5
Nɔɔsinɑɑ kɑ Gusunɔ
1 Tɛ̃ ye Gusunɔ u sun gem wɛ̃ nɑɑnɛ dokebun sɔ̃, sɑ dorɑ kɑ wi, sɑɑ Yesu Kirisi bɛsɛn Yinnin min di. 2 Win min diyɑ nɑɑnɛ dokebun sɑɑbu sɑ durom mɛ wɑ mɛ̀ sɔɔ sɑ yɔ̃ dim dim, mɑ sɑ nuku dobu mɔ yèn sɔ̃ sɑ yĩiyɔ sɑ ko bɔnu wɑ Gusunɔn yiiko sɔɔ. 3 N ǹ mɛ tɔnɑ, sɑ mɑɑ nuku dobu mɔ bɛsɛn nɔni swɑ̃ɑru sɔɔ, domi sɑ yɛ̃ mɑ nɔni swɑ̃ɑru tɑ rɑ tɛmɑnɑbu mɑ. 4 Tɛmɑnɑbu bu rɑ de tɔnu u lɑɑkɑri mɛɛribu kɑmiɑ, kpɑ u n yĩiyɔbu mɔ. 5 Tɛ̃, yĩiyɔ bi, bu ku rɑ sun dukiri kue, domi Gusunɔ u win kĩru yibiɑ bɛsɛn gɔ̃ruɔ sɑɑ Hunde Dɛɛron min di wi u sun kɑ̃.
6 Sɑnɑm mɛ sɑ ǹ ginɑ dɑm mɔ, sɑɑ ye Gusunɔ u yi, Kirisi u gu be bɑ ǹ Gusunɔn bɛɛrɛ yɛ̃n sɔ̃. 7 Geemɑ n sɛ̃ tɔnu u kɑ geegii gbiiyɑ. Sɔrɔkudo wɔrugɔ goo koo gbi geɑn kowo goon sɔ̃. 8 Adɑmɑ Gusunɔ u sun win kĩrun kpɑ̃ɑru sɔ̃ɔsi, ye u derɑ Kirisi u gu bɛsɛn sɔ̃ sɑnɑm mɛ sɑ sɑ̃ɑ torobu. 9 Tɛ̃, win yɛm sɔ̃nɑ sɑ kuɑ gemgibu. Ǹ n mɛn nɑ, sikɑ sɑri u koo mɑɑ sun fɑɑbɑ ko Gusunɔn mɔrun di. 10 Sɑnɑm mɛ sɑ sɑ̃ɑ Gusunɔn yibɛrɛbɑ, u kɑ sun dorɑ win Biin gɔɔn sɔ̃. Ǹ n mɛn nɑ tɛ̃, ye u kɑ sun dorɑ u kpɑ, sikɑ sɑri u koo mɑɑ sun fɑɑbɑ ko kɑ Bii win wɑ̃ɑru. 11 N ǹ mɛ tɔnɑ, sɑ mɑɑ nuku dobu mɔ Gusunɔ sɔɔ sɑɑ bɛsɛn Yinni Yesu Kirisin min di wi u derɑ sɑ dorɑ kɑ Gusunɔ.
Adɑmu kɑ Kirisi
12 Torɑru tɑ duɑ hɑnduniɑ sɔɔ sɑɑ tɔn turon min di, mɑ win torɑ te, tɑ kɑ gɔɔ nɑ. Gɔɔ wi, u tɔmbu kpuro girɑri domi kpurowɑ bɑ torɑ. 13 Geemɑ torɑru tɑ wɑ̃ɑ hɑnduniɑ sɔɔ woodɑ yɑ sere nɑ, ɑdɑmɑ bɑ ku rɑ torɑru gɑrisi torɑru mi woodɑ sɑri. 14 Kɑ mɛ, sɑɑ Adɑmun wɑɑtin di sere kɑ Mɔwisigiɑ, gɔɔ u bɑndu dii tɔmbu kpuron suunu sɔɔ, kɑ mɑm be bɑ ǹ Gusunɔ mɛm nɔɔwɛ nge mɛ Adɑmu u kuɑ.
Adɑmu u sɑ̃ɑwɑ wi u koo rɑ nɑn weenɑsii. 15 Adɑmɑ durom mɛ, mu kpɑ̃ n torɑ te kere. Geemɑ tɔn dɑbiru tɑ gu tɔn turo win torɑrun sɔ̃, ɑdɑmɑ Gusunɔn durom mu kere. Durom mɛn kɛ̃ru tɑ mɑɑ kere te u tɔn dɑbiru kɑ̃ sɑɑ Yesu Kirisi turo win min di. 16 Gusunɔn kɛ̃ru kɑ tɔn turon torɑ te, yɑ wunɑnɛ. Gbiikɑɑ, siribu nɑ tɔn turon torɑrun sɔ̃, mɑ bin kɔkɔrɔ kuɑ tɑɑrɛ wɛ̃ɛbu. Adɑmɑ durom mɑɑ nɑ tɔn dɑbinun torɑnun sɔ̃, mɑ mɛn kɔkɔrɔ kuɑ gem wɛ̃ɛbu. 17 Geemɑ, tɔn turon torɑrun sɔ̃nɑ gɔɔ u bɑndu di. Ǹ n mɛn nɑ, sikɑ sɑri be bɑ Gusunɔn durom bɑkɑm mwɑ kɑ win gem kɛ̃ru, bɑ koo mɑɑ bɑndu di wɑ̃ɑru sɔɔ tɔn turon min di. Wiyɑ Kirisi.
18 Ǹ n mɛn nɑ, nge mɛ tɔn turon torɑru tɑ tɔmbu kpuro tɑɑrɛ wɛ̃, mɛyɑ tɔn turon geɑn kobu bu tɔmbu kpuro gem wɛ̃ɛmɔ bu kɑ wɑ̃ɑru wɑ. 19 Nge mɛ tɔn turon mɛm nɔɔbu sɑrirun sɔ̃ tɔn dɑbiru bɑ kuɑ torobu, nge mɛyɑ mɑɑ Gusunɔ u koo tɔn dɑbiru gem wɛ̃ tɔn turon mɛm nɔɔbun sɔ̃.