14
1 Tɔn kurɔ bwisigii u rɑ yɛnu tɑ̃sisiewɑ, ɑdɑmɑ tɔn kurɔ gɑri bɔkɔ u rɑ yɛnu gowɑ.
2 Wi u sĩimɔ gem sɔɔ, u Yinni Gusunɔ nɑsiewɑ, ɑdɑmɑ wìn sɑnu sɑnusu su ǹ dɛɛre, u nùn gɛmɑwɑ.
3 Gɑri bɔkɔn tii suɑ gɑri yi rɑ dewɑ bu nùn bokuru so, ɑdɑmɑ bwisigiin yɑrɑ yɑ rɑ nùn kɑri gbɑrewɑ.
4 Birɑnu nu rɑ yɔ̃rewɑ diinu mi nɑɑ wuku sɑri. Nɑɑ geɑ yɑ rɑ kɑ ɑrumɑni bɑkɑ nɛ.
5 Seedɑ dio wi u nɑɑnɛ mɔ, u ku rɑ weesu ko. Seedɑ weesugiɑn dio ku rɑ gem gere.
6 Tɔn yɑɑ kɑsikio ù n bwisi kɑsu u ku rɑ wɑ, ɑdɑmɑ wi u lɑɑkɑri mɔ, n ku rɑ n sɛ̃ u kɑ yɛ̃ru wɑ.
7 A gɑri bɔkɔ dukɑ suurio, domi ɑ ǹ gɑri bwisigii nɔɔmɔ win nɔɔn di.
8 Bwisigii u rɑ n win sɑnu sɑnusu lɑɑkɑri sɑ̃ɑwɑ, ɑdɑmɑ gɑri bɔkɔ u rɑ kɔ̃ɔrewɑ win gɑri bɑkɑrun sɔ̃.
9 Gɑri bɔkɔ u ku rɑ bwisiku u win torɑru sɔmɛ, ɑdɑmɑ gemgibun suunu sɔɔ, duromɑ mu rɑ n wɑ̃ɑ.
10 Bɑɑwurewɑ u rɑ n win nuku sɑnkirɑnu kɑ win nuku dobun kpɑ̃ɑru yɛ̃. Goo sɑri wi u koo kpĩ u kɑ nùn ye bɔnu ko kɑ gem.
11 Tɔn kɔ̃sobun yɛnu gɑ koo gbiwɑ, ɑdɑmɑ gemgibun yɛnu gɑ koo kuurɑwɑ bɑɑ gɑ̀ n sɑ̃ɑ nge kuru tɔnɑ.
12 Tɔnu rɑ n tɑmɑɑ win sɑnu sɑnusu su wɑ̃wɑ, ɑdɑmɑ gɔɔwɑ sin kɔkɔrɔ.
13 Yɛ̃ɛsu koo kpĩ su tɔnun nuku sɑnkirɑnu bere. Mɛyɑ mɑɑ nuku dobu koo kpĩ bu gɔsirɑ nuku sɑnkirɑnu.
14 Tɔn kɔ̃so u koo win kookoosun ɑre wɑ. Nge mɛyɑ tɔn geo u koo mɑɑ wigisun ɑre wɑ.
15 Be bɑ rɑ gɑri wure fuuku, bɑ rɑ nɑɑnɛ kowɑ kpuro ye bɑ bu sɔ̃ɔwɑ, ɑdɑmɑ bwisigii u rɑ n win sɑnu sɑnusu lɑɑkɑri sɑ̃ɑwɑ.
16 Bwisigii u rɑ durum bɛrum kowɑ, kpɑ u ye deri, ɑdɑmɑ gɑri bɔkɔ u rɑ kpuro kowɑ bɛrum sɑri.
17 Wi u rɑ mɔru se fuuku, gɑri bɑkɑ kookoosɑ u mɔ̀. Wi u bwisi kɔ̃si yibɑ, u tii tusiru guremɔwɑ.
18 Be bɑ ku rɑ bwisiku bu sere gɑri wurɑ, gɑri bɑkɑrɑ yɑ rɑ bu mɑrue. Be bɑ mɑɑ lɑɑkɑri mɔ, yɛ̃rɑ tɑ rɑ ko ben bɛɛrɛ.
19 Tɔn kɔ̃sobu bɑ koo tɔn geobu yiirɑwɑ bu bɑrɑ ko.
20 Goo ku rɑ sɑ̃ɑro kɑ̃, bɑɑ kɑ win berusebu, bɑ rɑ n nùn tusɑwɑ, ɑdɑmɑ gobigii u rɑ n bɔrɔbɑ yibɑwɑ.
21 Wi u win beruse gɛmɑ, durumwɑ u kuɑ, ɑdɑmɑ wi u sɑ̃ɑrobun wɔnwɔndu mɔ, u koo domɑru wɑ.
22 Be bɑ rɑ kɔ̃sɑ bwisiku, bɑ kɔ̃ɔrewɑ, ɑdɑmɑ be bɑ rɑ geɑ bwisiku, durom kɑ gemɑ bɑ rɑ sɔ̃ɔsi.
23 Sɔmburu kpurowɑ tɑ rɑ n ɑre mɔ, ɑdɑmɑ gɑri sɑɑrinu, sɑ̃ɑrɑ nu rɑ kɑ nɛ.
24 Dukiɑ yɑ sɑ̃ɑwɑ bwisigiin ɑre, ɑdɑmɑ gɑri bɔkɔ, gɑri bɑkɑ kookoosɑ su rɑ n nùn wɑ̃ɑsi.
25 Seedɑ dio gemgii u rɑ tɔmbun hunde wɔrewɑ, ɑdɑmɑ wee kowo, weesɑ u rɑ n sɑ̃ɑmɔ.
26 Wi u Yinni Gusunɔ nɑsie, tɑ̃si yee dɑmgirɑ u mɔ mi. Gusunɔwɑ u rɑ mɑɑ yɛ̃ron bibu kɔ̃su.
27 Yinni Gusunɔn nɑsiɑru tɑ sɑ̃ɑwɑ wɑ̃ɑrun nuuru. Teyɑ tɑ rɑ tɔnu yɑre gɔɔn yinɑn di.
28 Tɔn dɑbirɑ tɑ sɑ̃ɑ sinɑ bokon bɛɛrɛ, ɑdɑmɑ win tɔmbu bɑ̀ n yɑrinɑ, win bɑndɑ nim surewɑ.
29 Wi u ku rɑ mɔru ko fuuku, bwisi bɛkɛyɑ u mɔ, ɑdɑmɑ wìn mɔru yɑ rɑ se fuuku, gɑri bɑkɑrɑ u rɑ sɔ̃ɔsi.
30 Bwɛ̃rɑ yɑ̀ n kpĩ, yɑ sɑ̃ɑwɑ wɑsin ɑlɑfiɑ, ɑdɑmɑ nisinu nu sɑ̃ɑwɑ nge bɑrɑ te tɑ rɑ kukunu tem.
31 Wi u sɑ̃ɑro dɑm dɔremɔ, u win tɑkɑ kowo torɑrimɔwɑ, ɑdɑmɑ wi u nùn wɔnwɔndu kuɑ, u tɑkɑ kowo wi bɛɛrɛ wɛ̃ɛmɔwɑ.
32 Tɔn kɔ̃so, nuku kɔ̃surɑ tɑ rɑ nùn fuke, ɑdɑmɑ gemgii u rɑ n tororu sɔ̃wɑ bɑɑ gɔɔn wuswɑɑɔ.
33 Bwisigiin gɔ̃ruɔ lɑɑkɑriwɑ yɑ rɑ n wɑ̃ɑ, ɑdɑmɑ bɑ ǹ kpɛ̃ bu ye wɑ gɑri bɔkɔn mi.
34 Gem mu rɑ temgibu bɛɛrɛ dokewɑ, ɑdɑmɑ durum yɑ rɑ bu sekuru dokewɑ.
35 Sinɑ ɑsɑkpɔ bwisigiiwɑ sunɔ u rɑ kɑ nɔnu geu mɛɛri, kpɑ u kɑ wi u nùn sekuru dokemɔ mɔru ko.