A ku tii doke goon dibu sɔɔ
6
1-2 Nɛn bii, ɑ̀ n tii dɔrɑ ɑ nɛɛ, kɑɑ goon dibu sɔbe, mɑ wunɛn gɑri yi nun yinɑ mwɑ, 3 ɑ duɑwɑ mi dibugii win nɔmɑ sɔɔ. Yen sɔ̃, ɑ doo ɑ nùn wɑ kpɑ ɑ nùn suuru kɑnɑ, ɑ tii yɑkiɑ win nɔmɑn di. 4 A ku nɛɛ, kɑɑ ginɑ kpunɑ ɑ wɛ̃rɑwɑ ɑ sere dɑ ɑ nùn suuru kɑnɑ. 5 A tii yɑkio kpɑ ɑ n tii mɔ nge mɛ nɛm tɑɑkɔ kɑ gunɔ nu rɑ kisire tɑɑson yinɑn di.
Bɑ yikuro kirɔ mɔ̀
6 Wunɛ yikuro, ɑ doo ɑ tɑmminu mɛɛri. A nin sɔmburu lɑɑkɑri koowo kpɑ ɑ wɑ ɑ bwisi ko. 7 Nu ǹ sunɔ mɔ, nu ǹ mɑɑ kpɑro mɔ, mɛyɑ nu ǹ mɑɑ wirugii mɔ, 8 ɑdɑmɑ nu rɑ nin dĩɑnu kɑsu nu yi gɛ̃ɛbun sɑnɑm kɑ sɔ̃ɔ sɑ̃rerun sɑɑ. 9 Wunɛ yikuro, sere dommɑ kɑɑ n kpĩ. Dommɑ kɑɑ dom se. 10 Wee, ɑ̀ n dom yĩburɑ ɑ dweeyɑ kɑ nɔm gbinnɑɑ fiiko, 11 sɑ̃ɑru tɑ koo nun deemɑ subɑru sɔɔ nge gbɛnɔ, kpɑ gɔ̃ɔru tu nun wɔri nge swɑɑ dio.
Tɔn kɔ̃son dɑɑ
12 Wi u gɑri weesugii kpɑrɑ, u sɑ̃ɑwɑ wi u kun gɑru mɔ̀, kɑ tɔn bɛrɛtɛkɛ. 13 U rɑ tɔmbu nɔni yɑ̃ɑkinu kue, kpɑ u yĩreru ko kɑ nɑɑsu, kɑ mɑɑ nɔmɑ, u kɑ bu nɔni wɔ̃ke. 14 Kɔ̃sɑn kobɑ bu rɑ n nùn nɛni, kpɑ u n yen sɔɔru mɔ̀ bɑɑdommɑ u n sɑnnɔsu seeyɑmɔ. 15 Yen sɔ̃nɑ ɑsɔrɔ yɑ koo nùn deemɑ subɑru sɔɔ, kpɑ n kun koore bu nùn seeyɑ.
Ye Yinni Gusunɔ u tusɑ
16-19 Gɑ̃ɑnu nɔɔbɑ tiɑ Yinni Gusunɔ u tusɑ, u ku rɑ nu wɑɑbu kɑ̃. Niyɑ,
tii suɑbun kookoosu,
kɑ weesu,
kɑ tɔn dɛɛron goberu,
kɑ kɔ̃sɑn himbɑ,
kɑ dɑɑ kɔ̃sɑn kĩru,
kɑ tɔnu gɑri mɑnibu.
Gɑ̃ɑnu nɔɔbɑ yiruse mɑm wɑ̃ɑ. Niyɑ,
tɔn gbinnɑɑ berusebun suunu sɔɔ.
Kirɔbɑ sɑkɑrɑrun sɔ̃
20 Nɛn bii durɔbu, ɑ wunɛn tundon gere mɛm nɔɔwɔ, kpɑ ɑ kɑ wunɛn mɛron sɔ̃ɔsiru sɔmburu ko. 21 A n ye kpuro nɛni bɑɑdommɑ wunɛn gɔ̃ruɔ, kpɑ ɑ ye doke wĩirɔ nge wurɑ. 22 Yɑ koo nun kpɑrɑ wunɛn sɑnu sɑnusu sɔɔ, kpɑ yu nun kɔ̃su wunɛn kpin yerɔ. Yɑ koo mɑɑ nun bwisi kɛ̃ ɑ̀ n dom yɑndɑ. 23 Domi gere ye, yɑ sɑ̃ɑwɑ nge fitilɑ, mɑ sɔ̃ɔsi te, tɑ sɑ̃ɑ nge yɑm bururɑm. Ben kirɔ yɑ rɑ mɑɑ nun wɑ̃ɑrun swɑɑ sɔ̃ɔsiwɑ. 24 Yɑ koo nun gbɑrɑ kurɔ tɑnɔn nɔmɑn di. Yɑ koo nun yɑrɑ win gɑri dorin di. 25 A ku kurɔ win bweseru binɛ ko win burɑm sɔ̃. A ku de u nun kɔkiri kɑ win durɔ nɔni. 26 Kɑɑ kpĩ ɑ kurɔ tɑnɔ wɑ kɑ gobi fiiko, ɑdɑmɑ ɑ̀ n kɑ kurɔ mɔro kpunɑ, wunɛn wɑ̃ɑru kpurowɑ kɑɑ biɑ. 27 Kɑɑ kpĩ ɑ dɔ̃ɔ kpɛ̃ɛ bɔɔrɔ wunɛn yɑ̃nu nu kun dɔ̃ɔ mwɑɑre? 28 Kɑɑ kpĩ ɑ sĩ dɔ̃ɔ gɛ̃ɛ wɔllɔ wunɛn nɑɑsu su kun dɔ̃ɔ mwɑɑre? 29 Nge mɛyɑ ɑ ǹ kpɛ̃ ɑ goon kurɔ bɑbɑ bɑ kun nun sɛɛyɑsie. 30 Goo ù n dĩɑnu gbɛnɑ yèn sɔ̃ gɔ̃ɔrɑ nùn mɔ̀, bɑ ku rɑ nùn gɔburu wɑ. 31 Kɑ mɛ, u koo kɔsiɑwɑ n kere ye u gbɛnɑ. Ye u mɔ win yɛnuɔ kpuro, yerɑ u koo wɛ̃. 32 Adɑmɑ wi u tɔn kurɔ kɔkurɑ u kɑ nùn sɑkɑrɑru kuɑ, u sɑ̃ɑwɑ gɑri bɔkɔ. Domi wi u yen bweseru mɔ̀, wiyɑ u koo kɑm ko. 33 Bɑ koo nùn so kpɑ u bɛɛrɛ biɑ. Sekuru sɔɔrɑ u ko n wɑ̃ɑ bɑɑdommɑ. 34 Kpɑnnɑsirɑ koo de kurɔ win durɔ u mɔru se. U koo yɛ̃ro mɔru kɔsiɑwɑ u kun win wɔnwɔndu kue. 35 U ǹ gɑ̃ɑnu mwɑɑmɔ kɔsire, u ǹ mɑɑ suuru mɔ̀, bɑɑ bɑ̀ n nùn kɛ̃nu tɑɑsi.