Bwisigii kɑ tɔn kɔ̃so
24
1 A ku tɔn kɔ̃sobun wɑ̃ɑru binɛ ko. A ku kĩɑ ɑ n kɑ bu wɑ̃ɑ. 2 Domi bɑ rɑ kɑ̃wɑ bɑ n tɔmbu dɑm dɔremɔ, kpɑ bɑ n gerumɔ kɔ̃sɑ ye bɑ koo ko.
3 Lɑsɑbuwɑ bɑ rɑ kɑ yɛnu bɑni. Bwisiyɑ bɑ rɑ kɑ ge tɑ̃sisie. 4 Yɛ̃rɑ bɑ rɑ kɑ gen diɑ gɑ̃ɑ geenu kɑ ɑrumɑni yibie.
5 Wi u bwisi kɑ yɛ̃ru mɔ, wiyɑ u dɑm mɔ. 6 N weenɛ ɑ lɑsɑbu ko ɑ sere tɑbu dɑ. Tɔn dɑbinun bwisi kɛ̃ɛ geeru tɑ koo de ɑ nɑsɑrɑ wɑ.
7 Gɑri bɔkɔ kun kpɛ̃ u bwisin ɑsɑnsi giɑ. Yen sɔ̃nɑ u ǹ kpɛ̃ u gɑri gere mi bɑ sirimɔ.
8 Wi u rɑ n kɔ̃sɑ bwisikumɔ u koo yĩsiru yɑri kɔ̃sɑn kobu sɔɔ. 9 Gɑri bɔkɔn bwisikunu rɑ n durum wuuwɑwɑ. Wi u rɑ mɑɑ tɔnu yɑɑkoru ko, bɑ rɑ n nùn tusɑwɑ.
10 À n tɛmɑnɑbu kpɑnɑ wɑhɑlɑ sɔɔ, ɑ wunɛn dɑm sɑriru sɔ̃ɔsiwɑ mi.
11 A kookɑri koowo ɑ be bɑ ǹ gɑ̃ɑnu kue wɔrɑ be bɑ kɑ dɔɔ bu go. 12 Kɑɑ kpĩ ɑ weesu ko ɑ nɛɛ, ɑ ǹ yɛ̃ ye n koorɑ, ɑdɑmɑ Gusunɔ u yɛ̃ ye n koorɑ, domi u rɑ tɔnun gɔ̃ru wɛ̃ɛri. U mɛɛrɑ kpuro ye ɑ mɔ̀. U koo bɑɑwure nùn win kookoosun ɑre wɛ̃.
13 Nɛn bii, ɑ tim dio, domi tim mu wɑ̃, mu koo mɑɑ nun dore. 14 Nge mɛyɑ bwisi yi ko n wɑ̃ wunɛn wɑ̃ɑru sɔɔ. À n yi dendimɔ, kɑɑ kpĩ ɑ n nuku dobu mɔ. Kɑɑ n mɑɑ yĩiyɔbu mɔ wunɛn siɑn sɔ̃.
15 A ku gemgiin yɛnu yinɑ bɛriɑ. A ku win wɑ̃ɑ yeru wɔri ɑ mwɑ. 16 Gemgii u rɑ wɔrumɛ kpɑ Gusunɔ u nùn seeyɑ, ɑdɑmɑ tɔn kɔ̃so, nɔni swɑ̃ɑru tɑ rɑ nùn kɑmiɛwɑ.
17 A ku de wunɛn gɔ̃ru gu dorɑ wunɛn yibɛrɛ ù n wɔrumɑ, ǹ kun mɛ ù n sokurɑ. 18 Domi Gusunɔ ù n wɑ mɛ, sɔrɔkudo u koo win mɔru wunɑ win min di.
19 A ku tii nɔwiɑ ko kɔ̃sɑn kowobun sɔ̃. A ku mɑɑ ye bɑ mɔn binɛ ko. 20 Domi kɔ̃sɑn kowobu bɑ ǹ gɑ̃ɑnu wɑsi siɑ. Ben wɑ̃ɑrɑ koo kpewɑ tumɑru nge fitilɑ ge gɑ gum kpɑ.
21 Nɛn bii, ɑ de ɑ Yinni Gusunɔ kɑ sinɑ boko nɑsiɑ. A kun wɑ̃ɑ be bɑ bu seesimɔn wuurɔ. 22 Domi bɑ koo kɑm kowɑ subɑru sɔɔ. Goo kun mɑɑ yɛ̃ sɛɛyɑsiɑ bi Gusunɔ kɑ sinɑ boko bɑ koo bu ko.
Bwisigibun bwisi kɛ̃ru
23 Wee ye bwisigibɑ mɑɑ geruɑ. Bɑ nɛɛ, siribun sɑɑ sɔɔ, ɑ ku goon nɔnu mɛɛri. 24 Wi u tɔn kɔ̃so gem wɛ̃, tɔmbu bɑ koo nùn bɔ̃rusi, 25 ɑdɑmɑ wi u nùn sɛɛyɑsiɑ u ko n wɑ̃ɑ doo nɔɔru sɔɔ, kpɑ tɔmbu bu nùn domɑru kuɑ.
26 Wi u rɑ nun gem sɔ̃, kĩi geerɑ u nun sɔ̃ɔsi mi.
27 A de ɑ n gberu mɔ kpɑ ɑ n yɛ̃ mɛ kɑɑ kpĩ ɑ tii diisiɑ ɑ sere yɛnu swĩi.
28 A ku wunɛn beruse seedɑ weesugiɑ diiyɑ. A ku nùn nɔni wɔ̃ke kɑ wunɛn gɑri. 29 A ku mɑɑ nɛɛ, kɑɑ nùn kuɑ nge mɛ u nun kuɑ. Kɑɑ nùn kɔsiɑ nge mɛ win dɑɑ yɑ nɛ.
Yikuron dɑɑ
30 Sɔ̃ɔ teeru nɑ sɑrɑ yikuro gɑri bɔkɔ goon resɛm gbɑɑrɔ. 31 Mɑ nɑ deemɑ sɑ̃ki kɑ yɑkɑ kɔ̃susɑ su kpiimɔ bɑɑmɑ, mɑ ten kɑrɑ ye u kuɑ kɑ kpenu yɑ wɔrukɑ. 32 Mɑ nɑ ye mɛɛrɑ kɑ lɑɑkɑri, yerɑ nɑ bwisi dɔbɑ mi. 33 Nɑ wɑ ɑ̀ n kpunɑ mɑ ɑ dom mɔndu kuɑ ɑ dweeyɑ fiiko ɑ kun sɔmburu kue, 34 sɑ̃ɑru tɑ koo nun deemɑwɑ nge gbɛnɔ, kpɑ yɑ̃ɑru tu nun wɔri nge swɑɑ diobu.