27
1 A ku tororu so siɑn sɔ̃, domi ɑ ǹ yɛ̃ ye tɔ̃ɔ te, tɑ koo nun mɑruɑ.
2 A ku tii siɑrɑ, ɑdɑmɑ ɑ de goo u nun siɑrɑ.
3 Kpenu kɑ yɑnim bunu, ɑdɑmɑ gɑri bɔkɔn mɔru yɑ bunum kere mɛ.
4 Mɔru yɑ dɑm mɔ, ɑdɑmɑ wɑrɑ u koo yɔ̃rɑ u nisinu mɑ.
5 Gerusibu bu kĩru kere te tɑ ǹ sɔ̃ɔsirɑmɔ.
6 Kpɑɑsi wi u nun gerusi u sɑ̃ɑwɑ bɔrɔkini, ɑdɑmɑ tɔnu ù n win yibɛrɛ bɔkɑsi u nùn nɔni wɔ̃kumɔwɑ.
7 Wi u debɑ u rɑ mɑm tim dibu yinɛwɑ, ɑdɑmɑ wi gɔ̃ɔrɑ mɔ̀ u rɑ siɑrewɑ bɑɑ ye yɑ sosu.
8 Wi u wɑsɑm gɑriru yɑrɑ tem tukumɔ, u sɑ̃ɑwɑ nge gunɔ ge gɑ gen sokuru deri gɑ bɔsu.
9 Nge mɛ turɑre kɑ gum sɑwɑrɑm mu rɑ tɔnu nuku dobu wɛ̃, nge mɛyɑ kpɑɑsin bwisi kɛ̃ru tɑ rɑ n do.
10 A ku wunɛn bɔrɔ kɑ wunɛn tundon bɔrɔ biru kisi. À n wɑ̃ɑ wɑhɑlɑ sɔɔ, ɑ ku somiru kɑso dɑ wunɛn dusin mi, domi wunɛn beruse u koo nun somi n kere wunɛn dusi wi u tomɑ.
11 Nɛn bii, ɑ de ɑ tii nɛnɛ, kpɑ nɑ n nuku dobu mɔ. Bɑɑ wi u mɑn wĩibu seewɑ, kpɑ n kpĩ n nùn wisi.
12 Wi u lɑɑkɑri mɔ wiyɑ u rɑ kɔ̃sɑ wɑ ye yɑ wee kpɑ u kuke. Wi u kun mɑɑ lɑɑkɑri mɔ u rɑ dewɑ u ye wɔri kpɑ u nɔni sɔ̃ɔrɑ.
13 Goo ù n sɔɔ goo swɑɑ gbiiyɑ u kɑ dibu suɑ wunɛn mi, ɑ wi u yɛ̃ro gbiiyɑ min yɑberu tɔrubɑ mɔɔ.
14 Goo ù n win winsim tɔburɑ kɑ dɑm buru buru yellu, win tɔbiri bi, bu ko n sɑ̃ɑwɑ nge bɔ̃ri.
15 Tɔn kurɔ nɔɔ gɔmunugii u sɑ̃ɑwɑ nge guru nim mɛ mu dɑ̃ɑkumɔ mu ǹ yɔ̃rɑmɔ. 16 Wi u kĩ u nùn yɔ̃rɑsiɑ u sɑ̃ɑwɑ nge wi u kɑsu u woo yɔ̃rɑsiɑ, ǹ kun mɛ u gum yɑrum nɛnɛ win nɔmɑɔ.
17 Nge mɛ sisu su rɑ sisu nɔɔ dɛ̃re, nge mɛyɑ tɔnu u rɑ tɔnusin dɑɑ sɔmɛ.
18 Wi u dɑ̃ru nɔɔri, wiyɑ u koo ten mɑrum di. Wi u mɑɑ win yinni nɔɔri, u koo bɛɛrɛ wɑ.
19 Nge mɛ tɔnu rɑ win wuswɑɑ wɑ nim sɔɔ, nge mɛyɑ u rɑ win dɑɑ wɑ win gɔ̃ruɔ.
20 Nge mɛ gɔribun wɑ̃ɑ yerɑ ku rɑ debu, nge mɛyɑ tɔnun binɛ ku rɑ kpe.
21 Dɔ̃ɔwɑ bɑ rɑ kɑ wurɑ kɑ sii geesu sɔwe, ɑdɑmɑ tɔnun dɑɑwɑ bɑ rɑ kɑ nùn siri.
22 Bɑɑ ɑ̀ n gɑri bɔkɔ doke sorɔ ɑ sunɑ nge dĩɑ bimɑ, win gɑri bɑkɑrɑ kun kpeemɔ.
23 A de ɑ n wunɛn yɑɑ sɑbenun bukɑtɑ yɛ̃ sɑ̃ɑ sɑ̃ɑ, kpɑ ɑ n dɑ nu nɔɔri, 24 domi dukiɑ ku rɑ n wɑ̃ɑ tɔnun nɔmɑɔ sere kɑ bɑɑdommɑɔ. Mɛyɑ mɑɑ bwese teeru tɑ ku rɑ n bɑndu dii sere kɑ bɑɑdommɑɔ. 25 A tɑkɑ gɛ̃ɛyɔ gberɔ kpɑ ɑ yɑkɑsu gɛ̃ guunun gɑ̃ɑrɔ yɑkɑ kpɑɑsu su sere kpi. 26 A tii yɑ̃nu kuo kɑ wunɛn yɑ̃ɑnun sɑnsu kpɑ ɑ gberu dwe kɑ wunɛn bonun gobi. 27 Wunɛn bonun bom mu koo turi ɑ kɑ wunɛn tii kɑ wunɛn yɛnu diisiɑ, kpɑ ɑ mɑɑ kɑ wunɛn sɔm kowo tɔn kurɔbu nɔɔri.