15
1 Wisi bi bu du, bu rɑ mɔru suresiewɑ, ɑdɑmɑ gɑri gerubu kɑ dɑm biyɑ bu rɑ mɔru seesie.
2 Bwisigiin gɑri yi rɑ de tɔnu u yɛ̃ru kɑsu, ɑdɑmɑ gɑri bɔkɔn nɔɔ, wiirɑ gɑriyɑ gɑ rɑ n sɑɑrimɔ.
3 Yinni Gusunɔn nɔni wɑ̃ɑwɑ yɑm kpuro. Yi tɔn kɔ̃sobu kɑ gemgibu mɛɛrɑ.
4 Gɑri yi yi nukuru yɛmiɑsiɑmɔ yiyɑ yi rɑ kɑ wɑ̃ɑru nɛ, ɑdɑmɑ gɑri kɑm yi rɑ tɔnun gɔ̃ru sɑnkuwɑ.
5 Wi u rɑ win bɑɑbɑn sɔ̃ɔsiru ɑtɑfiiru ko, gɑri bɔkɔwɑ, ɑdɑmɑ wi u rɑ gerusibu wure, win bwisi koo sɔ̃ɔsirɑ.
6 Gemgiin yɛnuɔrɑ ɑrumɑni bɑkɑ wɑ̃ɑ, ɑdɑmɑ ye tɔn kɔ̃sobɑ mɛnnɑmɔ, wɑhɑlɑwɑ yɑ rɑ kɑ nɛ.
7 Bwisigibun nɔɔwɑ gɑ rɑ n yɛ̃ru kpɑrɑmɔ, ɑdɑmɑ bwisi sɑrirugibun gɔ̃ru gɑ ǹ sɑ̃ɑ mɛ.
8 Yinni Gusunɔ u ku rɑ tɔn kɔ̃sobun yɑ̃kuru wɑɑbu kɑ̃, ɑdɑmɑ gemgibun kɑnɑru tɑ rɑ nùn wɛ̃re.
9 Yinni Gusunɔ u tɔn kɔ̃sobun swɑɑ tusɑ, ɑdɑmɑ be bɑ geɑ mɔ̀, beyɑ u kĩ.
10 Wi u swɑɑ geɑ deri, bɑ koo yɛ̃ro sɛɛyɑsiɑwɑ gem gem. Wi u mɑɑ sɛɛyɑsiɑbu yinɑ, u koo gbiwɑ.
11 Yinni Gusunɔ u yɛ̃ ye yɑ koorɑmɔ gɔribun wɑ̃ɑ yerɔ. Kɑɑ sere gere tɔnun gɔ̃ruɔ?
12 Wi u tii sue, u ku rɑ kɑ̃ bu nùn gerusi. U ku rɑ mɑɑ kɑ̃ bwisigibu bu nùn bwisi kɛ̃.
13 Nuku dobɑ bu rɑ wuswɑɑ dɛɛrɑsie, ɑdɑmɑ nuku sɑnkirɑru tɑ rɑ wuswɑɑ burisinɛwɑ.
14 Wi u bwisi mɔ, u rɑ yɛ̃ru kɑsuwɑ, ɑdɑmɑ gɑri bɔkɔ u rɑ n buriwɑ win gɑri bɑkɑru sɔɔ.
15 Wɔnwɔndo u rɑ n wɑ̃ɑwɑ wɑhɑlɑ sɔɔ bɑɑdommɑ, ɑdɑmɑ doo nɔɔrugii, u rɑ n tɔ̃ɔ bɑkɑru mɔ̀wɑ sɑɑ bɑɑyere.
16 N burɑm bo ɑ n sɑ̃ɑ sɑ̃ɑro, kpɑ ɑ n Yinni Gusunɔ nɑsie, n kere ɑ n dukiɑ mɔ kpɑ ɑ n wurure.
17 N sɑnɔ bo ɑ di kɑ kpee wurusu yɛnu mi kĩrɑ wɑ̃ɑ, n kere ɑ di kɑ yɑɑ gumgiɑ yɛnu gèn mi tusirɑ wɑ̃ɑ.
18 Wi u mɔru mɔ, u rɑ sɑnnɔsu seeyewɑ, ɑdɑmɑ wi u suuru mɔ u rɑ su kpeesiewɑ.
19 Yikuron swɑɑ yɑ rɑ n sɑ̃ki yibɑwɑ. Wi u gem swĩigiɑ kpɑ yɑ n dɛɛre.
20 Bii bwisigiiwɑ u rɑ de win tundon nukurɑ n do, ɑdɑmɑ bii gɑri bɔkɔ u rɑ win mɛro gɛmwɑ.
21 Gɑri bɑkɑ kookoosu su rɑ gɑri bɔkɔ dorewɑ, ɑdɑmɑ wi u bwisi mɔ, dɑɑ geɑ u rɑ ko.
22 Wi u ku rɑ bwisi bikie win himbɑn sɔ̃, yɑ ku rɑ koore, ɑdɑmɑ wi u bwisi kɛ̃ɔbu mɔ, win himbɑ yɑ rɑ koorewɑ.
23 Wi u gɑri wisibu tubɑ sɑɑ ye n weenɛ, u rɑ n nuku dobu mɔwɑ.
24 Wi u bwisi mɔ, u rɑ wɑ̃ɑrun swɑɑ swĩiwɑ, kpɑ u swɑɑ deri ye yɑ dɔɔ gɔɔwɔ.
25 Yinni Gusunɔ u rɑ tii suon diru surewɑ, ɑdɑmɑ u ku rɑ de bu gɔminin tem kɔɔrɔ mure.
26 Yinni Gusunɔ u bwisi kɔ̃si tusɑ, ɑdɑmɑ gɑri yi yi kĩru sɔ̃ɔsimɔ, yiyɑ yi rɑ nùn dore.
27 Wi u rɑ gobi kɑsu kɑ swɑɑ kɔ̃sɑ, u win yɛnu wɑhɑlɑ dokemɔwɑ, ɑdɑmɑ wi u nɔm birɑn kɛ̃nu tusɑ, u ko n wɑ̃ɑwɑ.
28 Gemgii u rɑ bwisikuwɑ u sere wisi, ɑdɑmɑ gɑri kɔ̃siyɑ tɔn kɔ̃so u rɑ n sɑɑrimɔ.
29 Yinni Gusunɔ u ku rɑ tɔn kɔ̃son kɑnɑru lɑɑkɑri ko, ɑdɑmɑ u rɑ gemgiin kɑnɑru nɔ.
30 À n tɔnu mɛɛrɑ kɑ kĩru, u ko n nuku dobu mɔ. À n mɑɑ tɔnu lɑbɑɑri dorɑ sɔ̃ɔwɑ, yɑ rɑ nùn dɑm kɛ̃.
31 Wi u gerusibu wurɑ bi bu koo nùn fɑɑbɑ ko, u ko n wɑ̃ɑwɑ bwisigibun wuurɔ.
32 Wi u sɔ̃ɔsiru yinɑ, u tii mɛɛrɑ mɔ̀wɑ, ɑdɑmɑ wi u wurɑ bɑ nùn gerusi, u koo bwisi wɑ.
33 À n kĩ ɑ bwisi ko, ɑ de ɑ ginɑ Gusunɔ nɑsiɑ. À n kĩ ɑ bɛɛrɛ wɑ, ɑ de ɑ ginɑ tii kɑwɑ.