Kirɔ kurɔ sɑkɑrɑ kowon sɔ̃
7
1 Wunɛ nɛn bii durɔbu, ɑ nɛn gɑri nɛnuɔ, kpɑ ɑ ku rɑ nɛn gere duɑri. 2 A nɛn gere mɛm nɔɔwɔ kpɑ ɑ wɑ ɑ wɑ̃ɑru di. A nɛn sɔ̃ɔsiru lɑɑkɑri koowo nge mɛ tɔnu rɑ n win nɔni lɑɑkɑri sɑ̃ɑ. 3 A tu nɛnuɔ kem kem kpɑ ɑ tu yore wunɛn gɔ̃ruɔ. 4 A bwisi sɔ̃ɔwɔ ɑ nɛɛ, wunɑ nɛn sesu, kpɑ ɑ lɑɑkɑri soku wunɛn bɔrɔ. 5 Ye yiru ye, yɑ koo nun gbɑrɑ gɑbun kurɔbun min di be bɑ rɑ tɔnu fufu ko.
6 Sɔ̃ɔ teeru nɑ yɑm mɛɛrɑ nɛn dirun fɛnɛntin di. 7 Nɑ gɑri bɔkɔ goo wɑ ɑluwɑɑsi lɑɑkɑri sɑrirugibun suunu sɔɔ. 8 U sɑrɔ u dɔɔ wuu suunuɔ mi kurɔ sɑkɑrɑ kowo goo u wɑ̃ɑ. Mɑ u kpɑ kɑ win yɛnun bɔkuɔ, u sĩimɔ tɛɛru sɔɔ, 9 sɑɑ yoki yɑm bereberebun di sere n kɑ kuɑ wɔ̃kuru. 10 Wee, kurɔ wi, u kɑ nùn yinnɑ, u kurɔ tɑnɔ yɑ̃nu sebuɑ. Bwisi kɔ̃si wɑ̃ɑ win gɔ̃ruɔ. 11 U sɑ̃ɑwɑ sekuru sɑri kɑ gɑri sunɔ. U ku rɑ sinɛ win yɛnuɔ. 12 U rɑ n wɑ̃ɑwɑ tɔɔwɔ, gɑsɔ swɛɛyɔ, gɑsɔ swɑɑ kɛɛnɑnɔ, gɑsɔ mɑɑ yɑburɔ. 13 U nùn gɑbɑ u bɔkɑsi u kɑ nùn nɔɔ sɔ̃sunɑ, mɑ u nùn gɑri sɔ̃ɔwɑ kɑ sekuru sɑriru u nɛɛ, 14 u win siɑrɑbun yɑ̃kuru kuɑ. Tɔ̃ɔ terɑ u ten nɔɔ mwɛɛru yibiɑ. 15 Yen sɔ̃nɑ u yɑrimɑ bu kɑ wɑɑnɑ, u mɑɑ nùn wɑ. 16 U beku burɑnu tɛrie win kpin yerɔ ni bɑ wesɑ kɑ Egibitigibun wɛ̃ɛ. 17 U turɑre bwese bwesekɑ nubu durorugiɑ yɛ̃kɑ kpinu wɔllɔ. 18 U nɑ bu ben kĩru ko sere kɑ sisiru bururɔ, kpɑ bɑ n bɔkɑsinɛ kɑ nuku dobu. 19 Domi win durɔ sɑri yɛnuɔ. U sɑnum dɑ n tomɑ. 20 Gobi yi u doke bɔɔrɔ u kɑ dɑ, yi kpɑ̃. Suru koo tɑrum ko u sere wurɑmɑ. 21 Kɑ gɑri dori yiyɑ u nùn gɑwɑ, mɑ u nùn kɑmiɑ. 22 Mii mii, mɑ u nùn swĩi nge nɑɑ ye bɑ dɔɔ bu go, ǹ kun mɛ kpɑsɑ ye yɑ dukɑ dɔɔ yu yinɑ mwɑɑrɑ, 23 ǹ kun mɛ gunɔ ge gɑ wɔriɔ tɑɑ sɔɔ. Gɑ ǹ yɛ̃ gɔɔwɑ gɑ dɔɔ, sere sɑɑ ye sɛ̃u gɑ gen sɔndu sɔkɑ.