TIRE GBIIKIRU TE PƆLU
U KORINTIGIBU KUA
1
Tɔbiribu
1-2 Bɛɛ Gusunɔn yigbɛrugibu, bɛɛ be i wɑ̃ɑ Korintiɔ, bɛɛ be u sokɑ i kɑ ko wigibu, mɑ u bɛɛ gɔsɑ u yii i n kɑ gbinnɛ kɑ Kirisi Yesu, nɛ Pɔluwɑ, wi Gusunɔ u sokɑ win kĩru sɔɔ n kɑ ko Yesu Kirisin gɔro, kɑ Sɔsitɛni, bɛsɛgii, sɑ bɛɛ tɔburɑ. Sɑ mɑɑ be kpuro tɔburɑ be bɑ Yinni Yesu Kirisin yĩsiru sokumɔ bɑɑmɑ, wi u sɑ̃ɑ ben Yinni kɑ bɛsɛn Yinni. 3 Gusunɔ bɛsɛn Bɑɑbɑ kɑ Yinni Yesu Kirisi bu bɛɛ durom kuɑ kpɑ bu bɛɛ ɑlɑfiɑ wɛ̃.
Kɛ̃ɛ ni bɑ mwɑ Kirisi sɔɔ
4 Bɑɑdommɑ nɑ rɑ n Gusunɔ siɑrɑmɔ bɛɛn sɔ̃, win durom sɑɑbu mɛ bɑ bɛɛ wɛ̃ bɛɛ kɑ Kirisi Yesun gbinnɑɑ sɔɔ. 5 Bɑ bɛɛ kuɑ dukiɑgibu bɑɑyere sɔɔ, kɑ gɑrin gerubu, kɑ yɛ̃ru kpuro, sɑɑ win min di. 6 Yɑ sɔ̃ɔsimɔ mɑ seedɑ ye nɑ Kirisi diiyɑ bɛɛn suunu sɔɔ yɑ ǹ kɑm kue. 7 I ǹ Hunden kɛ̃ru gɑru bie i n kɑ mɑrɑ sere bɛsɛn Yinni Yesu Kirisi u kurɑmɑ. 8 Wiyɑ u koo bɛɛ yɔ̃re sere kɑ nɔrɔ, kpɑ i kɑ yɔ̃rɑ tɑɑrɛ sɑriru sɔɔ tɔ̃ɔ tè sɔɔ u koo nɑ. 9 Gusunɔ nɑɑnɛgiiwɑ, wi u bɛɛ sokɑ i n kɑ nɔɔ tiɑ sɑ̃ɑ kɑ win Bii Yesu Kirisi bɛsɛn Yinni.
Kɑrɑnɑbu Yesun yigbɛru sɔɔ
10 Nɑ bɛɛ yiiremɔ nɛgibu, kɑ bɛsɛn Yinni Yesu Kirisin yĩsiru, i de i n gɑri tee gerunɑmɔ, kpɑ kɑrɑnɑbu bu ku rɑɑ du bɛɛn suunu sɔɔ. I de i n bwisiku teenu mɔ. 11 Domi Kolowen tɔmbu bɑ mɑn sɔ̃ɔwɑ mɑ sikirinɔsu wɑ̃ɑ bɛɛn suunu sɔɔ nɛgibu. 12 Yeniwɑ nɑ nuɑ mɑ wini gerumɔ wiyɑ Pɔlugii, kpɑ wini nɛɛ, wiyɑ Apologii, kpɑ wini mɑɑ nɛɛ, wiyɑ Sefɑgii, kpɑ goo u n mɔ̀, wiyɑ Kirisigii. 13 Kirisi u sɑ̃ɑ yiru ro? Bɑ Pɔlu go dɑ̃ɑ bunɑnɑru wɔllɔ bɛɛn sɔ̃? Nge kɑ Pɔlun yĩsirɑ bɑ bɛɛ bɑtɛmu kuɑ?
14 Aɑwo, nɑ Gusunɔ sɑɑbu kuɑ ye nɑ ǹ kɑ bɛɛn goo bɑtɛmu kue mɑ n kun mɔ Kirisipu kɑ Gɑyusi. 15 Nge mɛyɑ goo kun kpɛ̃ u gere mɑ bɑ bɛɛ bɑtɛmu kuɑ kɑ nɛn yĩsiru. 16 Geemɑ, nɑ mɑɑ Setefɑnin yɛnugibu bɑtɛmu kuɑ. Be bɑɑsi nɑ ǹ yɛ̃ nɑ̀ n goo bɑtɛmu koore. 17 Domi Kirisi kun mɑn gɔre n kɑ bɑtɛmu ko mɑ n kun mɔ n kɑ Lɑbɑɑri geɑn wɑɑsu ko, n ǹ mɑɑ mɔ kɑ gɑri yɛ̃ru, kpɑ Kirisin gɔɔ dɑ̃ɑ bunɑnɑru wɔllɔn dɑm mu ku rɑɑ ko kɑm.
Kirisi sɑ̃ɑ Gusunɔn dɑm
kɑ Gusunɔn bwisi
18 Domi Kirisin gɔɔ dɑ̃ɑ bunɑnɑru wɔllɔn gɑri, wiirɑrɑ be bɑ kɑm mɔ̀n mi, ɑdɑmɑ bɛsɛ be sɑ fɑɑbɑ wɑɑmɔn mi, Gusunɔn dɑmɑ. 19 Domi bɑ yoruɑ mɑ Gusunɔ u nɛɛ,
<<Kon lɑɑkɑrigibun lɑɑkɑri kɑm koosiɑ,
kpɑ n bwisigibun bwisi kpeerɑsiɑ.>>
20 Mɑnɑ bwisigii wɑ̃ɑ. Mɑnɑ woodɑ yɛ̃ro wɑ̃ɑ. Mɑnɑ sɑɑ yenin sikirinɔsugibɑ wɑ̃ɑ. Gusunɔ u ǹ hɑnduniɑn bwisi kue wiirɑru?
21 Domi Gusunɔn bwisi sɔɔ u ǹ dere hɑnduniɑgibu bɑ nùn gie kɑ ben tiin bwisi. Yen sɔ̃nɑ n nùn wɛ̃re u kɑ tɔmbu fɑɑbɑ ko be bɑ nùn nɑɑnɛ doke, kɑ win gɑrin wɑɑsu yi bɑ tɑmɑɑ wiirɑru. 22 Geemɑ, Yuubɑ bɑ yĩrenu bikiɑmɔ, Gɛrɛkibɑ bɑ mɑɑ bwisi kɑsu. 23 Adɑmɑ bɛsɛ sɑ Kirisin wɑɑsu mɔ̀ wi bɑ kpɑre dɑ̃ɑ bunɑnɑru wɔllɔ, ye n kuɑ wiirɑru tɔn tukobun mi mɑ yɑ derɑ Yuubɑ bɑ ǹ nɑɑnɛ doke. 24 Adɑmɑ be bɑ sokɑn mi, bɑ̀ n sɑ̃ɑn nɑ Yuubɑ ǹ kun mɛ tɔn tukobu, Kirisi kuɑ Gusunɔn dɑm kɑ Gusunɔn bwisi. 25 Domi Gusunɔn wiirɑru tɑ tɔmbun bwisi kere, Gusunɔn dɑm sɑriru tɑ mɑɑ tɔmbun dɑm kere.
26 Nɛgibu i mɛɛrio nge mɛ bɑ kɑ bɛɛ sokɑ. N ǹ mɔ mɑ bɛɛn dɑbinu sɑ̃ɑ hɑnduniɑn bwisigibu ǹ kun mɛ yen dɑmgibu ǹ kun mɛ sinɑ bibu. 27 Adɑmɑ Gusunɔ u bu gɔsɑ be hɑnduniɑgibɑ mɛɛrɑ nge gɑri bɑkɑsu u kɑ bwisigibu sekuru doke, u mɑɑ hɑnduniɑn dɑm sɑrirugibu gɔsɑ u kɑ dɑmgibu sekuru doke. 28 Gusunɔ u mɑɑ bwɛ̃ɛbwɛ̃ɛbu gɔsɑ kɑ be bɑ gɛmɑ kɑ be bɑ ǹ sɑ̃ɑ gɑ̃ɑnu hɑnduniɑ ye sɔɔ u kɑ bu kɑwɑ mɑm mɑm be bɑ mɛɛrɑ gɑ̃ɑnu. 29 Kpɑ goo u ku rɑɑ kɑ woo kɑnɛ Gusunɔn wuswɑɑɔ, bɑɑ turo. 30 Adɑmɑ u derɑ i gbinnɛ kɑ Yesu Kirisi mɑ u nùn kuɑ bɛsɛn bwisi kɑ bɛsɛn gem. Wi sɔɔrɑ sɑ mɑɑ dɛɛrɑru kɑ yɑkiɑbu wɑ. 31 Yen sɔ̃, <<Wi u woo kɑnɑmɔ, u woo kɑnɔ Yinnin sɔ̃,>> nge mɛ bɑ yoruɑ.