4
Kirisin gɔrobu
1 I de bu sun gɑrisi Kirisin sɔm kowobu be Gusunɔ u win ɑsirin gɑri nɔmu sɔndiɑ. 2 Be bɑ mɑɑ gɑ̃ɑnu nɔmu sɔndiɑ n weenɛwɑ bɑ n sɑ̃ɑ nɑɑnɛgibu. 3 Adɑmɑ gɑ̃ɑ piimunɑ nɛn mi, bɛɛ ì n mɑn siri, ǹ kun mɛ bɑ̀ n mɑn siri tɔmbun wuswɑɑɔ. Kɑ gem nɑ ǹ nɛn tii siri. 4 Nɑ ǹ gɑ̃ɑnu yɛ̃ nɛ sɔɔ ye yɑ mɑn tɑɑrɛ wɛ̃ɛmɔ, ɑdɑmɑ n ǹ mɔ bɑ mɑn gem wɛ̃ yen sɔ̃. Domi Yinniwɑ sɑ̃ɑ nɛn siri kowo. 5 Yen sɔ̃, i ku rɑ mɑɑ gɑ̃ɑnun siribu ko tɔ̃ɔ te, tu sere nɑ sere Yinni ù n tunumɑ. Wiyɑ u koo kpuro yɑrɑmɑ bɑtumɑɔ ye yɑ beruɑ wɔ̃kuru sɔɔ, kpɑ u tɔmbun gɔ̃rusun bwisikunu sɔ̃ɔsi. Sɑnɑm mɛ sɔɔrɑ bɑɑwure u koo win siɑrɑbu nɔ Gusunɔn mi.
6 Bɛɛn sɔ̃nɑ, nɛgibu, nɑ gɑri yi kpuro weesinɑ nge nɛ kɑ Apolo, kpɑ i kɑ giɑ bɛsɛn min di nge mɛ i ǹ ko woodɑ sɑrɑ ye bɑ yoruɑ, bɛɛn goo u ku kɑ tii suɑ bɛsɛn turon sɔ̃ kpɑ u n turo gɛmɑ. 7 A tɑmɑɑ goo nun mɛɛrɑ ɑ gɑbu sɑnɔ kere? Mbɑ ɑ mɔ ye bɑ ǹ nun kɑ̃. Mɑ̀ ɑ yɛ̃ bɑ nun kɑ̃wɑ, mbɑ n kuɑ ɑ kɑ woo kɑnɑmɔ nge wi u kɑ tii wɑ.
8 I debɑ kɔ. I kuɑ dukiɑgibu. I tɑmɑɑ i bɑndu dii bɛsɛn sɑriru. N ko n dɑɑ wɛ̃rɑ ì n bɑndu dii kɑ gem, kpɑ bɛsɛ kɑ bɛɛ sɑ n sɑ̃ɑ bɑn diobu sɑnnu. 9 Domi nɑ lɑsɑbu kuɑ mɑ Gusunɔ u sun ɑye dɑ̃ɑkiru wɛ̃, bɛsɛ gɔrobu, nge be bɑ tɑɑrɛ wɛ̃ bu go. Bɑɑwure hɑnduniɑ sɔɔ, wɔllun gɔrɑdobɑ kɑ tɔmbu kpuro bɑ sun mɛɛrɑ nge be bɑ dweebu duɑ. 10 Bɛsɛ sɑ sɑ̃ɑ gɑri bɑkɑsu Kirisin sɔ̃, ɑdɑmɑ bɛɛ i sɑ̃ɑ bwisigibu Kirisi sɔɔ. Bɛsɛ sɑ ǹ dɑm mɔ, bɛɛyɑ i dɑm mɔ. I kuɑ ɑtɑsiribɑ mɑ bɛsɛ sɑ kuɑ bɛɛrɛ sɑribɑ. 11 Sere n kɑ kuɑ sɑɑ yeni sɔɔ gɔ̃ɔrɑ sun goowɑ mɑ nim nɔru gɑ sun mɔ̀, sɑ wɑ̃ɑ tereru, bɑ sun soomɔ, sɑ ǹ mɑɑ wɑ̃ɑ yeru gɑru mɔ. 12 Mɑ sɑ hɑniɑ mɔ̀ sɑ kɑ bɛsɛn nɔmɑ sɔmburu mɔ̀. Bɑ̀ n sun fɑɑrɑ sɔ̃ɔmɔ, sɑ rɑ n bu domɑru kuɑmmɛwɑ. Bɑ̀ n mɑɑ sun nɔni sɔ̃ɔmɔ, sɑ rɑ n tɛmɑnɛwɑ. 13 Bɑ̀ n sun mɛm mɑnimɔ, sɑ rɑ n suuru kɑnɑmɔwɑ. Sere kɑ tɛ̃ bɑ sun mɛɛrɑ nge weke gɔ̃ɔri kɑ gɑ̃ɑnu kpuron kubɑnu.
14 Nɑ ǹ yeni yorumɔ n kɑ bɛɛ sekuru doke ɑdɑmɑ n kɑ bɛɛ gerisiwɑ nge nɛn bii kĩnɑsibu. 15 Bɑɑ ì n bɑɑbɑ nɛruro dɑbinu mɔ Kirisi sɔɔ, i ǹ tundo dɑbinu mɔ, domi nɛnɑ nɑ kuɑ bɛɛn tundo Yesu Kirisi sɔɔ Lɑbɑɑri geɑn sɑɑbu. 16 Ǹ n mɛn nɑ, nɑ bɛɛ yiiremɔ i n dɑ mɑn sɑɑri. 17 Yen sɔ̃nɑ nɑ bɛɛ nɛn bii kĩnɑsi Timɔte gɔriɑ wi nɑ nɑɑnɛ sɑ̃ɑ Yinni sɔɔ. Wiyɑ u koo bɛɛ yɑɑyɑsiɑ nge mɛ nɛn wɑ̃ɑrɑ sɑ̃ɑ Kirisi sɔɔ, nge mɛ nɑ rɑ sɔ̃ɔsi bɑɑmɑ Yesun yigbɛnu kpuro sɔɔ.
18 Tɛ̃ wee, gɑbɑ tii suɑmɔ nge nɑ ǹ mɑɑ sisi bɛɛn mi. 19 Adɑmɑ ǹ n sosi kon nɑ bɛɛn mi ǹ n sɑ̃ɑ Yinnin kĩru. Kon mɑɑ be bɑ tii suɑmɔ min dɑm giɑ, n ǹ mɔ ben gɑri tɔnɑ. 20 Domi Gusunɔn bɑndu tɑ ǹ sɔ̃ɔsirɑmɔ gɑri gerubu sɔɔ, mɑ n kun mɔ dɑm sɔɔ mɛ mu sɔmburu mɔ̀. 21 Mbɑ i kĩ. N nɑ kɑ bokuru? Nge kɑ kĩru kɑ dɑɑ tɛɛrugiɑ.