Romu 2

Gusunɔn siribu

¹ Ǹ n mɛn nɑ, wunɛ wi ɑ gɑbun tɑɑrɛ wɑɑmɔ, ɑ ǹ gɑfɑrɑ wɑsi bɑɑ ɑ̀ n weren nɑ, domi sɑnɑm mɛ ɑ gɑbun tɑɑrɛ wɑɑmɔ mɑ ɑ mɑɑ mɔ̀ nge be, ɑ tii tɑɑrɛ wɛ̃ɛmɔwɑ. ² Sɑ yɛ̃ mɑ Gusunɔ u gem mɔ ù n bu tɑɑrɛ wɛ̃ɛmɔ be bɑ mɛn bweseru mɔ̀. ³ Ǹ n mɛn nɑ, ɑ tɑmɑɑ kɑɑ yɑri Gusunɔn siribun di wunɛ wi ɑ gɑbun tɑɑrɛ wɑɑmɔ mɑ ɑ mɔ̀ nge be? ⁴ Nge ɑ win tɔn geeru kɑ win tɛmɑnɑbu kɑ win suurun kpɑ̃ɑru gɛmɑwɑ? A ǹ yɛ̃ mɑ Gusunɔ u tɔn geeru mɔ̀wɑ u kɑ nun gɔ̃ru gɔsiɑsiɑ? ⁵ Adɑmɑ yèn sɔ̃ wunɛn gɔ̃ru gɑ bɔɔbu gɑ degɑngɑm yibɑ, ɑ wunɛn tii mɔru mɛnnɑmmɛwɑ Gusunɔn mɔrun tɔ̃run sɔ̃ tè sɔɔ u koo tɔmbu siri dee dee ⁶ u kɑ bɑɑwure kɔsiɑ nge mɛ win kookoosu sɑ̃ɑ. ⁷ Be bɑ geɑ mɔ̀ kɑ tɛmɑnɑbu bɑ kɑ yiiko kɑ bɛɛrɛ kɑ wɑ̃ɑru kɑsu, beyɑ Gusunɔ u koo wɑ̃ɑru te tɑ ku rɑ kpe wɛ̃. ⁸ Adɑmɑ be bɑ ben tiin gɔ̃ru kĩru mɔ̀, mɑ bɑ ku rɑ gem mɛm nɔɔwɛ mɑ n kun mɔ kɔ̃sɑ, beyɑ bɑ koo mɔru kɑ nuku gbisibu wɑ. ⁹ Tɔnu bɑɑwure wi u rɑ kɔ̃sɑ ko u koo tɔ̃yɑ kɑ nɔni swɑ̃ɑru wɑ, gbiikɑɑ Yuubɑ, yen biru tɔn tukobu. ¹⁰ Bɑɑwure wi u rɑ mɑɑ geɑ ko u koo yiiko kɑ bɛɛrɛ kɑ bɔri yɛndu wɑ, gbiikɑɑ Yuubɑ, yen biru tɔn tukobu. ¹¹ Domi Gusunɔn mi, goo kun goo.

¹² Be bɑ torɑ, bɑ koo kɑm ko bɑ kun bu siri kɑ woodɑ. Be bɑ mɑɑ woodɑ yɛ̃ mɑ bɑ torɑ, woodɑ yerɑ bɑ koo kɑ bu siri. ¹³ Domi n ǹ mɔ be bɑ woodɑn gɑribu swɑɑ dɑki beyɑ bɑ gem mɔ Gusunɔn wuswɑɑɔ, mɑ n kun mɔ be bɑ mɔ̀ ye woodɑ yɑ yiiremɔ. ¹⁴ Tɔn tukobu bɑ ǹ Mɔwisin woodɑ mɔ, ɑdɑmɑ sɑnɑm mɛ bɑ mɔ̀ kɑ tii ye woodɑ yɑ gerumɔ, bɑ sɔ̃ɔsimɔ mɑ bɑ yɛ̃ ye n weenɛ bu ko, bɑɑ bɑ̀ kun Mɔwisin woodɑ mɔ. ¹⁵ Ben dɑɑ yɑ sɔ̃ɔsimɔ mɑ woodɑn kookoosu su yoruɑ ben gɔ̃rusu sɔɔ. Ben gɔ̃ru gɑ mɑɑ yen seedɑ dimɔ, domi ben bwisikunu nu bu ben torɑnu sɔ̃ɔsimɔ, ǹ kun mɛ, nu kɑ bu yinɑmɔ. ¹⁶ Mɛyɑ n ko n sɑ̃ɑ tɔ̃ɔ te Gusunɔ u koo tɔmbun bwisiku ɑsiriginu kpuro siri Kirisi Yesun min di, nge mɛ nɛn Lɑbɑɑri geɑ yɑ gerumɔ.

Yuubɑ kɑ woodɑ

¹⁷ Wunɛ mɑɑ ni. A tii sokumɔ Yuu, ɑ woodɑ nɑɑnɛ sɑ̃ɑ, ɑ woo kɑnɑmɔ wunɛ kɑ Gusunɔn wɑ̃ɑsinɑɑn sɔ̃. ¹⁸ A yɛ̃ ye Gusunɔ u kĩ ɑ ko, mɑ ɑ gɑ̃ɑ geenun wunɑnɑbu giɑ woodɑ sɔɔ. ¹⁹ A yĩiyɔ mɑ kɑɑ kpĩ ɑ wɔ̃kobu swɑɑ gbiiyɑ, kpɑ ɑ tɔmbu yɑm dɛɛrɑsiɑ be bɑ wɑ̃ɑ wɔ̃kuru sɔɔ. ²⁰ A tɑmɑɑ mɑ kɑɑ kpĩ ɑ bwisi sɑrirugibu bwisi kɛ̃, kpɑ ɑ bibu keu sɔ̃ɔsi. A yɛ̃ mɑ ɑ yɛ̃ru kɑ gem nuuru mɔ woodɑ sɔɔ. ²¹ Wunɛ wi ɑ gɑbu keu sɔ̃ɔsimɔ, mbɑn sɔ̃nɑ ɑ ǹ tii sɔ̃ɔsimɔ. Wunɛ wi ɑ gɑbu sɔ̃ɔmɔ bu ku gbɛni, mbɑn sɔ̃nɑ ɑ gbɛnimɔ. ²² Wunɛ wi ɑ gerumɔ bu ku sɑkɑrɑru ko, mbɑn sɔ̃nɑ ɑ mɔ̀. Wunɛ wi ɑ bũnu tusɑ, mbɑn sɔ̃nɑ ɑ gbɛnimɔ nin dinɔ. ²³ Wunɛ wi ɑ woo kɑnɑmɔ woodɑn sɔ̃, mbɑn sɔ̃nɑ ɑ Gusunɔ funɛ wunɑmɔ kɑ woodɑn sɑrɑbu. ²⁴ Domi Gusunɔn gɑri sɔɔ bɑ yoruɑ bɑ nɛɛ, <<Bɛɛn sɑɑbuwɑ tɔn tukobu bɑ Gusunɔn yĩsiru gɑri kɑm gerusimɔ.>>

²⁵ À n woodɑ swĩi bɑngo yɑ ɑrufɑɑni mɔ kɑ gem, ɑdɑmɑ ɑ̀ n woodɑ sɑrɑmɔ wunɛn bɑngo yɑ sɑ̃ɑ kɑm. ²⁶ Ǹ n mɛn nɑ, tɔn tuko wi bɑ ǹ bɑngo kue, ù n woodɑn gɑri mɛm nɔɔwɑ, Gusunɔ u ǹ nùn mɛɛrɑ bɑngogii? ²⁷ Tɔn tuko wi u woodɑ mɛm nɔɔwɑ bɑɑ mɛ bɑ ǹ nùn bɑngo kue u koo bɛɛ Yuubɑ tɑɑrɛ wɛ̃, domi i woodɑ sɑrɑmɔ bɑɑ mɛ i ye mɔ mɑ bɑ bɛɛ bɑngo kuɑ. ²⁸ N ǹ mɔ wi u sɑ̃ɑ Yuu wɑsi sɔɔ, wiyɑ u sɑ̃ɑ Yuu kɑ gem. ²⁹ Adɑmɑ wi u sɑ̃ɑ Yuu kɑ gem, wiyɑ wi u sɑ̃ɑ Yuu win gɔ̃ruɔ. Domi bɑngo yɑ ǹ sɑ̃ɑ ye bɑ kuɑ wɑsi sɔɔ. Ye yɑ sɑ̃ɑ bɑngo kɑ gem, yerɑ gɔ̃ru gɔsiɑbu. Hunde Dɛɛron sɔmburɑ, n ǹ mɔ woodɑgiru. Gusunɔwɑ koo Yuu wi siɑrɑ, n ǹ mɔ tɔmbu.