4
Aburɑhɑmun gɑri
1 Ǹ n mɛn nɑ, mbɑ sɑ ko gere Aburɑhɑmu bɛsɛn sikɑdon sɔ̃. Mbɑ u nɔmɑ turɑ. 2 Mɛyɑ bɑ̀ n Aburɑhɑmu gem wɛ̃ ye u kuɑn sɔ̃ u koo kpĩ u woo kɑnɑ, ɑdɑmɑ n ǹ mɔ Gusunɔn wuswɑɑɔ. 3 Domi mbɑ bɑ yoruɑ Gusunɔn gɑri sɔɔ. Bɑ nɛɛ, <<Aburɑhɑmu u Gusunɔ nɑɑnɛ kuɑ, yen sɔ̃nɑ u nùn gɑrisi gemgii.>> 4 Tɛ̃, goo ù n sɔmburu kuɑ, bɑ ku rɑ win kɔsiɑru gɑrisi durom, win ɑreyɑ. 5 Adɑmɑ bɑɑ ù kun sɔmburu kue, mɑ u gesi Gusunɔ nɑɑnɛ doke, Gusunɔ u koo win nɑɑnɛ dokebu gɑrisiwɑ gem. Domi wiyɑ u koo kpĩ u tɑɑrɛgii gem wɛ̃. 6 Nge mɛyɑ Dɑfidi u yɛ̃ron doo nɔɔrun gɑri mɔ̀ wi Gusunɔ u gem wɛ̃ɛmɔ n kun kɑ sɔmɑn bɑɑ. 7 U nɛɛ,
<<Doo nɔɔrugiiwɑ wìn torɑnu bɑ suuru kuɑ,
mɑ bɑ win kɔ̃sɑ go.
8 Doo nɔɔrugiiwɑ wìn kɔ̃sɑ Yinni Gusunɔ kun gɑrisi.>>
9 Tɛ̃, doo nɔɔ te, bɑngogibugirɑ? Nge kɑ mɑɑ bɑngo sɑrirugibu. Domi sɑ gerumɔ mɑ bɑ Aburɑhɑmu gɑrisi gemgii win nɑɑnɛ dokebun sɔ̃. 10 Amɔnɑ u sɑ̃ɑ sɑnɑm mɛ. U bɑngo kuɑ? Nge u ǹ kue. U ǹ sɑnɑm mɛ ginɑ bɑngo kue. U sɑ̃ɑwɑ bɑngo sɑrirugii. 11 Yen biruwɑ bɑ nùn bɑngo kuɑ ye yɑ sɑ̃ɑ yĩreru mɑ Gusunɔ u nùn gem wɛ̃. Bɑ nùn gem mɛ wɛ̃ nɑɑnɛ dokebun sɔ̃ sɑnɑm mɛ u ǹ ginɑ bɑngo kue. Nge mɛyɑ u kɑ kuɑ bɑngo sɑrirugibu kpuron bɑɑbɑ be bɑ nɑɑnɛ doke, mɑ bɑ bu gem wɛ̃. 12 Mɑ u mɑɑ sɑ̃ɑ bɑngogibun bɑɑbɑ be n ǹ mɔ bɑngo tɔnɑ bɑ mɔ, ɑdɑmɑ bɑ mɑɑ win nɑɑnɛ dokebun yirɑ swĩi, bi u mɔ sɑnɑm mɛ u ǹ ginɑ bɑngo kue.
Bɑ rɑ nɔɔ mwɛɛru wure kɑ nɑɑnɛ dokebu
13 Bɑ Aburɑhɑmu kɑ win bweseru nɔɔ mwɛɛru kuɑ mɑ bɑ koo hɑnduniɑ girɑ tubi di. Bɑ ǹ nùn nɔɔ mwɛɛ te kue kɑ woodɑn bɑɑ, mɑ n kun mɔ yèn sɔ̃ u gem wɑ nɑɑnɛ dokebun sɔ̃. 14 Ǹ n sɑ̃ɑn nɑ be bɑ woodɑ mɛm nɔɔwɑ beyɑ bɑ koo ko tubi diobu, nɑɑnɛ dokebu kuɑ kɑm, nɔɔ mwɛɛ te, tɑ mɑɑ tɛɛsirɑ. 15 Domi woodɑwɑ yɑ kɑ Gusunɔn mɔru nɑɑmɔ. Adɑmɑ mi woodɑ sɑri, woodɑ sɑrɑbu mɑɑ sɑri.
16 Yen sɔ̃, kɑ nɑɑnɛ dokebun bɑɑwɑ bɑ koo nɔɔ mwɛɛ te wurɑ tu kɑ ko durom, kpɑ Aburɑhɑmun bweseru kpuro tu kɑ kpĩ tu tu wurɑ. N ǹ mɔ be bɑ woodɑ mɔ tɔnɑ ɑdɑmɑ kɑ mɑɑ be bɑ nɑɑnɛ dokewɑ nge Aburɑhɑmu wi u sɑ̃ɑ bɛsɛ kpuron bɑɑbɑ. 17 Nge mɛ Gusunɔn gɑri gerumɔ, <<Nɑ nun kuɑ bwese dɑbinun bɑɑbɑ.>> U sɑ̃ɑ bɛsɛn bɑɑbɑ, Gusunɔ wi u nɑɑnɛ doken wuswɑɑɔ. Gusunɔ wiyɑ u rɑ gɔribu seeye, u rɑ mɑɑ tɑkɑ ko ye yɑ ǹ dɑɑ wɑ̃ɑ. 18 Aburɑhɑmu u Gusunɔ nɑɑnɛ doke kɑ yĩiyɔbu, bɑɑ mɛ u ǹ kɑ yen swɑɑ wɑ ye u yĩiyɔ. Yen sɔ̃nɑ u kuɑ <<bwese dɑbinun bɑɑbɑ>> nge mɛ Gusunɔ u rɑɑ geruɑ u nɛɛ, <<nge mɛyɑ wunɛn bweserɑ koo dɑbiɑ.>> 19 Sɑɑ ye, u wɔ̃ɔ wunɔbun (100) sɑkɑ turɑ ɑdɑmɑ win nɑɑnɛ dokebu kun kɑɑre sɑnɑm mɛ u win wɑsi lɑɑkɑri kuɑ yi yi sɑ̃ɑre yi gu, kɑ mɑɑ Sɑɑrɑɑn nukuru te tɑ ǹ wɑ̃ɑ tu bii mɑ. 20 U ǹ nɑɑnɛ dokebu deri, u ǹ mɑɑ Gusunɔn nɔɔ mwɛɛ te sikɑ koosi. Adɑmɑ win nɑɑnɛ dokebu nùn dɑm wɛ̃, mɑ u Gusunɔ bɛɛrɛ wɛ̃. 21 Domi u yɛ̃ kɑm kɑm mɑ Gusunɔ u dɑm mɔ u kɑ ko yèn nɔɔ mwɛɛru u kuɑ. 22 Yen sɔ̃nɑ win nɑɑnɛ dokebun sɑɑbu Gusunɔ u nùn gɑrisi gemgii. 23 Adɑmɑ ye bɑ yoruɑ bɑ nɛɛ, <<bɑ nùn gɑrisi gemgii,>> bɑ ǹ yi yoruɑ wi turon sɔ̃. 24 Bɑ mɑɑ yi yoruɑwɑ bɛsɛn sɔ̃, bɛsɛ be bɑ koo mɑɑ gɑrisi gemgibu, bɛsɛ be sɑ Gusunɔ nɑɑnɛ doke wi u bɛsɛn Yinni Yesu seeyɑ gɔrin di. 25 U derɑ bɑ nùn go bɛsɛn torɑnun sɔ̃, u mɑɑ nùn seeyɑ u kɑ sun ko gemgibu.