12
1 Wi u kĩ u yɛ̃ru wɑ, u rɑ wure bu nùn sɛɛyɑsiɑ. Wi u yinɑmɔ bu nùn wɔkisi, u sɑ̃ɑwɑ gɑri bɔkɔ.
2 Wi u rɑ geɑ ko, wiyɑ u rɑ Gusunɔn durom wɑ, ɑdɑmɑ bwisiku kɔ̃sunugiiwɑ u rɑ tɑɑrɛ wɑ.
3 Nuku kɔ̃surɑ kun kpɛ̃ tu tɔnu tɑ̃sisiɑ, ɑdɑmɑ gemgiin nuuru tɑ ko n sirerewɑ.
4 Kurɔ geo u rɑ dewɑ win durɔ u n bɛɛrɛ mɔ, ɑdɑmɑ kurɔ wi u rɑ win durɔ sekuru doke, u sɑ̃ɑwɑ nge bɑrɑru te tɑ durɔ win kukunu temmɔ.
5 Gemgibu bɑ rɑ n kɑsuwɑ bu ko dee dee, ɑdɑmɑ tɔn kɔ̃sobu bɑ rɑ n kɑsuwɑ bu gbɛni.
6 Tɔn kɔ̃son gɑri yi sɑ̃ɑwɑ nge yinɑ ye yɑ rɑ go, ɑdɑmɑ gemgibun gɑri yi rɑ tɔmbu gbɑrewɑ yinɑn di.
7 Tɔn kɔ̃so ù n gu, gɑ̃ɑnu ku rɑ tiɑre win yɛnuɔ, ɑdɑmɑ gemgiin yɛnu gɑ rɑ n yɔ̃wɑ dim dim.
8 Bwisigiiwɑ bɑ rɑ tɔmɛ, ɑdɑmɑ wìn gɑri kɔmiɑ wiyɑ bɑ rɑ yɑɑkoru ko.
9 N burɑm bo ɑ n sɑ̃ɑ bwɛ̃ɛbwɛ̃ɛ, kpɑ ɑ n sɔm kowo turo mɔ, ye kɑɑ n kɑ tii sue, kpɑ ɑ kun dĩɑnu mɔ yɛnuɔ.
10 Ye gemgii u mɔ, u rɑ ye nɔɔriwɑ, sere kɑ mɑm win yɑɑ sɑbenɔ, ɑdɑmɑ tɔn kɔ̃so, nuku kɔ̃surɑ u rɑ n yibɑ.
11 Wi u win gberu wukɑ u ko n dĩɑnu yibɑwɑ, ɑdɑmɑ wi u kɑm gire u sɑ̃ɑwɑ gɑri bɔkɔ.
12 Tɔn kɔ̃sowɑ u rɑ n tɔn kɔ̃sobun gɑ̃ɑnun binɛ mɔ, ɑdɑmɑ gemgibun tɛmɑnɑbu, ɑrufɑɑniwɑ bu rɑ mɑ.
13 Tɔn kɔ̃so u rɑ yinɑ mwɑɑrewɑ win gɑri weesugii sɔɔ, ɑdɑmɑ gemgii u rɑ yɑriwɑ wɑhɑlɑn di.
14 Tɔnun gere yɑ koo nùn gɑ̃ɑ geenu mɑruɑ nge mɛ win sɔmburu tɑ rɑ nùn ɑre wɛ̃.
15 Gɑri bɔkɔ u rɑ n tɑmɑɑ ye u mɔ̀ kpuro yɑ sɑ̃ɑwɑ dee dee, ɑdɑmɑ bwisigiiwɑ u rɑ kɑ bwisi kɛ̃ru sɔmburu ko.
16 Gɑri bɔkɔ u rɑ yɑnde win mɔru sɔ̃ɔsiwɑ, ɑdɑmɑ bwisigii u rɑ tii ye mɑrisiwɑ.
17 Wi u gem kpɑrɑmɔ, geɑ u rɑ kɑ̃, ɑdɑmɑ wee kowo u rɑ n sɑ̃ɑwɑ weesun yoo.
18 Wi u rɑ gɑri gere u kun bwisikɑ, u rɑ kɑ yi tɔmbu sɔkuwɑ nge tɑkobi, ɑdɑmɑ bwisigiin gɑri yi rɑ tɔnu bɛkiewɑ.
19 Gɑri geen dɑm mu rɑ n wɑ̃ɑwɑ sere kɑ bɑɑdommɑɔ, ɑdɑmɑ weesu su rɑ doonɛwɑ nɔni kpɑki teeru.
20 Be bɑ rɑ kɔ̃sɑ bwisiku, weesɑ su rɑ n yibɑ ben gɔ̃ruɔ, ɑdɑmɑ be bɑ rɑ tɔmbu bwisi kɛ̃ bu kɑ geɑ ko, bɑ rɑ n nuku dobu mɔwɑ.
21 Kɔ̃sɑ ku rɑ gemgii deemɛ, ɑdɑmɑ tɔn kɔ̃so u rɑ n nɔni sɔ̃ɔrewɑ.
22 Yinni Gusunɔ u ku rɑ weesugibu kɑ̃. Gemgibɑ u rɑ n kĩ.
23 Bwisigii u ku rɑ win yɛ̃ru tɛrie, ɑdɑmɑ gɑri bɔkɔ u rɑ win gɑri bɑkɑru sɔ̃ɔsiwɑ.
24 Hɑniɑ yɑ rɑ dewɑ tɔnu u ko gɑbun yinni, kpɑ yikuru tu de tɔnu u ko goon yoo.
25 Wururɑbu bu rɑ tɔnu woorewɑ, ɑdɑmɑ ɑ̀ n tɔnu gɑri sɔ̃ɔwɑ kɑ kĩru yi rɑ nùn dɑm kɛ̃wɑ.
26 Gemgii u rɑ win beruse surewɑ swɑɑ geɑ sɔɔ, ɑdɑmɑ tɔn kɔ̃son kookoosu su rɑ dewɑ u kɔ̃ɔrɑ.
27 Tɑɑso wi u yikuru mɔ, u ku rɑ yɑɑ wɑ u sɛ̃wɛ, ɑdɑmɑ hɑniɑwɑ yɑ rɑ tɔnu gɑ̃ɑ geenu wɛ̃.
28 Mi gem wɑ̃ɑ, miyɑ wɑ̃ɑrɑ wɑ̃ɑ. À n mu swĩi, ɑ ǹ kɑ gɔɔ yinnɑmɔ.