Bwisi yi tɔmbu nɔɔgiru sue
8
1 I swɑɑ dɑkio.
Bwisi yi gbɑ̃rɑmɔ, yɛ̃ru tɑ nɔɔgiru sue.
2 Yi yɔ̃ gungunu wɔllɔ swɑɑ bɑɑrɔ kɑ swɑɑ kɛɛnɑnɔ.
3 Yi gbɑ̃rɑmɔ gɑmbon bɔkuɔ wuun duu yerɔ
mi bɑ rɑ siribu ko, yi mɔ̀,
4 bɛɛ tɔmbu, bɛɛyɑ nɑ soku,
tɔn bibu kpurowɑ nɑ kɑ mɔ̀.
5 Lɑɑkɑri sɑribɑ, i de i n lɑɑkɑri mɔ.
Gɑri bɑkɑsu, i bwisi koowo.
6 I swɑɑ dɑkio, kon bɛɛ gɑri bɛɛrɛgii sɔ̃.
Ye kon gere kpuro yɑ sɑ̃ɑwɑ dee dee.
7 Domi nɑ ku rɑ weesu gere, nɑ kɔ̃sɑ tusɑ.
8 Nɛn gɑri kpuro sɑ̃ɑwɑ gem,
weesu kɑ tɑki sɑri yi sɔɔ.
9 Yi kpuro yi bururewɑ kpɑsɑsɑ bwisigiin mi.
Mɛyɑ yi mɑɑ dɛɛre wi u yɛ̃ru mɔn mi.
10 I nɛn sɔ̃ɔsiru mɔɔ n kere sii geesu,
kpɑ i mɑɑ yɛ̃ru mwɑ n kere wurɑn tii.
11 Domi bwisi yi bɛɛrɛ mɔ yɑ kpɑ̃
yɑ burɑ yɑ̃nu kpuro kere.
Ye bɑ rɑ kɑsu kpuro sɔɔ,
gɑ̃ɑnu sɑri ni kɑɑ kɑ yi weesinɑ.
Bwisi yi tii tusiɑmɔ
12 Nɛ bwisi, nɑ rɑ gɑrin ɑsɑnsi tubu.
Nɑ yɛ̃ru mɔ n kɑ gɑ̃ɑnu wunɑnɑ.
13 À n kĩ ɑ Yinni Gusunɔ bɛɛrɛ wɛ̃, ɑ de ɑ kɔ̃sɑ tusi.
Nɑ tii suɑbu kɑ yɛ̃kɔ
kɑ kɔ̃sɑn kookoosu kɑ keetɑn gɑri tusɑ.
14 Nɑ rɑ tɔnu bwisi kɛ̃, kpɑ n nùn lɑɑkɑri wɛ̃.
Nɛnɑ nɑ yɛ̃ru, nɛnɑ mɑɑ dɑm.
15 Nɛn sɑɑbuwɑ sinɑmbɑ kɑ bɑndu nɛni,
mɑ wirugibɑ woodɑ wɛ̃ɛmɔ ye yɑ dee dee sɑ̃ɑ.
16 Nɛn somirun sɑɑbuwɑ sinɑmbu kɑ wirugibu
kɑ siri kowobu kpuro bɑ kɑ tem nɛni.
17 Be bɑ mɑn kĩ, nɑ mɑɑ bu kĩ.
Be bɑ mɑn kɑsu, bɑ koo mɑn wɑ.
18 Arumɑni kɑ bɛɛrɛwɑ nɑ tɔnu wɛ̃ɛmɔ
kɑ mɑɑ dukiɑ ye yɑ ku rɑ sɑnkire.
Kon de ye tɔnu mɔ kpuro yɑ n dɑ wɛ̃re.
19 Nɛn ɑre yi sii geesu kɑ wurɑn tii bɛɛrɛ kere.
20 Nɑ sĩimɔwɑ swɛɛ yì sɔɔ gem kɑ kookoo geesu wɑ̃ɑ.
21 Nɑ be bɑ mɑn kĩ ɑrumɑni wɛ̃ɛmɔ
mɑ nɑ dukiɑ yibiɑmɔ ben beru yerɔ.
22 Yinni Gusunɔ u mɑn mɑrɑ u sere gɑ̃ɑnu kpuro tɑkɑ kuɑ.
23 Bɑ mɑn gɔsɑ bɑ yi yellun di n tɛ
bɑ sere hɑnduniɑ tɑkɑ kuɑ.
24 Bɑ mɑn mɑrɑ bɑ sere nim wɔ̃ku kuɑ,
sɑnɑm mɛ nim bweru sɑri.
25 Bɑ mɑn mɑrɑ bɑ sere guunu kɑ gungunu swĩi.
26 Sɑnɑm mɛ, Gusunɔ kun ginɑ tem tɛrie kɑ mɛn gbeɑ.
Bɑɑ tuɑ, u ǹ mɑm kue.
27 Sɑɑ ye u wɔllu tɛriɑmɔ
kɑ nim wɔ̃kun bubenu,
nɑ wɑ̃ mi.
28 Sɑnɑm mɛ u guru winu doke wɔllɔ,
mɑ nim mu kurɑ tem di mu tɛriɑ,
nɑ wɑ̃ɑ mi.
29 Sɑnɑm mɛ u nim wɔ̃kun nim yɔ̃rɑ yeru sɔ̃ɔsi
u nɛɛ, mu ku tu sɑrɑ,
mɑ u tem tɑ̃sisiɑ,
30 nɑ wɑ̃ɑ win bɔkuɔ sɑ sɔmburu mɔ̀.
Win nuku dobu wɑ̃ɑ nɛ sɔɔ bɑɑdommɑ.
Nɑ gɔ̃ru dobu mɔ win wuswɑɑɔ,
31 kɑ hɑnduniɑ sɔɔ.
Mɑ nɑ bɔri yɛndu mɔ tɔmbun suunu sɔɔ.
Doo nɔɔrugiiwɑ wi u bwisin gɑri swɑɑ dɑki
32 Ǹ n mɛn nɑ, nɛn bii durɔminu, i mɑn swɑɑ dɑkio.
Doo nɔɔrugibɑ be bɑ nɛn swɑɑ swĩi.
33 I sɔ̃ɔsiru wuro,
i ku tu ɑtɑfiiru ko,
kpɑ i bwisi ko.
34 Doo nɔɔrugiiwɑ wi u mɑn swɑɑ dɑki,
mɑ u rɑ n yɔ̃ nɛn dii kɔnnɔwɔ bɑɑdommɑ
u n mɑn mɑrɑ.
35 Domi wi u mɑn wɑ, u wɑ̃ɑru wɑwɑ,
u koo mɑɑ Yinni Gusunɔn nɔnu geu wɑ.
36 Adɑmɑ wi u mɑn torɑ u tii kɔ̃sɑ kuɑwɑ.
Be bɑ mɑn tusɑ kpuro, gɔɔwɑ bɑ kĩ.