TIRE TE PƆLU
U ROMUGIBU KUA
1
Tɔbiribu
7 Nɑ bɛɛ kpuro tire teni yoruɑmmɛ bɛɛ be i wɑ̃ɑ Romuɔ, bɛɛ be Gusunɔ u kĩ mɑ u bɛɛ sokɑ i kɑ ko wigibu. Gusunɔ, bɛsɛn Bɑɑbɑ kɑ Yinni Yesu Kirisi bu bɛɛ durom kɑ ɑlɑfiɑ kɛ̃. 1 Nɛnɑ Pɔlu, Kirisi Yesun yoo, nɛ wi Gusunɔ u sokɑ n kɑ ko win gɔro mɑ u mɑn wunɑ nɛnɛm n kɑ win Lɑbɑɑri geɑn wɑɑsu ko.
2 Lɑbɑɑri geɑ ye, Gusunɔ u rɑɑ yen nɔɔ mwɛɛru kuɑ yellun di sɑɑ win sɔmɔbun min di, mɑ bɑ ye yoruɑ win gɑrin tireru sɔɔ. 3 Win Biiwɑ yɑ kɑ yɑ̃, Yesu Kirisi bɛsɛn Yinni wi bɑ mɑrɑ nge tɔnu Dɑfidi sinɑ bokon bweseru sɔɔ. 4 Adɑmɑ Hunde Dɛɛro u sɔ̃ɔsi kɑ dɑm mɑ Gusunɔn Biiwɑ u sɑ̃ɑ sɑnɑm mɛ u seewɑ gɔrin di. 5 Wiyɑ mɑn durom wɛ̃ mɑ u mɑn gɔrɑ bwesenu kpuron mi win yĩsirun sɔ̃, bwese ni, nu kɑ nùn nɑɑnɛ doke kpɑ nu nùn mɛm nɔɔwɑ. 6 Bɛɛ Romugibu, bɛɛ be Yesu Kirisi u sokɑ, i mɑɑ wɑ̃ɑ be sɔɔ.
Pɔlu u kĩ u nɑɑnɛ dokeobu berɑm dɑ Romuɔ
8 Gbiikɑɑ nɑ Gusunɔ nɛn Yinni siɑrɑmɔ Yesu Kirisin min di bɛɛ kpuron sɔ̃ yèn sɔ̃ bɑ bɛɛn nɑɑnɛ dokebun gɑri mɔ̀ hɑnduniɑ kpuro sɔɔ. 9 Gusunɔ wi nɑ sɑ̃ɑmɔ kɑ nɛn gɔ̃ru kpuro nɑ kɑ win Biin Lɑbɑɑri geɑ kpɑrɑmɔ, wiyɑ sɑ̃ɑ nɛn seedɑ mɑ nɑ rɑ n bɛɛn gɑri mɔ̀ kpeetim sɑri 10 nɛn kɑnɑru sɔɔ. Nɑ rɑ n bikiɑmɔ, Gusunɔ ù n kĩ u den mɑn swɑɑ kɛ̃ tɛ̃, n kɑ nɑ bɛɛn mi. 11 Domi nɑ gɔ̃ru doke gem gem n bɛɛ wɑ n kɑ bɛɛ hunden kɛ̃ru gɑru kɛ̃ kpɑ i kɑ tɑ̃si. 12 Kpɑ sɑ n dɑm kɛ̃ɛnɑmɔ bɛsɛn nɑɑnɛ dokebu sɔɔ nɛ kɑ bɛɛ sɑnɑm mɛ ko nɑ n wɑ̃ɑ bɛɛn mi.
13 Nɛgibu, nɑ kĩ i n yɛ̃ mɑ nɑ gɔ̃ru doke nɔn dɑbiru n kɑ nɑ n bɛɛ wɑ kpɑ nɛn sɔmburu tu binu mɑ bɛɛn suunu sɔɔ, nge mɛ tɑ mɑrɑ tɔn tukobu gɑbun mi, ɑdɑmɑ sere kɑ gisɔ nɑ ǹ fɛɛ wɑ. 14 Nɑ wɑɑsun dibu nɛni wuu mɑrosugibun mi kɑ mɑɑ bɑru kpɑɑnugibun mi, yɛ̃rugibun mi kɑ mɑɑ yɛ̃ru sɑrirugibun mi. 15 Yen sɔ̃nɑ nɑ kĩ gem gem n mɑɑ bɛɛ Lɑbɑɑri geɑ nɔɔsiɑ bɛɛ be i wɑ̃ɑ Romuɔ.
Lɑbɑɑri geɑn dɑm
16 Domi nɑ ǹ Lɑbɑɑri geɑn sekuru mɔ̀. Gusunɔn dɑmɑ mɛ mu rɑ bɑɑwure fɑɑbɑ ko wi u nɑɑnɛ doke, gbiikɑɑ Yuubɑ, yen biru tɔn tukobu. 17 Lɑbɑɑri geɑ ye, yɑ sɔ̃ɔsimɔ nge mɛ Gusunɔ u rɑ tɔnu gem wɛ̃. Gem mɛn torubu kɑ mɛn nɔru, nɑɑnɛ dokebɑ. Nge mɛ bɑ yoruɑ, <<Wi u kuɑ gemgii nɑɑnɛ dokebu sɔɔ, u ko n wɑ̃ɑwɑ.>>
Tɔmbun tɑɑrɛ
18 Kɑ geemɑ, Gusunɔ u win mɔru sɔ̃ɔsimɔ sɑɑ wɔllun di kɔ̃sɑ kpuron sɔ̃ ye tɔmbɑ kuɑ, kɑ win bɛɛrɛ yɛ̃ru sɑriru. Ben kom kɔ̃sum mɛn sɑɑbu bɑ ǹ dere gem mu sɔmburu ko. 19 Gusunɔ u mɔru mɔ̀ domi ye yɑ weenɛ tɔnu u tubu Gusunɔ sɔɔ yɑ bu bururɑ. Gusunɔ win tiiwɑ u bu ye sɔ̃ɔsi kpɑsɑsɑ. 20 Kɑ gem, u ǹ wɑɑrɔ kɑ nɔni, ɑdɑmɑ sɑɑ tem toren di u tii sɔ̃ɔsi mɑ u sɑ̃ɑ Gusunɔ, u mɑɑ win sinɑru sɔ̃ɔsi win sɔmɑ ye u kuɑ sɔɔ. Ǹ n mɛn nɑ, bɑ ǹ gɑfɑrɑ wɑsi. 21 Bɑ Gusunɔ yɛ̃ ɑdɑmɑ bɑ ǹ nùn win sinɑndun bɛɛrɛ wɛ̃ bu sere nùn siɑrɑ. Mɑ ben wirɑ gu mɑ yɑm wɔ̃kurɑ yibɑ ben gɔ̃ru bwisi sɑrirugisu sɔɔ. 22 Bɑ gerumɔ bɑ bwisi mɔ ɑdɑmɑ bɑ sɑ̃ɑwɑ gɑri bɑkɑsu. 23 Mɑ bɑ Gusunɔ wi u ku rɑ gbin yiiko kɔsinɑ kɑ bwɑ̃ɑrokunu ni nu kɑ tɔnu weenɛ wi u rɑ gbi, kɑ gunɔsu, kɑ yɛɛ yi yi rɑ sĩ, kɑ yi yi rɑ kɑbiri.
24 Yen sɔ̃nɑ Gusunɔ u bu dɑɑ disinugiɑ sure ben tii tiinɛ sɔɔ nge mɛ ben gɔ̃ru gɑ kĩ, kpɑ ben wɑsi yi kɑ ko bɛɛrɛ sɑrirugii. 25 Bɑ Gusunɔn gem kɑ weesu kɔsinɑ. Tɑkɑ koorɑ bɑ sɑ̃wɑ mɑ bɑ yen wɑ̃ɑru wɑ̃ɑ, n ǹ mɔ tɑkɑ kowon tii wi n weenɛ bu siɑrɑ kɑ bɑɑdommɑɔ. Ami.
26 Yen sɔ̃nɑ Gusunɔ u bu kɔdɛ bɛɛrɛ sɑrirugiɑ kpɛ̃ɛ. Ben tɔn kurɔbu bɑ kɔ̃ɔ mɛnnɑbu yinɑ kɑ tɔn durɔbu mɑ bɑ kookoo si su ǹ dɛnde kɔsire kuɑ. 27 Mɛyɑ mɑɑ tɔn durɔbu bɑ kɔ̃ɔ mɛnnɑbu yinɑ kɑ tɔn kurɔbu, mɑ ben kĩrun kɔdɛ bɑndɑ ben tii tiinɛ sɔɔ. Bɑ sekuru sɑriru mɔ̀, tɔn durɔ kɑ tɔn durɔ, mɑ bɑ ɑre mwɑɑmɔ ben tii sɔɔ yi yi kɑ ben torɑru nɛ.
28 Gusunɔ u bu deri ben bwisiku kɔ̃sunu sɔɔ bu kɑ ko ye n kun weenɛ yèn sɔ̃ bɑ ǹ wure bu nùn giɑ. 29 Mɑ bɑ kɔ̃sɑ bɑɑyere yibɑ kɑ nuku kɔ̃suru kɑ binɛ kɑ tusiru kɑ nisinu kɑ tɔn goobu kɑ sɑnnɔ kɑ tɑki kɑ bwisi kɔ̃si. Bɑ rɑ wĩinɛ, 30 bɑ rɑ tɔnu yɑɑ kɑsiki, bɑ Gusunɔ tusɑ, bɑ rɑ tii wɑ, bɑ yɛ̃kɔ mɔ, bɑ rɑ woo kɑnɛ, bɑ kɔ̃sɑn kobun bwisi mɔ, bɑ ǹ ben tundobu kɑ ben mɛrobu bɛɛrɛ wɛ̃ɛmɔ. 31 Bɑ ǹ bwisi mɔ, bɑ ǹ nɑɑnɛ mɔ, bɑ ǹ kĩru mɔ, bɑ ǹ mɑɑ wɔnwɔndu mɔ. 32 Bɑ yɛ̃ mɑ Gusunɔn woodɑ yɑ gerumɔ mɑ be bɑ yenin bweseru mɔ̀, gɔɔwɑ ben kɔkɔrɔ. Kɑ mɛ, bɑ rɑ ko. N ǹ mɔ mɛ tɔnɑ, bɑ mɑɑ gɑbu siɑrɑmɔ be bɑ mɔ̀ mɛ.