Gɑri bɑkɑsun dɑɑ
26
1 Bɛɛrɛ ye bɑ gɑri bɔkɔ wɛ̃ɛmɔ, yɑ sɑ̃ɑwɑ nge gbeburu wuburun sɑɑ sɔɔ, ǹ kun mɛ gurɑ ye yɑ nɛmɔ gɛ̃ɛbun sɑɑ sɔɔ.
2 Nge mɛ gunɔ gɑ rɑ n yɔ̃ɔwɑ gɑ kun sinɛ gɑm, nge mɛyɑ bɑ̀ n tɔnu bɔ̃rusi wi u kun gɑ̃ɑnu kue, yɑ ku rɑ nùn di.
3 Sɛnɑ yɑ wɑ̃ɑwɑ kɛtɛkun sɔ̃. Yɑrukɑ yɑ mɑɑ wɑ̃ɑwɑ dumɑn sɔ̃. Mɑ bokurɑ wɑ̃ɑ gɑri bɔkɔn sɔ̃.
4 A ku gɑri bɔkɔ gɑri wisi kɑ gɑri bɑkɑ gɑri, kpɑ ɑ ku rɑ ko nge wi. 5 A gɑri bɔkɔ wisio nge mɛ win gɑri bɑkɑrɑ nɛ, kpɑ u giɑ mɑ u ǹ bwisi mɔ.
6 Wi u gɑri bɔkɔ kɑ gɑri gɔrɑ, u sɑ̃ɑwɑ nge wi u tii nɑɑsu burɑ, domi u koo wɑhɑlɑ wɑ.
7 Nge mɛ yɛmɔn nɑɑsu su ǹ ɑrufɑɑni mɔ, nge mɛyɑ gɑri bɔkɔn mɔndu tɑ ǹ ɑrufɑɑni mɔ.
8 Wi u gɑri bɔkɔ siɑrɑmɔ u sɑ̃ɑwɑ nge wi u kperu bɔkumɔ kpurɑntɛɛru sɔɔ u sere kɑrɑ.
9 Gɑri bɔkɔ wi u mɔndu mɔ̀ u sɑ̃ɑwɑ nge tɑm nɔro wi u sɑ̃kɑ nɛni u fĩɑmɔ.
10 Yinni wi u gɑri bɔkɔ sɔmburu suɑ, u sɑ̃ɑwɑ nge tɛn towo wi u tɔmbu tweemɔ.
11 Nge mɛ ye bɔ̃ɔ gɑ siɑ, gɑ rɑ mɑɑ wure gu ye di, nge mɛyɑ gɑri bɔkɔ u rɑ wure u win gɑri bɑkɑ kookoosu ko.
12 À n goo wɑ wi u tii doke bwisigii, ɑ n yɛ̃ mɑ gɑri bɔkɔ u nùn sɑnɔ kere.
Yikuron dɑɑ
13 Ye yikuro u koo kɑ yɑri tɔɔwɔ, u rɑ nɛɛwɑ, gbee sunɔ gɑ wɑ̃ɑ swɑɑɔ.
14 Nge mɛ gɑmbo yɑ rɑ n sikerenɑmɔ yen sɔretii sɔɔ, nge mɛyɑ yikuro u rɑ n kpĩ u n tɛɛrimɔ win kpin yeru wɔllɔ.
15 Bɑɑ ù n dĩɑnu wɑ yɑ rɑ n mɑm kɑ nùn sɛ̃wɑ u kɑ nu dɑ nɔɔwɔ.
16 U rɑ n mɑɑ tɑmɑɑ u bwisigibu nɔɔbɑ yiru bwisi kerewɑ be bɑ rɑ gɑri wisi dee dee.
Mɔnnu gɑnu
17 À n gɑri wɔri yi yi ǹ nun wɑ, n sɑ̃ɑwɑ nge wi u bɔ̃ɔn swɑɑ gɑbɑ sɑnɑm mɛ gɑ dukɑ doonɔ.
18-19 Wi u win winsim nɔni wɔ̃kumɔ u mɔ̀, nɑ kɑ nun dweebu mɔ̀wɑ, yɛ̃ro u sɑ̃ɑwɑ nge wiiro wi u dɔ̃ɔ kɑ sɛ̃ɛnu kɑ dɔ̃ɔ kpenu kɔ̃ɔmɔ ni nu koo tɔmbu go.
20 Dɑ̃ɑ yɑ̀ kun wɑ̃ɑ dɔ̃ɔ sɔɔ, dɔ̃ɔ u rɑ gbiwɑ. Nge mɛyɑ kɔrumɔtɔ kowo ù kun wɑ̃ɑ sɑnnɔ sɑri.
21 Nge mɛ dɔ̃ɔ gɛ̃su su rɑ de dɔ̃ɔ yɛ̃ɛ yi n wɑ̃ɑ, kpɑ dɑ̃ɑ yu de dɔ̃ɔ u n wɑ̃ɑ, nge mɛyɑ nɔɔ gɔmunugii u rɑ sɑnnɔ dɔ̃ɔ susi.
22 Kɔrumɔtɔ kowon gɑri yi sɑ̃ɑwɑ nge dĩɑ duro ni tɔmbɑ kɑtɑ mɔ̀.
23 Gɑri dori yi yi tɔnun gɔ̃ru kɔ̃su beruɑ, yi sɑ̃ɑwɑ nge sii geesun bisu si bɑ mɑni sɔndu sɔɔ.
24 Wi u tɔnu tusɑ u rɑ tii gɔsiewɑ win gɑri gerubun di u n tɔmbu nɔni wɔ̃kumɔ. 25 Bɑɑ ù n gɑri gerumɔ kɑ kĩru, ɑ ku yi wurɑ, domi win gɔ̃ruɔ kɔ̃sɑ yɑ yibɑ mɑm mɑm. 26 Bɑɑ ù n bwisi mɔ̀ u kɑ win tusiru bere, kɑ mɛ, win nuku kɔ̃suru tɑ koo sɔ̃ɔsirɑ tɔmbun suunu sɔɔ.
27 Wi u suurɑ gbemɔ, wiyɑ u koo ye wɔri. Wi u mɑɑ kperu bimiɑmɔ, wiyɑ tɑ koo sɛ̃re.
28 À n tɔnu weesu kuɑ, ɑ nùn tusɑwɑ mi. Murɑfitiru tɑ rɑ kɑ kɑm kobu nɛwɑ.