28
Bɑ wɑ̃ɑ Mɑlituɔ
1 Sɑnɑm mɛ sɑ turɑ tem bure ten mi kɑ ɑlɑfiɑ sɑ giɑ mɑ teyɑ bɑ mɔ̀ Mɑlitu. 2 Yɑm min tɔmbɑ sun nɛnuɑ kɑ kĩru. Gurɑ nɛmɔ, mɑ woorɑ mɔ̀. Yen sɔ̃nɑ bɑ dɔ̃ɔ sɔ̃ruɑ, bɑ kɑ sun dɑm koosiɑ. 3 Ye Pɔlu u dɑ̃ɑ buri mɛnnɑmɔ u dokemɔ dɔ̃ɔ sɔɔ, sɑnɑm mɛyɑ wɑɑ gɔsɔrɑ yɑrimɑ min di yɑm susurun sɔ̃ mɑ tɑ win nɔmu tɛ̃ke. 4 Yɑm min tɔmbɑ wɑɑ ye wɑ Pɔlun nɔmuɔ, mɑ bɑ geruɑ bɑ nɛɛ, kɑm kɑm durɔ wi, tɔn gowowɑ. Bɑɑ mɛ u nim wɑhɑlɑn di yɑrɑ, bũu u ǹ koo de u n wɑ̃ɑ.
5 Adɑmɑ Pɔlu u wɑɑ ye kpɑre dɔ̃ɔ sɔɔ, yɑ ǹ mɑɑ nùn wɑhɑlɑ gɑɑ kue. 6 Bɑ mɑrɑ bu wɑ win wɑsi mɔsi, ǹ kun mɛ u wɔrumɑ suɑru sɔɔ u gbi. Ye bɑ nùn mɛɛrɑ tii tii n kɑ tɛ, bɑ wɑ gɑ̃ɑnu gɑnu kun nùn kue, bɑ nɔɔ kɔbiɑ bɑ nɛɛ, bũuwɑ u sɑ̃ɑ.
7 Yɑm min bɔkuɔrɑ durɔ goon yɛnu gɑ wɑ̃ɑ, wi u sɑ̃ɑ tem bure ten sunɔ, win yĩsirɑ Pubilusi. U sun dɑm koosiɑ, mɑ u sun nɛnuɑ kɑ kĩru sɔ̃ɔ itɑ win yɛnuɔ. 8 N deemɑ Pubilusin tundo u wɑsi sundu kɑ bɑndubɑndu bɑrɔ u kpĩ. Mɑ Pɔlu u duɑ win dirɔ u kɑnɑru kuɑ u nùn nɔmɑ sɔndi, mɑ u nùn bɛkiɑ. 9 Yen biru tem mɛn bɑrɔbu kpuro bɑ nɑɑmɔ win mi, mɑ u bu bɛkiɑmɔ. 10 Bɑ sun bɛɛrɛ kuɑ kɑ gɑ̃ɑ dɑbinu. Sɑnɑm mɛ sɑ goo nimkuu duɔ sɑ doonɔ, bɑ sun kpuro wɛ̃ yèn bukɑtɑ sɑ mɔ.
Pɔlu turɑ Romuɔ
11 Suru itɑn biru sɑ goo nimkuu gɑgu duɑ ge gɑ nɑ sɑɑ Alesɑndirin di, ge gɑ rɑɑ yɔ̃ tem bure ten mi woorun sɑɑ. Goo nimkuu gen yĩrerɑ sɑ̃ɑ bũu sikɑbɑ. 12 Sɑ turɑ wuu gɑgun mi, ge bɑ mɔ̀ Sirɑkusi, mɑ sɑ sɔ̃ɔ itɑ kuɑ mi. 13 Sɑ kpɑm goo wukɑ min di sɑ dɑ Rɛgioɔ. Yen sisiru woo gɑ seewɑ nim wɔ̃ku giɑn di mɑ sɔ̃ɔ yiruse sɑ turɑ Pusoliɔ. 14 Sɑ nɑɑnɛ dokeobu gɑbu deemɑ mi, mɑ bɑ sun kɑnɑ su kɑ bu sinɑ ɑlusumɑ bɔ̃ɔ teeru. Nge mɛyɑ bɛsɛn sɑnum koosinɑ sɑ kɑ turɑ Romuɔ. 15 Nɑɑnɛ dokeo be bɑ wɑ̃ɑ mi, bɑ nuɑ mɑ sɑ wee, mɑ bɑ sun sennɔ nɑ sere Apiyusin yɑburɔ. Gɑbɑ mɑɑ kɑ sun yinnɑ mi bɑ mɔ̀ sɔbun sɔbiɑ yenu itɑ. Ye Pɔlu u bu wɑ u Gusunɔ siɑrɑ, mɑ win bwɛ̃rɑ kpunɑ. 16 Sɑnɑm mɛ sɑ Romu duɑ, bɑ derɑ Pɔlu u win diru mɔ win bɑɑ. Mɑ tɑbu kowo goo u nùn kɔ̃su.
Pɔlu wɑɑsu kuɑ Romuɔ
17 Sɔ̃ɔ itɑn biru, Pɔlu u wuu gen Yuubɑn wirugibu sokusiɑ. Ye bɑ mɛnnɑ bɑ kpɑ u nɛɛ, bɛɛ nɛn mɛro bisibu, Yuu be bɑ wɑ̃ɑ Yerusɑlɛmuɔ bɑ mɑn mwɑ, mɑ bɑ mɑn Romugibu nɔmu sɔndiɑ, bɑɑ mɛ nɑ ǹ bɛsɛn tɔmbu gɑ̃ɑnu gɑnu kue, nɑ ǹ mɑɑ bɛsɛn sikɑdobɑn komɑru torɑri. 18 Romugibɑ mɑn siri mɑ bɑ kĩ bu mɑn kɑrɑ yèn sɔ̃ bɑ ǹ tɑɑrɛ gɑɑ wɑ nɛ sɔɔ ye yɑ kɑ gɔɔ weenɛ. 19 Adɑmɑ Yuu be, bɑ ǹ gɑri yi wure, yerɑ nɑ nɛn siribu tem yɛ̃ro nɔmu sɔndiɑ, bɑɑ mɛ nɑ ǹ nɛn tɔmbu gɑri gɛɛ mɑni. 20 Yenin sɔ̃nɑ nɑ bɛɛ bikiɑ i kɑ nɑ gisɔ n kɑ bɛɛ gɑri ko. Domi bɑ mɑn yɔni yi dokewɑ wi Isirelibɑ bɑ mɑrɑ u nɑn sɔ̃.
21 Bɑ nùn sɔ̃ɔwɑ bɑ nɛɛ, sɑ ǹ tirenu wɑ sɑɑ Yudeɑn di wunɛn gɑrin sɔ̃, mɛyɑ mɑɑ sɑ ǹ bɑɑru kɔ̃sɑ gɑɑ nuɑ sɑɑ bɛsɛn mɛro bisibun nɔɔn di be bɑ nɑ sɑɑ mi giɑn di. 22 Adɑmɑ bɛsɛn tii sɑ kĩ su nɔ ye ɑ nɑɑnɛ doke, domi sɑ yɛ̃ mɑ bɑɑmɑ kpurowɑ bɑ swɑɑ yen kɔ̃sɑ gerumɔ.
23 Yen sɔ̃nɑ bɑ tɔ̃ru yi te bɑ koo nɑ win mi, mɑ tɔn dɑbinu nɑ tɔ̃ɔ te, diru mi u wɑ̃ɑ. U bu gɑri yi kpuro tubusiɑbu wɔri, u bu bɑn te Gusunɔ u swĩin gɑri seedɑ diiyɑ. U bu Yesun gɑri sɔ̃ɔsimɔ sɑɑ Mɔwisin woodɑ kɑ Gusunɔn sɔmɔbun tirenun di. U bu yen keu sɔ̃ɔsi sɑɑ bururun di sere sɔ̃ɔ kɑ kpɑ. 24 Gɑbu be sɔɔ bɑ gɑri yi nɑɑnɛ doke, ɑdɑmɑ gɑbu bɑ ǹ wure. 25 Bɑ gɑri yi sikirinɛmɔ, bɑ kɑ doonɑ. Adɑmɑ bu sere doonɑ Pɔlu u gɑri tee sosi win gɑri sɔɔ u nɛɛ, geemɑ, Hunde Dɛɛro u bɛɛn sikɑdobɑ sɔ̃ɔwɑ sɑɑ Gusunɔn sɔmɔ Esɑin nɔɔ sɔɔn di, 26 u nɛɛ,
<<A doo tɔn ben mi, ɑ nɛɛ,
bɑ ko n nɔɔmɔ kɑ gem,
ɑdɑmɑ n ǹ koo bu yeeri.
Bɑ ko n mɛɛrimɔ,
ɑdɑmɑ bɑ ǹ koo wɑ.
27 Domi tɔn benin gɔ̃ru gɑ ǹ biti mɔ.
Bɑ ben tiin swɑɑ kɔruɑ.
Bɑ nɔni yinwɑ
kpɑ bu ku wɑ kɑ ben nɔni,
kpɑ bu ku nɔ kɑ ben swɑɑ,
kpɑ bu ku giɑ kɑ ben gɔ̃ru,
kpɑ bu ku rɑɑ kɑ gɔsirɑmɑ nɛn mi n kɑ bu bɛkiɑ.>>
28 Pɔlu u mɑɑ nɛɛ, ǹ n mɛn nɑ, i n yɛ̃ mɑ Gusunɔ u derɑ win fɑɑbɑ ye, yɑ dɑ tɔn tukobun mi. Beyɑ bɑ koo ye swɑɑ dɑki. (( 29 Ye Pɔlu u yeni geruɑ u kpɑ, Yuu be, bɑ seewɑ bɑ sikirinɑmɔ gem gem bɑ kɑ doonɔ.))