13
1 Bii bwisigii u rɑ win tundon sɔ̃ɔsiru swĩiwɑ, ɑdɑmɑ bii wi u tii sue, u ku rɑ gerusibu kɑ̃.
2 Gemgibu bɑ rɑ ben gɑrin ɑre wɑ, ɑdɑmɑ tɔn kɔ̃sobu, dɑm dɔrenɑɑn wɑ̃ɑrɑ bɑ rɑ n wɑ̃ɑ.
3 Wi u win nɔɔ kpĩɑ u win hunde kɔ̃suwɑ, ɑdɑmɑ wi u rɑ gɑri gere yɑbi u tii kɑri bɔriemɔwɑ.
4 Yikuro u rɑ n gɑ̃ɑnun binɛ mɔwɑ ni u ǹ kpɛ̃ u wɑ, ɑdɑmɑ wi u rɑ sɔmburu ko u rɑ wɑwɑ ye u kĩ.
5 Gemgii u ku rɑ weesu kɑ̃, ɑdɑmɑ tɔn kɔ̃so u rɑ tii sekuru dokewɑ.
6 Wi u win tii nɛni dee dee, win dɑɑ geɑ yɑ koo nùn kɔ̃su, ɑdɑmɑ wi u kɔ̃sɑ mɔ̀, kɔ̃sɑ yɑ koo nùn surɑ.
7 Gobigiin kookoosɑ gɑbu bɑ rɑ n mɔ̀, ɑdɑmɑ bɑ ǹ gɑ̃ɑnu mɔ. Kpɑ gɑbu bɑ n sɑ̃ɑ nge sɑ̃ɑrobu, ɑdɑmɑ beyɑ bɑ ɑrumɑni mɔ.
8 Gobiyɑ gobigii u rɑ kɑ win wɑ̃ɑru yɑkie, ɑdɑmɑ goo ku rɑ sɑ̃ɑro wɔri.
9 Gemgii u rɑ n bɑllimɔwɑ nge yɑm bururɑm, ɑdɑmɑ tɔn kɔ̃so u sɑ̃ɑwɑ nge fitilɑ ge gɑ gɔɔ dɔɔ.
10 Tii suɑbu bu rɑ kɑ sɑnnɔ nɛwɑ, ɑdɑmɑ wi u rɑ kɑ bwisi kɛ̃ru sɔmburu ko, bwisigiiwɑ.
11 Dukiɑ ye tɔnu wɑ kɑ keetɑn swɑɑ yɑ rɑ doonɛwɑ fuuku, ɑdɑmɑ ye tɔnu wɑɑmɔ fiiko fiiko kɑ swɑɑ geɑ, yɑ rɑ sosiwɑ.
12 Ye tɔnu yĩiyɔ yɑ̀ kun koore, yɑ rɑ nùn kowɑ bɑrɔ, ɑdɑmɑ yĩiyɔ bi bu yibiɑrɑ bu rɑ kowɑ nuku doo bɑkɑbu.
13 Wi u bwisi kɛ̃ru yinɑ u koo yen ɑre wɑ. Wi u mɑɑ tu wurɑ u koo yen ɑre wɑ.
14 Bwisigiin sɔ̃ɔsiru tɑ sɑ̃ɑwɑ wɑ̃ɑrun nuuru. Tɑ rɑ tɔnu yɑrewɑ gɔɔn yinɑn di.
15 Bwisigiin bwisi yi rɑ dewɑ bu nùn bɛɛrɛ wɛ̃, ɑdɑmɑ tɔn kɔ̃son sɑnu sɑnusu su rɑ nùn kɑm kowɑ.
16 Wi u lɑɑkɑri mɔ u rɑ bwisikuwɑ u sere gɑ̃ɑnu ko, ɑdɑmɑ gɑri bɔkɔ gɑ rɑ gen gɑri bɑkɑru tɛriewɑ.
17 Sɔmɔ kɔ̃so, wɑhɑlɑwɑ u rɑ kɑ nɛ, ɑdɑmɑ sɔmɔ geo u rɑ tɔmbu nukuru yɛmiɑsiewɑ.
18 Wi u sɔ̃ɔsiru yinɑ u koo kowɑ sɑ̃ɑro kpɑ u sekuru wɑ, ɑdɑmɑ wi u tu wurɑ wiyɑ u koo bɛɛrɛ wɑ.
19 Ye tɔnu u kĩ, yɑ̀ n koorɑ, yɑ rɑ nùn nuku dobu wɛ̃wɑ, ɑdɑmɑ tɔn kɔ̃sobu bɑ ku rɑ kɑ̃ bu ben kɔ̃sɑ deri.
20 Wi u rɑ bwisigii bere, u koo bwisi wɑ. Wi u rɑ n mɑɑ wɑ̃ɑ kɑ gɑri bɑkɑsu, u koo kɔ̃sɑ wɑ.
21 Kɔ̃sɑ yɑ rɑ durumgibu nɑɑ swĩiwɑ, ɑdɑmɑ duromɑ mu rɑ ko gemgibun ɑre.
22 Tɔn geon dukiɑ yɑ rɑ kowɑ win bibun bweserugiɑ, ɑdɑmɑ tɔn kɔ̃sogiɑ yɑ rɑ kowɑ gemgibugiɑ.
23 Sɑ̃ɑrobu bɑ rɑ dĩɑ geenu wɑ ben gberun di, ɑdɑmɑ gɑbugiɑ rɑ gberewɑ yèn sɔ̃ bɑ ǹ gem swĩi.
24 Wi u ku rɑ win bii sɛɛyɑsie u ǹ nùn kĩwɑ, ɑdɑmɑ wi u nùn kĩ u rɑ nùn sɛɛyɑsiewɑ.
25 Gemgii u rɑ n deburu mɔwɑ, ɑdɑmɑ tɔn kɔ̃so u rɑ n gɔ̃ɔru bɑrɔwɑ.