21
1 Sinɑ bokon gɔ̃ru gɑ sɑ̃ɑwɑ nge dɑɑ torɑ Yinni Gusunɔn nɔmɑ sɔɔ. U rɑ gu gɔsiewɑ mi u kĩ.
2 Tɔnu u rɑ n tɑmɑɑ win swɛɛ kpuro yi dɛɛrewɑ, ɑdɑmɑ Yinni Gusunɔwɑ u rɑ gɔ̃ru wɛ̃ɛri.
3 Wi u sĩimɔ dee dee, win dɑɑ yɑ yɑ̃kuru kere Yinni Gusunɔn mi.
4 Tii suɑbu kɑ tɔn biɑru yerɑ yɑ rɑ tɔn kɔ̃sobun durum sɔ̃ɔsi.
5 Wi u kookɑri mɔ̀ u kɑ win sɔmburun kpunɑɑ ko, u koo ten ɑrufɑɑni wɑ, ɑdɑmɑ wi u rɑ gɑ̃ɑnu ko kɑ sɛndɑru, gɔ̃ɔrɑ koo nùn deemɑ.
6 Dukiɑ ye bɑ wɑɑmɔ kɑ weesu, yɑ rɑ doonɛwɑ nge wiisu. Gɔɔ sɔɔrɑ yɑ rɑ kɑ bu de.
7 Tɔn kɔ̃sobun bɔbunu nu rɑ bu kɑm koosiewɑ, domi bɑ ǹ kĩ bu sĩ dee dee.
8 Tɔn kɔ̃sobu bɑ ku rɑ swɑɑ mwɛ ye yɑ dɛnde, ɑdɑmɑ be bɑ dɛɛre, ben swɑɑ yɑ rɑ n dee dee sɑ̃ɑ.
9 N burɑm bo ɑ n wɑ̃ɑ wunɛ turo dii piibu sɔɔ, ye kɑɑ n kɑ wɑ̃ɑ dii bɑkɑru sɔɔ kɑ kurɔ wi u sɑnnɔsu kĩ.
10 Tɔn kɔ̃so u rɑ n kĩwɑ u kɔ̃sɑ ko kɑ win gɔ̃ru kpuro. Bɑɑ win bɔrɔ u ku rɑ deri.
11 Bɑ̀ n tɔn yɑɑ kɑsikio sɛɛyɑsiɑmɔ, lɑɑkɑri sɑrirugii u rɑ bwisi kowɑ. Bɑ̀ n bwisigii keu mɔ̀, u rɑ yɛ̃ru sosiwɑ.
12 Gusunɔ u sɑ̃ɑwɑ gemgii, u rɑ n mɛɛrɑwɑ ye yɑ koorɑmɔ tɔn kɔ̃son yɛnuɔ, kpɑ u nùn kpɛ̃ɛ nɔni swɑ̃ɑru sɔɔ.
13 Wi u yinɑ u sɑ̃ɑron wuri nɔ, bɑ ǹ mɑɑ win tiigii nɔɔmɔ ù n somiru kɑnɑmɔ.
14 Nɔm birɑn kɛ̃ru tɑ rɑ mɔru suresiewɑ.
15 Gem kobu bu rɑ gemgii nuku dobu wɛ̃wɑ, ɑdɑmɑ kɔ̃sɑ yɑ rɑ kɔ̃sɑn kowo kɑm koosie.
16 Wi u gɛrɑ lɑɑkɑrin swɑɑn di, gɔribɑ u koo dɑ u deemɑ.
17 Wi u duniɑn ɑkɑnde kpuro kĩ, u ku rɑ n gɑ̃ɑnu mɔ. Mɛyɑ wi u rɑ tɑm kɑ dĩɑ duronu kɑ̃, u ku rɑ gobi yi.
18 Tɔn kɔ̃sobu bɑ koo nɔni swɑ̃ɑru wɑ te gemgibɑ kun wɑsi.
19 N burɑm bo ɑ n wɑ̃ɑ wunɛ turo dii piibu sɔɔ, ye kɑɑ n kɑ wɑ̃ɑ dii bɑkɑru sɔɔ kɑ kurɔ sɑnnɔsugii.
20 Bwisigiin yɛnuɔrɑ dukiɑ rɑ n wɑ̃ɑ kɑ gɑ̃ɑ ni nu wɑ̃, ɑdɑmɑ gɑri bɔkɔ u rɑ win dukiɑ sɑnkuwɑ.
21 Wi u kɑsu u ko dee dee kpɑ u n sɑ̃ɑ tɔn geo, win wɑ̃ɑrɑ koo dɑkɑɑ dɑ, kpɑ bu nùn gem kookoosu sɔ̃ɔsi kɑ bɛɛrɛ.
22 Bwisigii u rɑ kpĩ u du tɑbu durɔbun wuuɔ, kpɑ u ben dɑm buɑ mɛ bɑ nɑɑnɛ sɑ̃ɑ.
23 Wi u rɑ win yɑrɑ nɛnɛ u tii nɔni swɑ̃ɑru gbɑrɑmmɛwɑ.
24 Wi u tii sue u rɑ gɑ̃ɑ dɑbinu yɑɑ kɑsikiwɑ, kpɑ tii suɑbu bu sɔ̃ɔsirɑ win kookoosu sɔɔ.
25 Yikuron binɛ yɑ rɑ nùn gowɑ yèn sɔ̃ u ku rɑ sɔmburu ko.
26 Bɑɑdommɑ gɑbu bɑ rɑ n wɑ̃ɑwɑ binɛ sɔɔ, ɑdɑmɑ gemgii u rɑ kpuro wɛ̃wɑ sere u tii duɑri.
27 Tɔn kɔ̃son yɑ̃kuru tɑ ku rɑ Gusunɔ wɛ̃re. Kɑɑ sere gere te u kɑ bwisiku kɔ̃sunu mɔ̀?
28 Bɑ ku rɑ weesugiin seedɑ dibu wure, ɑdɑmɑ wi u seedɑ dimɔ ye u nuɑ kɑ gem, bɑ koo de u gɑri gere n kɑ tɛ.
29 Tɔn kɔ̃so u rɑ n sɑ̃ɑwɑ nge wi u nɑɑnɛ mɔ, ɑdɑmɑ gemgii u rɑ n yɛ̃ mɑ u geɑ mɔ̀.
30 Tɔnun bwisi kɑ win lɑɑkɑri kɑ win bwisikunu, yen gɑɑ kun kpɛ̃ yu Gusunɔn himbɑ sĩiyɑ.
31 Tɔnu u koo kpĩ u win dumi tɑbu yɑ̃ɑ geenu sebusiɑ tɑbun sɔ̃, ɑdɑmɑ Yinni Gusunɔwɑ u rɑ tɔnu nɑsɑrɑ wɛ̃.