23
1 Ì n sɔ̃ i dimɔ kɑ bukuro, ɑ n tii sɛ kɑ ye ɑ wɑɑmɔ wunɛn wuswɑɑɔ. 2 À n sɑ̃ɑ dim kĩro, ɑ de ɑ tii nɛnɛ. 3 A ku win dĩɑ geenu binɛ ko. Sɔrɔkudo dĩɑ ni, nu sɑ̃ɑwɑ yinɑ.
4 A ku tii nɔwiɑ ko ɑ kɑ wɑ ɑ ko dukiɑgii. A ku mɑm yen bwisikunu ko. 5 Gobi yi rɑ doonɛwɑ sɑɑ ye kɑɑ nɛɛ, kɑɑ yi mɛɛri. N dɑ n sɑ̃ɑwɑ nge yi kɑsɑ mɔ yi kɑ yɔ̃ɔwɑ nge gunɔ bɑkeru.
6 A ku gɔburon dĩɑnu di. A ku mɑɑ win dĩɑ geenu binɛ ko. 7 Domi u sɑ̃ɑwɑ nge bwisiku ni nu wɑ̃ɑ win gɔ̃ruɔ. U koo nɛɛ, ɑ dio, ɑ nɔruo. Adɑmɑ n ǹ mɛ win gɔ̃ruɔ. 8 Kɑɑ dĩɑ ni siɑ ni ɑ di mi, kpɑ gɑri dori yi ɑ rɑɑ nùn sɔ̃ɔwɑ yi ko kɑm.
9 A ku kɑ gɑri bɔkɔ gɑri ko, domi u ǹ ko n wunɛn gɑri gɑrɑ.
10 A ku wunɛn gberun kɔɔrɔ sɑrɑ, kpɑ ɑ kɑ sɑ̃ɑro kɑ gobekugiɑ mɛnnɑ. 11 Domi wi u koo bu mɔru kɔsiɑ u dɑm mɔ, u koo mɑɑ bu sɑnnɑ.
12 A sɔ̃ɔsiru wuro kɑ wunɛn gɔ̃ru kpuro te bɑ nun sɔ̃ɔsimɔ. A sɔ̃ɔsi te tɑ yɛ̃ru mɔ swɑɑ dɑkio.
13 A ku wunɛn bii deri ɑ kun nùn sɛɛyɑsie. À n kɑ nùn sɛnɑ so, u ǹ gbimɔ. 14 Adɑmɑ ɑ̀ n kɑ nùn sɛnɑ sɛɛyɑsiɑ, kɑɑ win wɑ̃ɑru wɔrɑ gɔribun wɑ̃ɑ yerun di.
Bwisi yi tundo u win bii kɛ̃mɔ
15 Nɛn bii, wunɛn gɔ̃ru gɑ̀ n bwisi kɑsu, nɛn tii ko nɑ n nuku dobu mɔ. 16 Ko nɑ n nuku dobu mɔ ɑ̀ n dɑ gem gere.
17 A ku tɔn kɔ̃sobun wɑ̃ɑru binɛ ko, ɑdɑmɑ ɑ n dɑ Gusunɔ mɛm nɔɔwɛ. 18 Sɑɑ ye sɔɔrɑ kɑɑ n nuku dobu mɔ siɑ. Wunɛn yĩiyɔbu bu ǹ mɑɑ kɑm mɔ̀.
19 Nɛn bii, ɑ mɑn swɑɑ dɑkio kpɑ ɑ ko bwisigii. A de ɑ n sĩimɔ swɑɑ geɑ sɔɔ. 20 A ku du tɑm nɔrobu kɑ yɑkɑ diobun wuuru sɔɔ, 21 domi bɑ rɑ tii sɑ̃ɑru kpɛ̃ɛwɑ. Wi u mɑɑ yikuru mɔ, u koo kĩɑsu sebe.
22 A wunɛn tundon gere swɑɑ dɑkio, domi wiyɑ u nun mɑrɑ. A ku wunɛn mɛro gɛm sɑnɑm mɛ u tɔkɔ kuɑ. 23 A gem kɑ bwisi kɑ sɔ̃ɔsiru kɑ yɛ̃ru kɑsuo, kpɑ ɑ ku de yen gɑɑ yu nun doonɑri. 24 Gemgiin tundo u rɑ n nuku dobu mɔwɑ. Wi u bwisigii mɑrɑ, u rɑ n bɔri yɛndu mɔwɑ. 25 A wunɛn tundo kɑ wunɛn mɛro nukuru dorɑsio.
26 Nɛn bii, ɑ mɑn wunɛn gɔ̃ru wɛ̃ɛyɔ, ɑ de ɑ nɛn dɑɑ sɑɑri. 27 A de ɑ n yɛ̃ mɑ kurɔ tɑnɔ u kɑri mɔwɑ nge suurɑ bɑkɑ. Tɔnusin kurɔ u mɑɑ sɑ̃ɑwɑ nge dɔkɔ kɔ̃sɑ. 28 U rɑ n tɔmbu yɔɔru bwɛ̃ɛyɛ nge gbɛnɔ kpɑ u tɔn dɑbinu ko nɑɑnɛ sɑrirugibu.
Tɑm nɔron dɑɑ
29 Wɑrɑ koo hmm ko. Wɑrɑ koo sɔn sɔndu ko. Wɑrɑ rɑ n sɑnkinɑmɔ kpɑ u n wurure. Wɑrɑ rɑ n mɛɛrɑ wɑɑmɔ kɑm. Weren nɔniyɑ yi rɑ n sɔ̃ri. 30 Mɑ n kun mɔ be bɑ tɑm sinɛ bɑ mu nɔrumɔ bɑ tɑm bwese bwesekɑ mɛnnɑmɔ. 31 A ku tɑm burɑm mɛɛri sɑnɑm mɛ mu bɑllimɔ nɔrɑ sɔɔ. Mɛyɑ mu ǹ mwɛɛbu sɛ̃, 32 ɑdɑmɑ ɑmɛn biru mu rɑ sibu dɔmwɑ nge wɑɑ dɛ̃ɛgiɑ. 33 Wunɛn nɔni ko n kɑnkɑm wɑɑmɔ, kpɑ ɑ n bwisiku kɔ̃sunu bwisikumɔ wunɛn gɔ̃ruɔ. 34 Kɑɑ siruku nge wi u kpĩ nim wɔ̃kun suunu sɔɔ. Kɑɑ mɑɑ tirerɑ nge wi u goo nimkuun beku sɔritiɑ nɛni. 35 Kɑɑ gere ɑ nɛɛ, bɑ nun so ɑdɑmɑ n ǹ nun due. Bɑ nun dɑ̃ɑ kpɑsirɑ, wunɛn gɑm kun mɑɑ nun dumɔ. Dommɑ kɑɑ dom se, ɑ kɑ mɑɑ mu kɑsu ɑ nɔ.