2
Bɑ Kirisin gɑri kpɑrɑmɔ
wi bɑ kpɑre dɑ̃ɑ bunɑnɑrɔ
1 Nɛgibu, sɑnɑm mɛ nɑ nɑ bɛɛn mi nɑ ǹ Gusunɔn gɑri kpɑre kɑ bwisi bɛkɛ gɛɛ ǹ kun mɛ kɑ nɔɔ dobu gɑbu. 2 Domi nɑ ǹ gɔ̃ru doke nɑ n gɑ̃ɑ tukunu yɛ̃ bɛɛn suunu sɔɔ mɑ n kun mɔ Yesu Kirisi wi bɑ kpɑre dɑ̃ɑ bunɑnɑru wɔllɔ. 3 Nɑ dɑ bɛɛn mi kɑ dɑm sɑriru kɑ bɛrum kɑ diiri bɑkɑbu. 4 Nɛn gɑri kɑ nɛn wɑɑsu kun sɑ̃ɑ nɛn tiin bwisi ǹ kun mɛ nɛn nɔɔ dobu, ɑdɑmɑ n sɑ̃ɑwɑ Hunden dɑm kɑ win sɔ̃ɔsiru. 5 Kpɑ bɛɛn nɑɑnɛ dokebu bu ku kɑ yɔ̃rɑ tɔnun bwisi sɔɔ mɑ n kun mɔ Gusunɔn dɑm sɔɔ.
Gusunɔn bwisin gɑri
6 Kɑ mɛ, bɛsɛ sɑ bwisi gɛɛn gɑri kpɑrɑmɔ tɔn girobun suunu sɔɔ, yi yi kun sɑ̃ɑ sɑɑ yenin bwisi, ǹ kun mɛ sɑɑ yenin wirugibun bwisi be bɑ kɑm kobu dɔɔ. 7 Adɑmɑ Gusunɔn bwisi ɑsirigiiyɑ sɑ kpɑrɑmɔ yi yi beruɑ, yìn sɔɔru Gusunɔ u kuɑ sɑɑ toren di, su kɑ ko yiikogibu. 8 Sɑɑ yenin wirugibu bɑ ǹ yi tubɑ bɑɑ tɔn turo, domi bɑ̀ n dɑɑ yi tubɑn nɑ, bɑ ǹ dɑɑ Yinni yiikogii kpɑremɔ dɑ̃ɑ bunɑnɑrɔ. 9 Adɑmɑ nge mɛ bɑ yoruɑ,
<<Ye nɔni kun wɑɑre, ye swɑɑ kun nɔɔre,
ye yɑ ǹ mɑɑ duure tɔnun gɔ̃ru sɔɔ,
yeyɑ Gusunɔ u bu sɔɔru kuɑ be bɑ nùn kĩ.>>
10 Mɑ u sun ye sɔ̃ɔsi sɑɑ win Hunden min di. Domi Hunde wi, u rɑ n kpuro mɛɛrɑ u n kɑ yɛ̃, bɑɑ ye n wɑ̃ɑ Gusunɔn tii sɔɔ. 11 Nge wɑrɑ u tɔnun bwisikunu yɛ̃ mɑ n kun mɔ win tiin hunde ye yɑ wɑ̃ɑ wi sɔɔ. Nge mɛyɑ mɑɑ goo kun Gusunɔn bwisikunu yɛ̃ mɑ n kun mɔ win Hunde. 12 Win Hunde wiyɑ sɑ mwɑ, n ǹ mɔ hɑnduniɑn hunde, kpɑ sɑ n kɑ yɛ̃ ye Gusunɔ u sun kɑ̃ win durom sɔɔ. 13 Sɑ ǹ mɑɑ ɑsiri ye tubusiɑmɔ kɑ gɑri yi yi wee tɔnun bwisin di, mɑ n kun mɔ sɑɑ Gusunɔn Hunden min di, sɑ n kɑ hunden gɑri bu sɔ̃ɔsimɔ be bɑ Hunde wi mɔ.
14 Hɑnduniɑgii u ǹ Gusunɔn Hunden gɑri wurɑmɔ, domi wiirɑrɑ yi sɑ̃ɑ win mi. Yi ǹ kpɛ̃ yi nùn yeeri, domi Hunden tiiwɑ u yi tubusiɑmɔ. 15 Wi u wɑ̃ɑ kɑ Hunden bɑɑ, wiyɑ gɑ̃ɑnu kpuro rɑ yeeri, ɑdɑmɑ goo sɑri wi win gɑri rɑ yeeri.
16 <<Domi wɑrɑ u Yinnin bwisikunu yɛ̃.
Wɑrɑ u nùn bwisi kɛ̃ɛre.>>
Goo sɑri. Adɑmɑ bɛsɛrɑ sɑ Kirisin bwisikunu yɛ̃.