Romu 10

¹ Nɛgibu, ye nɑ kĩ kɑ nɛn gɔ̃ru kpuro kɑ ye nɑ rɑ n Gusunɔ kɑnɑmɔ, yeyɑ nɛn bweseru tu fɑɑbɑ wɑ. ² Domi nɑ bu seedɑ yeni diiyɑmmɛ, bɑ hɑniɑ mɔ Gusunɔn sɔ̃, ɑdɑmɑ yɛ̃ru sɑri. ³ Bɑ ǹ swɑɑ yɛ̃ ye Gusunɔ u rɑ kɑ tɔnu gem wɛ̃, mɑ bɑ swɑɑ kɑsu bu kɑ ben tiin gem yɑrɑ. Yen sɔ̃nɑ bɑ ǹ Gusunɔn gem swɑɑ wiru kpĩiyɛ. ⁴ Domi Kirisiwɑ sɑ̃ɑ woodɑn kɔkɔrɔ kpɑ bɑɑwure wi u nùn nɑɑnɛ doke u gem wɑ Gusunɔn mi.

Fɑɑbɑ sɑ̃ɑ bɑɑwuregiɑ

wi u Yinni nɑɑnɛ doke

⁵ Domi Mɔwisi u yoruɑ u nɛɛ, <<tɔnu wi u geɑ mɔ̀ ye woodɑ yɑ yiiremɔ, geɑ yen min diyɑ u koo wɑ̃ɑru wɑ>>. ⁶ Adɑmɑ nge mɛ bɑ koo tɔnu gem wɛ̃ nɑɑnɛ dokebun sɔ̃, yen gɑri wee, <<A ku gere wunɛn gɔ̃ruɔ ɑ nɛɛ, wɑrɑ u koo yɔ Gusunɔ wɔllɔ.>> Yen tubusiɑnɑ, u kɑ Kirisi sɑrɑsiɑmɑ. ⁷ A ku mɑɑ gere, <<Wɑrɑ u koo du tem sɔɔwɔ.>> Yen tubusiɑnɑ, u kɑ Kirisi seesiɑ gɔrin di. ⁸ Adɑmɑ mbɑ gɑri yi, yi geruɑ. Yi nɛɛwɑ, <<Gusunɔn gɑri yi, yi wɑ̃ɑ wunɛn turuku, yi mɑm wɑ̃ɑ wunɛn nɔɔwɔ kɑ wunɛn gɔ̃ruɔ.>> Yi sɑ̃ɑwɑ nɑɑnɛ dokebun gɑri yi sɑ wɑɑsu mɔ̀, yi yi nɛɛ, ⁹ ɑ̀ n kɑ wunɛn nɔɔ wurɑ mɑ Yesu sɑ̃ɑwɑ Yinni, mɑ ɑ nɑɑnɛ doke wunɛn gɔ̃ruɔ mɑ Gusunɔ u nùn seeyɑ gɔrin di, kɑɑ fɑɑbɑ wɑ. ¹⁰ Domi gɔ̃ru sɔɔrɑ tɔnu u rɑ nɑɑnɛ doke, u kɑ gem wɑ Gusunɔn mi, nɔɔwɑ bɑ rɑ mɑɑ kɑ seedɑ di bu kɑ fɑɑbɑ wɑ. ¹¹ Nge mɛ bɑ yoruɑ Gusunɔn gɑri sɔɔ bɑ nɛɛ, <<Bɑɑwure wi u nùn nɑɑnɛ doke, u ǹ sekuru wɑsi.>> ¹² Domi wunɑnɑbu sɑri Yuubɑ kɑ tɔn tukobu sɔɔ. Be kpuro Yinni turowɑ bɑ mɔ. Win dukiɑ mɑɑ sɑ̃ɑ be bɑ nùn sokumɔ kpurogiɑ. ¹³ Domi bɑ yoruɑ bɑ nɛɛ, <<Bɑɑwure wi u Yinnin yĩsiru sokɑ, u koo fɑɑbɑ wɑ.>>

¹⁴ Adɑmɑ ɑmɔnɑ bɑ koo kɑ nùn soku, bɑ̀ kun nùn nɑɑnɛ doke. Amɔnɑ bɑ koo mɑɑ kɑ nɑɑnɛ doke bɑ̀ kun win gɑri nɔɔre. Amɔnɑ bɑ koo mɑɑ nɔ goo ù kun gɑri yi wɑɑsu koore. ¹⁵ Amɔnɑ bɑ koo kɑ gɑri yi wɑɑsu ko goo ù kun bu gɔre. Nge mɛ bɑ yoruɑ, <<Annɑ ɑ ben nɑɑrun dobu nɔ be bɑ Lɑbɑɑri geɑ kpɑrɑmɔ.>> ¹⁶ Adɑmɑ n ǹ be kpuro bɑ Lɑbɑɑri geɑ wurɑ, domi Gusunɔn sɔmɔ Esɑi u nɛɛ, <<Yinni, wɑrɑ u nɑɑnɛ doke ye sɑ nɔɔsiɑ.>> ¹⁷ Nge mɛyɑ nɑɑnɛ dokebu bu wee ye tɔnu nɔɔmɔn di. Ye tɔnu nɔɔmɔ, yɑ mɑɑ sɑ̃ɑwɑ Kirisin gɑri.

¹⁸ Adɑmɑ nɑ bikiɑmɔ, kɑ geemɑ bɑ ǹ nɔɔre ro? Bɑ nuɑ. Domi bɑ yoruɑ,

<<Nɔɔ ge, gɑ nɔɔrɑ tem kpuro sɔɔ,

mɑ gɑri yi, yi turɑ sere hɑnduniɑn nɔrɔ.>>

¹⁹ Nɑ bikiɑmɔ kpɑm, Isirelibɑ bɑ ǹ yɛ̃ ro? Gbiikɑɑ, Mɔwisi u yoruɑ, mɑ Gusunɔ u nɛɛ,

<<Nɑ kon bɛɛn nisinu seeyɑ kɑ bwese te i ǹ gɑrisi gɑ̃ɑnu.

Kon mɑɑ bɛɛn mɔru seeyɑ kɑ bwese bwisi sɑrirugiru.>>

²⁰ Yen biru Esɑi u yoruɑ kɑ toro sindu mɑ Gusunɔ u nɛɛ,

<<Be bɑ ǹ mɑn kɑsu bɑ mɑn wɑ.

Nɑ mɑɑ bu nɛn tii sɔ̃ɔsi be bɑ ǹ mɑn bikiɑmɔ.>>

²¹ Adɑmɑ u mɑɑ yoruɑ Isirelibɑn sɔ̃ mɑ Gusunɔ u nɛɛ, <<Nɑ tɔn be bɑ rɑ n mɑn seesimɔ nɔmɑ gɑ̃ri tɔ̃ru kpuro.>>