11
Gusunɔ u ǹ Isirelibɑ yinɛ
1 Ǹ n mɛn nɑ, nɑ bikiɑmɔ, Gusunɔ u win tɔmbu yinɑwɑ? Aɑwo. Su ku wɑ mɛ. Domi nɛn tii nɑ sɑ̃ɑ Isirelin bii, Aburɑhɑmun sikɑdobu Bɛnyɑmɛɛn bweseru sɔɔ. 2 Gusunɔ u ǹ win tɔmbu yinɛ be u giɑ yellun di. Nge i ǹ yɛ̃ ye bɑ yoruɑ Gusunɔn gɑri sɔɔ sɑnɑm mɛ Eli u kɑ Isirelibɑn tɑɑrɛ dɑ Gusunɔn mi? U nɛɛ, 3 <<Yinni, bɑ wunɛn sɔmɔbu go bɑ wunɛn yɑ̃ku yenu sururɑ. Nɛ turowɑ nɑ tie, bɑ mɑɑ kɑsu bu mɑn hunde wunɑ.>> 4 Adɑmɑ mbɑ Gusunɔ u wisɑ. U nɛɛ, <<Nɑ nɛn tii tɔmbu nɔrɔbun subɑ nɔɔbɑ yiru (7.000) derie, be bɑ kun yiirɑre bũu wi bɑ mɔ̀ Bɑɑlin nuurɔ.>> 5 Mɛyɑ n mɑɑ sɑ̃ɑ sɑɑ yeni sɔɔ. Ben sukum wɑ̃ɑ be Gusunɔ u gɔsɑ win durom sɔ̃. 6 U bu gɔsɑwɑ durom sɔ̃, n ǹ mɔ ben sɔmɑn sɔ̃. Mɑ n kun mɛ, durom kun mɑɑ sɑ̃ɑ durom.
7 Ǹ n mɛn nɑ, mbɑ sɑ ko gere. Isirelibɑ wee, bɑ ǹ wɑ ye bɑ kɑsu. Ben be Gusunɔ u gɔsɑ, beyɑ bɑ wɑ. Be bɑ tie bɑ gɔ̃ru bɔbiɑ. 8 Nge mɛ bɑ yoruɑ, <<Gusunɔ u ben lɑɑkɑri sikɑrisiɑ. U bu nɔni wɛ̃ yi bɑ ǹ kpɛ̃ bu kɑ yɑm wɑ. U mɑɑ bu swɑsu wɛ̃ si bɑ ǹ kpɛ̃ bu kɑ gɑri nɔ sere kɑ gisɔ.>> 9 Mɑ Dɑfidi u nɛɛ,
<<Kpɑ ben tɔ̃ɔ bɑkɑ dim mu de bu torɑ
kpɑ bu yinɑ mwɑɑrɑ,
kpɑ bu sɛɛyɑsiɑbu wɑ bi bu kɑ bu dɛnde.
10 A de ben nɔni yi wukiri bu ku kɑ wɑ.
Kpɑ ɑ de bɑ n bu tɑɑre kɑ bɑɑdommɑɔ.>>
11 Yen sɔ̃nɑ nɑ bikiɑmɔ, sɑnɑm mɛ Isirelibɑ bɑ sokurɑ, bɑ wɔrumɑwɑ mɑm mɑm? Su ku wɑ mɛ. Ben torɑrun sɑɑbuwɑ tɔn tukobu bɑ fɑɑbɑ wɑ, kpɑ ben nisinu nu kɑ se. 12 Tɛ̃ Isirelibɑn torɑru tɑ̀ n kɑ hɑnduniɑgibu hunden dukiɑ nɑɑwɑ, ben kɑɑrɑbu bù n mɑɑ tɔn tukobu kuɑ gɑ̃ɑ mɔwɔbu, ɑnnɑ yen domɑrun kpɑ̃ɑru tɑ ko n nɛ bɑ̀ n wurɑ nge mɛ bɑ rɑɑ sɑ̃ɑ.
Tɔn tukobun fɑɑbɑ
13 Nɑ kɑ bɛɛ gɑri mɔ̀, bɛɛ tɔn tukobu. Nɛ wi nɑ sɑ̃ɑ gɔro tɔn tukobun mi, nɑ nɛn sɔmburu bɛɛrɛ wɛ̃ɛmɔ 14 n kɑ nisinu seeyɑ ǹ n koo koorɑ nɛn bweserun suunu sɔɔ kpɑ n ben gɑbu fɑɑbɑ ko. 15 Geemɑ sɑnɑm mɛ Gusunɔ u bu deri yɑ derɑ u kɑ hɑnduniɑgibu nɔɔ tiɑ kuɑ. Tɛ̃, mbɑ n ko n sɑ̃ɑ ù n wure u kpɑm bu mwɑ. N ǹ wɑ̃ɑru gɔribun sɔ̃?
16 I yɛ̃ mɑ bɑ̀ n pɛ̃ɛ kuse teeru Gusunɔ wɛ̃, pɛ̃ɛ ye yɑ tie yɑ kuɑ Gusunɔgiɑ. Dɑ̃run gbinɑ yɑ̀ n sɑ̃ɑ Gusunɔgiɑ, mɛyɑ mɑɑ kɑ ten kɑ̃ɑsiɔ. 17 Adɑmɑ bɑ̀ n kɑ̃ɑsi gɛɛ bɔɔrɑ olifin dɑ̃ɑ gbɑɑrugirun di, mɑ bɑ wunɛ wi ɑ sɑ̃ɑ yɑkɑsun dɑ̃run kɑ̃ɑsɑ gɛrɛfe kuɑ yin ɑyerɔ, mɑ ɑ kɑ olifin dɑ̃ɑ ten gbinɑn dɑm bɔnu mɔ̀, 18 ɑ ku kɑ̃ɑsi yi woo kɑnɛ. À n woo kɑnɑmɔ, ɑ yɑɑyo mɑ n ǹ wunɛ ɑ gbinɑ sɔɔwɑ, gbinɑ yɑ nun sɔɔwɑ.
19 Kɑɑ nɛɛ, bɑ kɑ̃ɑsi yi bɔɔrɑwɑ bu kɑ nun gɛrɛfe ko. 20 Geemɑ, bɑ yi bɔɔrɑ nɑɑnɛ dokebu sɑrirun sɔ̃, mɑ ɑ yɔ̃ nɑɑnɛ dokebun sɔ̃. A ku woo kɑnɑ, ɑdɑmɑ ɑ bɛrum koowo. 21 Gusunɔ ù kun kɑ̃ɑsi gbiikii deri, wunɑ u koo sere deri? 22 Ǹ n mɛn nɑ, ɑ Gusunɔn tɔn geeru kɑ mɑɑ win sɛ̃sɔ mɛɛrio. U sɛ̃ kɑ be bɑ wɔrumɑ, ɑdɑmɑ u sɑ̃ɑ tɔn geo wunɛn mi, ɑ̀ n gesi yɔ̃ dim dim win tɔn geeru sɔɔ. Mɑ n kun mɛ, bɑ koo mɑɑ wunɛn tii burɑ. 23 Be mɑɑ, bɑ̀ n ben nɑɑnɛ dokebu sɑriru deri, bɑ koo bu gɛrɛfe ko mi bɑ rɑɑ wɑ̃ɑ domi Gusunɔ u koo kpĩ u kpɑm bu gɛrɛfe ko. 24 Bɑ̀ n nun burɑ sɑɑ olifin dɑ̃ɑ yɑkɑsugirun di, mɑ bɑ nun gɛrɛfe kuɑ kɑ olifin dɑ̃ɑ gbɑɑrugiru, ye n kun kɑ nun weenɛ, ǹ n mɛn nɑ, n ǹ sɛ̃ bu kɑ kɑ̃ɑsi yi gɛrɛfe ko yin tiin dɑ̃ru sɔɔ.
Isirelibɑ bɑ koo fɑɑbɑ wɑ
25 Nɛgibu, ɑsiri gɑɑ wɑ̃ɑ ye nɑ kĩ i n yɛ̃, kpɑ i ku kɑ tii gɑrisi bwisigibu. Asiri ye wee. Isirelibɑ gɑbu bɑ ginɑ gɔ̃rusu bɔbiɑ sere tɔn tukobun geeru tu kɑ yibu fɑɑbɑ sɔɔ. 26 Nge mɛyɑ Isirelibɑ kpuro bɑ koo fɑɑbɑ wɑ, nge mɛ bɑ yoruɑ,
<<Yɑkio u koo nɑ sɑɑ Siɔnin di.
Kpɑ u Gusunɔn bɛɛrɛ yɛ̃ru sɑriru wunɑ
sɑɑ Yɑkɔbun bweserun di.
27 Yeniwɑ ɑrukɑwɑni ye kon kɑ bu bɔke
sɑnɑm mɛ kon ben torɑru wunɑ.>>
28 Sɑ̀ n Lɑbɑɑri geɑn gɑri lɑɑkɑri kuɑ, bɑ sɑ̃ɑ Gusunɔn yibɛrɛbɑ bɛɛn sɔ̃. Adɑmɑ sɑ̀ n Gusunɔn gɔsiru lɑɑkɑri kuɑ, bɑ sɑ̃ɑ win kĩnɑsibu ben sikɑdobɑn sɔ̃. 29 Domi Gusunɔ ù n tɔnu sokɑ, u nùn sokɑwɑ. Ù n nùn kɛ̃ru wɛ̃, u nùn wɛ̃wɑ. U ku rɑ gɔ̃ru gɔsie. 30 Nge mɛ bɛɛ, i ǹ dɑɑ Gusunɔ mɛm nɔɔwɛ, ɑdɑmɑ tɛ̃ bɑ bɛɛ wɔnwɔndu kuɑ ben mɛm nɔɔbu sɑrirun sɔ̃. 31 Nge mɛyɑ mɑɑ ben tii, bɑ ǹ mɛm nɔɔmɔ tɛ̃, kpɑ bu kɑ wɔnwɔndu wɑ nge mɛ bɛɛ i wɔnwɔndu wɑ. 32 Domi Gusunɔ u tɔmbu kpuro kɛnisi mɛm nɔɔbu sɑriru sɔɔ, kpɑ u kɑ be kpuro wɔnwɔndu kuɑ.
Gusunɔn kpɑ̃ɑru
33 Annɑ ɑ Gusunɔn dukiɑ kɑ win bwisi kɑ win yɛ̃run dukum wɑ! Goo kun kpɛ̃ u win himbɑ tubu. Goo kun mɑɑ kpɛ̃ u win swɛɛ giɑ. 34 Kɑ geemɑ bɑ yoruɑ,
<<Wɑrɑ u Yinnin bwisikunu yɛ̃.
Wɑrɑ u nùn bwisi kɛ̃ɛre.
35 Wɑrɑ u gbiɑ u nùn gɑ̃ɑnu kɛ̃ɛre,
u n kɑ sere nin kɔsire yĩiyɔ.>>
36 Domi wiyɑ kpuron wiru, win min diyɑ kpuro nɑɑmɔ, mɑ kpuro wɑ̃ɑ win sɔ̃. Wigiɑ yiiko sere kɑ bɑɑdommɑɔ. Ami.