3
1 Tɛ̃, ɑrufɑɑni yerɑ̀ Yuu u mɔ. Nge ɑre yirɑ̀ bɑngo yɑ mɔ. 2 N ɑrufɑɑni bɑkɑ mɔ swɛɛ kpuro sɔɔ. Gbiikɑɑ Gusunɔ u win gere Yuubɑ nɔmu sɔndiɑ. 3 Mbɑ yɑ koo ko ben gɑbu bɑ̀ n kuɑ nɑɑnɛ sɑrirugibu. Ben nɑɑnɛ sɑrirun sɔ̃ Gusunɔ u koo mɑɑ ko nɑɑnɛ sɑrirugii? 4 Aɑwo, n ǹ mɛ. Bɑɑ bɑ̀ n tɔnu bɑɑwure sokɑ weesugii, bɑ n yɛ̃ mɑ Gusunɔ sɑ̃ɑwɑ geegii. Nge mɛ Gusunɔn gɑri gerumɔ,
<<Bɑ koo nun gem wɛ̃wɑ wunɛn gɑri gerubu sɔɔ kpɑ ɑ siribu di.>>
5 Adɑmɑ kɔ̃sɑ ye sɑ mɔ̀ yɑ̀ n sɔ̃ɔsimɔ mɑ Gusunɔ sɑ̃ɑ gemgii, mbɑ sɑ ko gere. Gusunɔ ù n tɔnu sɛɛyɑsiɑmɔ, u sɑ̃ɑ gem sɑrirugii? Aɑwo, nɑ gɑri gerumɔ kɑ tɔndun bɑɑ. 6 Domi Gusunɔ ù kun sɑ̃ɑ gemgii, ɑmɔnɑ u koo kɑ hɑnduniɑ siri.
7 Adɑmɑ nɛn weesu sù n Gusunɔn gem sɔ̃ɔsimɔ kpɑsɑsɑ, win yiiko yu kɑ sosi, mbɑn sɔ̃nɑ bɑ koo kpɑm mɑn tɑɑrɛ wɛ̃ nge toro. 8 Mbɑn sɔ̃nɑ sɑ ǹ ko nɛɛ, su kɔ̃sɑ ko kpɑ yu geɑ mɑ. Gɑbu bu kɑ wɑ bu nɛn yĩsiru sɑnku bɑ nɛɛ, mɛyɑ nɑ gerumɔ. Tɔn be, bɑ koo tɑɑrɛ wɑ nge mɛ n weenɛ.
Goo sɑri wi u sɑ̃ɑ gemgii
9 Ǹ n mɛn nɑ, bɛsɛ Yuubɑ sɑ gɑbu sɑnɔ kerewɑ? Aɑwo, bɑɑ fiiko. Domi sɑ sɔ̃ɔsi kɔ mɑ bɛsɛ Yuubɑ kɑ tɔn tukobu bɛsɛ kpuro sɑ wɑ̃ɑwɑ torɑrun dɑm nɔmɑɔ. 10 Nge mɛ bɑ yoruɑ,
<<Gemgii sɑri, bɑɑ turo.
11 Goo sɑri wi u bwisi mɔ.
Goo sɑri wi u Gusunɔ kɑsu.
12 Be kpurowɑ bɑ kɔ̃ɔre.
Be kpurowɑ bɑ sɑnkire.
Be kpurowɑ bɑ kɔ̃sɑ mɔ̀.
Bɑɑ ben turo kun geɑ mɔ̀.
13 Ben yɑrɑ bɑ kɑ sibu tɑki dimɔ.
Ben nɔɔ gɑ dɛ̃ɛ mɔwɑ nge surɔkɔru.
Ben nɔɔwɑ bɑ rɑ kɑ tɔnu go.
14 Ben nɔɔ gɑ bɔ̃ri yibɑ, kɑ gɑri yi yi sosu.
15 Ben nɑɑsu su sɑ̃u su kɑ tɔnun yɛm yɑri.
16 Kpeerɑbu kɑ nuku sɑnkirɑnɑ nu rɑ n wɑ̃ɑ ben swɑɑ sɔɔ.
17 Bɑ ǹ ɑlɑfiɑn swɑɑ yɛ̃.
18 Bɑ ǹ Gusunɔ nɑsie.>>
19 Tɛ̃ sɑ yɛ̃ mɑ kpuro ye woodɑ yɑ gerumɔ, yɑ ye gerumɔwɑ be bɑ wɑ̃ɑ yen nɔmuɔn sɔ̃, kpɑ nɔɔ bɑɑgere gu kɑ mɑri, kpɑ bɑɑwure u win dɑɑ tusiɑ Gusunɔn wuswɑɑɔ. 20 Domi goo sɑri wi u koo gem wɑ Gusunɔn wuswɑɑɔ woodɑ nɛnubun sɔ̃, yèn sɔ̃ woodɑ yɑ rɑ tɔnun torɑru sɔ̃ɔsi.
Nge mɛ Gusunɔ
u rɑ tɔnu gem wɛ̃
21 Adɑmɑ tɛ̃ Gusunɔ u sɔ̃ɔsi nge mɛ u rɑ tɔnu gem wɛ̃, n ǹ mɔ kɑ woodɑn gɑri. Mɔwisin woodɑ kɑ Gusunɔn sɔmɔbu bɑ yen seedɑ di. 22 Kpuro be bɑ Yesu Kirisi nɑɑnɛ doke, Gusunɔ u bu gem wɛ̃ɛmɔ ben nɑɑnɛ dokebun sɔ̃, domi goo kun goo. 23 Tɔmbu kpurowɑ bɑ torɑ mɑ bɑ Gusunɔn yiiko biɑ. 24 Adɑmɑ Gusunɔ u bu gem wɛ̃ɛmɔ n kun kɑ kɔsiɑru win durom sɔ̃ sɑɑ Yesu Kirisin min di wi u bu yɑkiɑmɔ. 25 Gusunɔ u nùn kuɑ ɑbɔru bɑtumɑ sɔɔ u kɑ tɔmbu torɑnun suuru wɑɑwɑ kɑ win yɛm be bɑ nùn nɑɑnɛ doke. Gusunɔ u kuɑ mɛ, u kɑ sɔ̃ɔsi mɑ u sɑ̃ɑ gemgii. Yellu win suurun sɑɑ sɔɔ u rɑɑ tɛmɑnɑ kɑ tɔmbun torɑnu. 26 Adɑmɑ tɛ̃, sɑɑ yeni sɔɔ u kĩ u sɔ̃ɔsi mɑ u sɑ̃ɑ gemgii mɑ u mɑɑ bu gem wɛ̃ɛmɔ be bɑ Yesu nɑɑnɛ doke.
27 Ǹ n mɛn nɑ, mbɑ tɔnu u koo kɑ woo kɑnɑ. Sɑri. Mbɑn sɔ̃nɑ. Woodɑn mɛm nɔɔbun sɔ̃? Aɑwo. Nɑɑnɛ dokebun sɔ̃nɑ. 28 Domi sɑ wɑ mɑ tɔnu koo gem wɑ Gusunɔn wuswɑɑɔ kɑ nɑɑnɛ dokebu tɔnɑ, n ǹ mɔ kɑ woodɑn mɛm nɔɔbu. 29 Gusunɔ u sɑ̃ɑwɑ Yuubɑ tɔnɑn Yinni? U ǹ mɑɑ sɑ̃ɑ tɔn tukobugii? U mɑɑ sɑ̃ɑ tɔn tukobugii mɛ. 30 Domi Gusunɔ turowɑ wɑ̃ɑ. Wiyɑ u koo bɑngogibu gem wɛ̃ ben nɑɑnɛ dokebun sɔ̃ kɑ mɑɑ bɑngo sɑrirugibun tii ben nɑɑnɛ dokebun sɔ̃. 31 Sɑ woodɑ goomɔ kɑ nɑɑnɛ dokebu nge mɛ? Aɑwo, sɑ mɑm yen dɑm siremɔwɑ.