Bwisi kɑ gɑri bɑkɑru
9
1 Bwisi yi gbere dɑmgii nɔɔbɑ yiru kuɑ, yi kɑ yin diru bɑnisi. 2 Mɑ yi derɑ bɑ yɛɛ go, bɑ tɑm sɔɔru kuɑ bɑ ye kpuro yi dii yerɔ. 3 Mɑ yi yin sɔm kowo tɔn kurɔbu gɔrɑ bu yɔ mi n gunum bo bu tɔmbu dim sokumɑ, 4 kpɑ bɑ n mɔ̀, wi u kun bwisi mɔ, u gɛrɑmɑ mini, 5 u nɑ u di yin dii yerɔ, kpɑ u tɑm nɔ mɛ yi sɔɔru kuɑ. 6 U yɑrio lɑɑkɑri sɑribɑn wuurun di, kpɑ u wɑ u n wɑ̃ɑ wɑ̃ɑru sɔɔ. U lɑɑkɑrin swɑɑ mɔɔ.
Bwisigii kɑ tii suo
7 À n tɔn yɑɑ kɑsikio gerusi, ɑ tii gɛndu kɑsuɑwɑ. À n mɑɑ tɔn kɔ̃so tɑɑrɛ wɛ̃, ɑ tii wɔmburu kɑsuɑwɑ. 8 À n tɔn yɑɑ kɑsikio gerusi, u koo nun tusi. Adɑmɑ ɑ̀ n bwisigii gerusi, u koo nun kĩɑ. 9 Ye ɑ bwisigii sɔ̃ɔwɑ, yɑ rɑ win bwisi sosiwɑ. Ye ɑ mɑɑ gemgii sɔ̃ɔsi, yɑ rɑ win yɛ̃ru sosiwɑ. 10 À n kĩ ɑ n bwisi mɔ, ɑ de ɑ ginɑ Yinni Gusunɔ nɑsiɑ. À n Gusunɔ Dɛɛro giɑ kɑɑ n yɛ̃ru mɔ. 11 Bwisi yi koo wunɛn wɑ̃ɑrun tɔ̃ru sosi. 12 À n kuɑ bwisigii, wunɑ kɑɑ yen ɑre di. À n mɑɑ sɑ̃ɑ tɔn yɑɑ kɑsikio, wunɑ kɑɑ yen wɑhɑlɑ wɑ.
Gɑri bɑkɑru
13 Gɑri bɑkɑru tɑ sɑ̃ɑwɑ nge kurɔ wi u ku rɑ tii nɛnɛ sɛ̃ɛ, u ǹ gɑ̃ɑnu gɑnu yɛ̃. 14 U rɑ n sɔ̃wɑ win dii kɔnnɔwɔ wuun mi n gunum bo. 15 Min diyɑ u rɑ n tɔmbu sokumɔ be bɑ begiru doonɔ, 16 u n mɔ̀, wi u ǹ lɑɑkɑri mɔ, u gɛrɑmɑ mini. 17 Gɑ̃ɑ nɔrurɑ ye bɑ gbɛnɑ, yɑ nɔrubu do. Dim mɛ bɑ dimɔ ɑsiri sɔɔ, mɛnɑ mu rɑ n do. 18 Adɑmɑ yɛ̃ro kun yɛ̃ mɑ gɔribɑ wɑ̃ɑ mi. Be u sokɑ kpuro bɑ rɑ dewɑ gɔribun wɑ̃ɑ yerɔ.