Mɔn ni nu kɑ tɔnun dɑɑ yɑ̃
10
1 Sɑlomɔɔn mɔnnu. Bii bwisigiiwɑ u rɑ de win tundon nukurɑ n do. Adɑmɑ bii gɑri bɔkɔ u rɑ win mɛron nukuru sɑnkuwɑ.
2 Dukiɑ ye bɑ wɑ kɑ kɔ̃sɑn swɑɑ, yɑ ku rɑ ɑrufɑɑni gɑɑ ko, ɑdɑmɑ ye bɑ wɑ dee dee, yerɑ yɑ rɑ wɑ̃ɑru wɛ̃.
3 Yinni Gusunɔ kun gemgii derimɔ gɔ̃ɔru sɔɔ, ɑdɑmɑ u rɑ tɔn kɔ̃so birewɑ ye u binɛ sɑ̃ɑ.
4 Wi u yikuru mɔ, wiyɑ sɑ̃ɑrɑ rɑ deemɛ, ɑdɑmɑ wi u hɑniɑ mɔ, wiyɑ u rɑ dukiɑ wɑ.
5 Wi u dĩɑnu mɛnnɑmɔ gɛ̃ɛbun sɑɑ, u lɑɑkɑri mɔwɑ, ɑdɑmɑ wi u dò sɑɑ ye, u koo sekuru wɑ.
6 Gemgii u rɑ tii domɑru kɑsuewɑ, ɑdɑmɑ tɔn kɔ̃son nɔɔ gɑ rɑ n kɔ̃sɑ bɛkiwɑ.
7 Bɑ ku rɑ gemgii duɑri, ɑdɑmɑ tɔn kɔ̃so, bɑ rɑ nùn duɑriwɑ sere kɑ win yĩsirɔ.
8 Wi u bwisi mɔ, wiyɑ u rɑ sɔ̃ɔsiru wure, ɑdɑmɑ wi u kun gɑri gerubu yɛ̃, u rɑ kɑm kowɑ.
9 Wi u sĩimɔ gem sɔɔ, u ku rɑ n nɑnde, ɑdɑmɑ wìn sɑnu sɑnusu kun dɛɛre, u koo sɔ̃ɔsirɑ.
10 Wi u win beruse gɔni, u nùn nuki sɑnkumɔwɑ, ɑdɑmɑ wi u kun gɑri gerubu yɛ̃, u rɑ kɑm kowɑ.
11 Bwisigiin gɑri yi sɑ̃ɑwɑ wɑ̃ɑrun nuuru, ɑdɑmɑ tɔn kɔ̃son gɑri, kɔ̃sɑ yi rɑ n bɛki.
12 Tusiru tɑ rɑ sɑnnɔ seeyewɑ, ɑdɑmɑ kĩru tɑ rɑ torɑnu kpuro wukiriwɑ.
13 Lɑɑkɑrigiin geren diyɑ bɑ rɑ bwisi wɑ, ɑdɑmɑ bokurɑ tɑ rɑ n gɑri bɔkɔ mɑrɑ.
14 Bwisigii u rɑ bwisi berewɑ nge ɑrumɑni, ɑdɑmɑ gɑri bɔkɔn gere yɑ rɑ de u biru wurɑwɑ.
15 Gobigiin ɑrumɑni yɑ rɑ nùn kɔ̃suwɑ nge gbɑ̃rɑru, ɑdɑmɑ sɑ̃ɑron sɑ̃ɑru tɑ rɑ nùn kɑm kowɑ.
16 Gemgiin sɔmburu tɑ rɑ dewɑ u n wɑ̃ɑ, ɑdɑmɑ tɔn kɔ̃so u rɑ win dukiɑ dendiwɑ u kɑ kɔ̃sɑ ko.
17 Wi u rɑ kirɔbɑ yɑɑye u koo wuswɑɑ dɑ win wɑ̃ɑru sɔɔ, ɑdɑmɑ wi u rɑ ye duɑri u ko n kɔ̃ɔrɑmɔwɑ u n dɔɔ.
18 Wi u tusiru beruɑ gɔ̃ruɔ u sɑ̃ɑwɑ murɑfiti. Mɛyɑ wi u mɑɑ seedɑ weesugiɑ dimɔ u sɑ̃ɑwɑ gɑri bɔkɔ.
19 Gɑri bɛkɛgii kun torɑnu kpeemɔ, ɑdɑmɑ wi u rɑ win yɑrɑ nɛnɛ u sɑ̃ɑwɑ bwisigii.
20 Gemgiin gɑri yi sɑ̃ɑwɑ nge sii geesun tii, ɑdɑmɑ tɔn kɔ̃son bwisikunu nu ǹ ɑrufɑɑni gɑɑ mɔ.
21 Gemgiin gɑri yi rɑ kɑ tɔn dɑbinu ɑrufɑɑni nɑɑwɛ, ɑdɑmɑ gɑri bɑkɑsu su rɑ gbiwɑ sɛkum lɑɑkɑri sɑrirun sɔ̃.
22 Yinni Gusunɔn domɑrɑ tɑ rɑ tɔnu ko dukiɑgii. Tɔnun tiin himbɑ kun gɑ̃ɑnu sosimɔ wi sɔɔ.
23 Gɑri bɔkɔn mi, kɔ̃sɑn kobu bu sɑ̃ɑwɑ nge dweebu. Nge mɛyɑ lɑɑkɑri yɑ mɑɑ sɑ̃ɑ bwisigiin mi.
24 Yèn bɛrum kɔ̃sɑn kowobu bɑ mɔ, yerɑ yɑ rɑ bu deemɛ. Ye mɑɑ gemgibɑ kĩ, yerɑ n dɑ koore.
25 Wɑhɑlɑ yɑ̀ n seewɑ nge woo gunɑ, yɑ rɑ tɔn kɔ̃so surewɑ, ɑdɑmɑ gemgii u rɑ n yɔ̃wɑ dim dim sere kɑ bɑɑdommɑɔ.
26 Tɑm mɔmmɔm mu rɑ donnu sirewɑ, kpɑ wiisu su nɔni sɔkiri. Nge mɛyɑ yikuro u rɑ win yinnin mɔru seeye.
27 Be bɑ rɑ Yinni Gusunɔ nɑsie, berɑ bɑ rɑ tɛ, ɑdɑmɑ durumgibu bɑ rɑ gbiwɑ sɛkum.
28 Gemgiin yĩiyɔbu bu rɑ nùn nuku dobu wɛ̃wɑ, ɑdɑmɑ tɔn kɔ̃sogibu kun ɑrufɑɑni gɑɑ mɔ.
29 Yinni Gusunɔ u rɑ gemgibu kɔ̃suwɑ, bɑ̀ n sĩimɔ win swɛɛ sɔɔ, ɑdɑmɑ u rɑ tɔn kɔ̃sobu kɑm koosiewɑ.
30 Gɑ̃ɑnu gɑnu sɑri ni nu koo gemgii surɑ, ɑdɑmɑ tɔn kɔ̃so u ǹ kpɛ̃ u sinɑ tem mɛ sɔɔ.
31 Gɑri bwisigiiyɑ yi rɑ yɑri gemgiin nɔɔn di, ɑdɑmɑ bɑ koo wee kowon yɑrɑ burɑwɑ.
32 Gemgii, durom gɑriyɑ u rɑ gere, ɑdɑmɑ kɔ̃sɑ tɔn kɔ̃son nɔɔ gɑ rɑ gere.