22
1 Yĩsi geerɑ dukiɑ bɑkɑ bɛɛrɛ kere. Bɛɛrɛ yɑ mɑɑ sii geesu kɑ wurɑ kere.
2 Arumɑnigii kɑ sɑ̃ɑro, Yinni Gusunɔwɑ be yiru kpuro kuɑ.
3 Wi u lɑɑkɑri mɔ wiyɑ rɑ gbi u kɔ̃sɑ wɑ kpɑ u kuke, ɑdɑmɑ lɑɑkɑri sɑrirugii u rɑ de u ye wɔriwɑ kpɑ u yen wɑhɑlɑ wɑ.
4 Tii kɑwɑbu kɑ Yinni Gusunɔn nɑsiɑrun ɑre sɑ̃ɑwɑ dukiɑ kɑ bɛɛrɛ kɑ wɑ̃ɑru.
5 Sɑ̃ki kɑ yɛ̃ri rɑ n wɑ̃ɑwɑ tɔn kɔ̃son swɑɑ sɔɔ. Wi u win hunden fɑɑbɑ kĩ, wiyɑ rɑ n kɑ yi tondinɛ.
6 A bii swɑɑ geɑ sɔ̃ɔsio. Ù n kpɛ̃ɑ, u ǹ ye derimɔ.
7 Gobigiiwɑ u rɑ n sɑ̃ɑro nɔmɑ sikerenɛ. Wi u mɑɑ bɔkurɑmɔ u sɑ̃ɑwɑ wi u nùn bɔkurɑmɔn yoo.
8 Wi u kɔ̃sɑ duurɑ, kɔ̃sɑ u rɑ gɛ̃, kpɑ win dɑm dɔrebu bu kpe.
9 Nuku tiɑgii u koo domɑru wɑ, domi u rɑ win dĩɑnu kɑ sɑ̃ɑrobu bɔnu ko.
10 A tɔn yɑɑ kɑsikio giro wunɛn min di, kpɑ sɑnnɔsu kɑ sikirinɔsu kɑ wɔmɑ yu kpe.
11 Wi u rɑ kɑ̃ win gɔ̃ru gɑ n dɛɛre, kpɑ u n dɑ gɑri gere kɑ kĩru, sinɑ boko u koo ko win bɔrɔ.
12 Yinni Gusunɔ u rɑ yɛ̃rugiin gere nɔni doke, ɑdɑmɑ u rɑ weesugiin gere sɔ̃ɔsiwɑ weesu.
13 Yikuro u rɑ n mɔ̀, u ǹ yɑriɔ tɔɔwɔ, domi gbee sunɔ gɑ wɑ̃ɑ mi, gɑ koo nùn go swɑɑɔ.
14 Kurɔ tɑnɔn gɑri yi sɑ̃ɑwɑ nge suurɑ bɑkɑ. Wi Yinni Gusunɔ u kɑ mɔru mɔ̀, wiyɑ u koo wɔri mi.
15 Bibu bɑ rɑ gɑri bɑkɑ kookoosu kɑ̃, ɑdɑmɑ sɛɛyɑsiɑbɑ bu koo de bu su deri.
16 Wi u sɑ̃ɑro dɑm dɔremɔ win gobi yi kɑ kpɛ̃ɑ, kɑ wi u gobigii gɑ̃ɑnu kɛ̃mɔ, be kpurowɑ bɑ tii sɑ̃ɑru kpɛ̃ɛmɔ.
Kirɔ bwese bwesekɑ
17 A swɑɑ tem kpĩiyɔ kpɑ ɑ bwisigibun gɑri nɔ. A kɑ gɑri yi nɑ nun sɔ̃ɔmɔ sɔmburu koowo. 18 A yi dokeo wunɛn gɔ̃ruɔ kpɑ ɑ n sɔɔru sɑ̃ɑ ɑ kɑ yi gere. Sɑɑ ye sɔɔ, kɑɑ n nuku dobu mɔ. 19 Nɑ kĩwɑ ɑ Yinni Gusunɔ nɑɑnɛ ko. Yen sɔ̃nɑ kon nun gɑri yi sɔ̃ gisɔn di mɑm. 20 Nɑ rɑɑ nun gɑri dɑbinu yoruɑ yì sɔɔ bwisi kɑ yɛ̃rɑ wɑ̃ɑ. 21 Yiyɑ yi koo nun sɔ̃ɔsi geeru sɔ̃ɔsi te kɑɑ nɑɑnɛ ko. Bɑ̀ n nun gɑ̃ɑnu bikiɑ, kpɑ ɑ kpĩ ɑ bu wisi dee dee.
22 A ku sɑ̃ɑron gɑ̃ɑnu wɔrɑ win dɑm sɑrirun sɔ̃. A ku mɑɑ wɔnwɔndo dɑm dɔre siri yerɔ. 23 Domi Yinni Gusunɔ u koo kɑ bu yinɑ, kpɑ u be bɑ ben yɑ̃nu gurɑ go.
24 A ku kɑ mɔrugii bɔrɔnu ko. A ku mɑɑ kɑ sɑnnɔ kĩro swĩinɑ. 25 Kɑɑ rɑ win dɑɑ sɑɑri kpɑ ɑ yinɑ wɔri.
26 A ku goon dibu mwɑ ɑ sɔbe. A kun dɑ n wɑ̃ɑ be bɑ tɔmbu nɔɔ mwɛɛru kuɑmmɛn wuuru sɔɔ. 27 Domi ɑ̀ kun mɔ ye kɑɑ kɔsiɑ, bɑɑ wunɛn kpin yeru bɑ koo tɔrubɑ mwɑ.
28 A ku wunɛn gberun kɔɔrɔ susisiɑ ɑ kɑ googiɑ mɛnnɛ. A ye nɛnuɔ nge mɛ wunɛn sikɑdobɑ bɑ nun deriɑ.
29 Wi u win sɔmburun ɑsɑnsi yɛ̃, u koo kpĩ u ko sinɑmbun sɔm kowo, kpɑ u kun mɑɑ sɑ̃ɑ wi u wɑ̃ɑ bɔkuɔ.