20
1 Tɑm nɔrubu bu rɑ tɔnu ko yɑɑkorugii kɑ wurenugii. Wi u derɑ mu nùn go, u ǹ bwisi mɔwɑ.
2 Sunɔn mɔru yɑ sɑ̃ɑwɑ nge gbee sunɔn kukiribu. Bɑɑwure wi u nùn nɔɔ kuurimɔ, u win tii dokemɔwɑ kɑri sɔɔ.
3 Wi u ku rɑ sɑnnɔn bɑtu kɑ̃, wiyɑ bɑ koo bɛɛrɛ wɛ̃, ɑdɑmɑ gɑri bɔkɔ gɑ rɑ mɔru sewɑ fuuku.
4 Wi u ku rɑ wuku bɔmbɔmminun sɔ̃, gɛ̃ɛbun sɑnɑm u ǹ gɑ̃ɑnu wɑsi.
5 Tɔnun gɔ̃run bwisikunu nu sɑ̃ɑwɑ nge nim bweru te tɑ duku, ɑdɑmɑ wi u bwisi mɔ wiyɑ rɑ n nim mɛn tɑkɑm yɛ̃.
6 Tɔn dɑbirɑ tɑ rɑ n ten bɔrɔkinirun gɑri mɔ̀, ɑdɑmɑ wɑrɑ u nɑɑnɛ mɔ kɑ gem.
7 Gemgii u rɑ n sĩimɔwɑ dɑɑ geɑ sɔɔ. Win bibɑ ko n mɑɑ sɑ̃ɑwɑ doo nɔɔrugibu.
8 Sɑnɑm mɛ sinɑ boko u sinɑ u kɑ siri, yɑnde u rɑ tubuwɑ mi kɔ̃sɑ wɑ̃ɑ.
9 Wɑrɑ koo kpĩ u nɛɛ, win gɔ̃ru gɑ dɛɛre, u ǹ durum mɔ.
10 Yinni Gusunɔ ku rɑ kɑ̃ bɑ n kiɑru yĩirumɔ kɑ kilo kɑ sɑkɑku ye yɑ ǹ sɑ̃ɑ dee dee.
11 Bɑɑ bii, u rɑ sɔ̃ɔsiwɑ win kookoosu sɔɔ ù n sɑ̃ɑ dɑɑ geɑgii.
12 Swɑɑ si su gɑri nɔɔmɔ, kɑ nɔni yi yi yɑm wɑɑmɔ, Yinni Gusunɔwɑ u ye kpuro kuɑ.
13 A ku dom kĩɑ kpɑ yɑ̃ɑru tu ku rɑɑ nun wɔri. A de ɑ se bururu, kpɑ ɑ dĩɑnu wɑ ɑ di ɑ debu.
14 Wi u kiɑru dwemɔ u rɑ tu yɑɑ kɑsikiwɑ, ɑdɑmɑ ù n tu dwɑ u kpɑ, u rɑ n tii siɑrɑmɔwɑ.
15 Wurɑ kun sɛ̃, wesekii geenu mɑɑ yibɑ, ɑdɑmɑ be bɑ rɑ gɑri bwisigii gere, bɑ ǹ dɑbi.
16 Goo ù n sɔɔ goo swɑɑ gbiiyɑ u kɑ dibu suɑ wunɛn mi, ɑ wi u yɛ̃ro gbiiyɑ min yɑberu tɔrubɑ mɔɔ.
17 Dĩɑ ni tɔnu wɑ kɑ swɑɑ kɔ̃sɑ, nu rɑ n ginɑ dibu dowɑ, ɑdɑmɑ ɑmɛn biru, nu rɑ n sɑ̃ɑwɑ nge yɑnim nɔɔwɔ.
18 Tɔnu ù n bwisi kɛ̃ɔ geo wɑ, ye u niɑ sɑ̃ɑ yɑ rɑ koorewɑ. A ku tɑbu dɑ bìn sɔɔru ɑ ǹ kue.
19 Kɔrumɔtɔ kowo u rɑ ɑsiri kpɑrewɑ. A be bɑ rɑ gɑri sɑɑri too dukɑ suurio.
20 Wi u win mɛro ǹ kun mɛ win tundo bɔ̃rusi, u koo gbiwɑ nge fitilɑ.
21 Dukiɑ ye tɔnu u wɑ fuuku, ɑmɛn biru yɑ ku rɑ n domɑru mɔ.
22 A ku nɛɛ, kɑɑ kɔ̃sɑ kɔsiɑ ye bɑ nun kuɑ. A gesi wunɛn nɑɑnɛ dokeo Yinni Gusunɔ sɔɔ, u koo nun fɑɑbɑ ko.
23 Yinni Gusunɔ u ku rɑ kɑ̃ bɑ n kiɑru yĩirumɔ kɑ kilo ye yɑ ǹ dee dee sɑ̃ɑ.
24 Yinni Gusunɔwɑ u rɑ tɔnun wɑ̃ɑru kpɑre. Ǹ n mɛn nɑ, tɔnu kun kpɛ̃ u giɑ mi win sɑnu sɑnusu kɑ nùn dɔɔ.
25 Kɑri bɑkɑ, ɑ̀ n Gusunɔ nɔɔ mwɛɛru kuɑ ɑ nɛɛ, kɑɑ nùn yeni kɛ̃. N deemɑ ɑ ǹ bwisikɑ.
26 Sunɔ bwisigii u rɑ tɔn kɔ̃sobu sikiewɑ mi bɑ sebi, kpɑ u bu sɛɛyɑsiɑ u kun ben wɔnwɔndu kue.
27 Tɔnun gɔ̃ru gɑ sɑ̃ɑwɑ ge Yinni Gusunɔ u nùn wɛ̃ gu kɑ win sɔɔwɔ yɑm bururɑsiɑ.
28 Sinɑ boko wi u nɑɑnɛ mɔ, mɑ u win tɔmbu kĩ, u ku rɑ nɑnde. Ù n mɑɑ bu sirimɔ gem sɔɔ, win bɑndɑ koo tɛ.
29 Dɑmɑ mu sɑ̃ɑ ɑluwɑɑsibɑn bɛɛrɛ. Seri kpiki yiyɑ yi mɑɑ sɑ̃ɑ bukurobun bɛɛrɛ.
30 Bɑ̀ n nuku kɔ̃surugii so bɑ mɛɛrɑ kuɑ, win nuku kɔ̃suru tɑ koo kpe, kpɑ u bwisi ko.