25
1 Sɑlomɔɔn mɔnnu gɑnu wee, ni Esekiɑsi, Yudɑbɑn sinɑ bokon tɔmbu bɑ mɛnnɑ.
Mɔnnu bwese bwesekɑ
2 Sɑ rɑ Gusunɔ bɛɛrɛ wɛ̃ yèn sɔ̃ u rɑ gɑ̃ɑnu ko ni sɑ ǹ kpɛ̃ su tubu. Sɑ rɑ sinɑmbu bɛɛrɛ wɛ̃ yèn sɔ̃ bɑ rɑ gɑ̃ɑnu wɛ̃ɛri.
3 Nge mɛ sɑ ǹ yɛ̃ mi wɔllun gunum mu yɔ̃ kɑ mi tem dukum mu yɔ̃rɑ, nge mɛyɑ sɑ ǹ mɑɑ sinɑmbun gɔ̃rusu yɛ̃.
4 Bɑ̀ n sisun disinu sɔwɑ, seko u koo kpĩ u kɑ su gɑ̃ɑ burɑnu ko. 5 Nge mɛyɑ bɑ̀ n tɔn kɔ̃sobu wunɑ sinɑ bokon bɔkun di, win bɑndu tɑ koo dɑm ko gem sɔɔ.
6 A ku tii suɑ sinɑ bokon wuswɑɑɔ. A ku tii bukuron ɑyeru wɛ̃, 7 domi n burɑm bo bu nɛɛ, ɑ sinɔ mini, kɑ sere bu nɛɛ, ɑ seewo min di, wi u nun keren wuswɑɑɔ.
8 À n kɔ̃sɑ gɑɑ wɑ, ɑ ku sɛndɑ ɑ kɑ ye dɑ siri yerɔ, domi bɑ̀ n deemɑ yɑ ǹ sɑ̃ɑ gem, kɑɑ sekuru wɑ.
9 Ì n sɑnnɑ kɑ goo, i nɔɔsinɔ kɑ wi, ɑdɑmɑ ɑ ku goon ɑsiri gere, 10 domi ù n ye nuɑ, u koo nun sekuru doke kpɑ wunɛn yĩsiru tu sɑnkirɑ.
11 Gɑri yi bɑ geruɑ sɑɑ ye n weenɛ, yi sɑ̃ɑwɑ nge gɑ̃ɑ ni bɑ burɑru kuɑ kɑ wurɑ ǹ kun mɛ kɑ sii geesu.
12 Bwisigiin kirɔ yɑ sɑ̃ɑwɑ nge wurɑn tɑɑbu ǹ kun mɛ wurɑn sɑbɑ, wi u ye swɑɑ dɑkin mi.
13 Nge mɛ yɑm susurun sɑnɑm, nim mu rɑ tɔnu dɑm kɛ̃, nge mɛyɑ sɔmɔ nɑɑnɛgii u rɑ win yinni nukuru yɛmiɑsie.
14 Wi u tii sue, kɛ̃ɛ ni u ǹ wɛ̃n sɔ̃, u sɑ̃ɑwɑ nge woo kɑ guru wiru te tɑ ku rɑ kɑ gurɑ nɛ.
15 Suuru kɑ tɛmɑnɑbɑ bɑ rɑ kɑ siri kowobu kɑmiɛ. Gɑri doriyɑ yi koo ben gɔmɑ dwiiyɑsiɑ.
16 À n tim wɑ ɑ ku mu di mu nun kerɑ, kpɑ ɑ ku rɑ debu ɑ mu siɑ. 17 Nge mɛyɑ ɑ kun dɑ wunɛn bɔrɔ bere kiri kiri kpɑ u ku rɑɑ nun tusi.
18 Wi u win beruse gɑri weesugii mɑnimɔ, u yɛ̃ro kɔ̃sɑ kuɑmmɛwɑ, nge mɛ bokuru ǹ kun mɛ tɑkobi ǹ kun mɛ sɛ̃u gɑ rɑ tɔnu mɛɛrɑ ko.
19 À n nɑɑnɛ sɑrirugii nɑɑnɛ kuɑ nɔni swɑ̃ɑrun sɑnɑm, yɑ sɑ̃ɑwɑ kɑri nge wi u konɑ bɑrɔ u kɑ yɑɑ temmɔ, ǹ kun mɛ nge wi u kɑ nɔɔ bɑrɔ tem tɑ̃simɔ.
20 À n nuku sɑnkiro womu kuɑmmɛ, yɑ sɑ̃ɑwɑ nge ɑ win yɑberu potɑmɔ purɑn sɑnɑm ǹ kun mɛ ɑ gɛm dokemɔ win boo sɔɔ.
21 Gɔ̃ɔru tɑ̀ n wunɛn yibɛrɛ mɔ̀, ɑ nùn dĩɑnu kɛ̃ɛyɔ u di. Nim nɔru gɑ̀ n nùn mɔ̀, ɑ nùn nim kɛ̃ɛyɔ u nɔ, 22 domi n sɑ̃ɑrewɑ ɑ nùn dɔ̃ɔ sɔbimɔ. Yinni Gusunɔ u koo mɑɑ nun yen kɔsiɑru wɛ̃.
23 Nge mɛ sɔ̃ɔ yɛ̃sɑn nɔm geun woo gɑ rɑ kɑ gurɑ nɛ, nge mɛyɑ mɑɑ wĩinɑɑ yɑ rɑ tɔnun mɔru seeye.
24 N burɑm bo ɑ n wɑ̃ɑ wunɛ turo dii piibu sɔɔ, ye kɑɑ n kɑ wɑ̃ɑ dii bɑkɑru sɔɔ kɑ kurɔ nɔɔ gɔmunugii.
25 Lɑbɑɑri geɑ ye yɑ nɑ tontonden di, yɑ rɑ tɔnu dorewɑ nge nim mɛ tɔnu u nɔrɑ sɑnɑm mɛ nim nɔru gɑ nùn mɔ̀.
26 Gemgii wi u derɑ tɔn kɔ̃so u nùn dɑɑ tie, u sɑ̃ɑwɑ nge dɔkɔ yèn nim bɑ kɔrukɑ.
27 Nge mɛ n ǹ wɑ̃ tɔnu u tim gɔm di too, nge mɛyɑ n ǹ mɑɑ wɑ̃ tɔnu u yĩsiru kɑsu.
28 Wi u ku rɑ kpĩ u tii nɛnɛ, u sɑ̃ɑwɑ nge wuu ge gɑ ǹ gbɑ̃rɑru mɔ.