̃ɑ yee te.
18 I ku de goo u win tii nɔni wɔ̃ke. Bɛɛn wi u tɑmɑɑ u bwisi mɔ hɑnduniɑ ye sɔɔ, u de u ko gɑri bɔkɔ kpɑ u bwisi gee wɑ u mwɑ. 19 Domi hɑnduniɑn bwisi sɑ̃ɑwɑ wiirɑru Gusunɔn nɔni sɔɔ. Bɑ yoruɑ, <<U rɑ dewɑ bwisigibun tiin bwisi yi bu yinɑ mwɑ.>> 20 Bɑ kpɑm yoruɑ bɑ nɛɛ, <<Yinni Gusunɔ u tɔmbun bwisikunu yɛ̃, u yɛ̃ mɑ nu sɑ̃ɑwɑ kɑm dirum.>> 21 Ǹ n mɛn nɑ, goo u ku woo kɑnɑ tɔnun sɔ̃ domi gɑ̃ɑnu kpuro bɛɛginɑ. 22 Pɔlu kɑ Apolo kɑ Sefɑ kɑ hɑnduniɑ kɑ wɑ̃ɑru kɑ gɔɔ kɑ ye n wɑ̃ɑ gisɔ kɑ ye n sisi siɑ, ye kpuro yɑ sɑ̃ɑwɑ bɛɛgiɑ. 23 Bɛɛ mɑɑ Kirisigibɑ, Kirisi mɑɑ sɑ̃ɑ Gusunɔgii.